Ang Kaaway sang Kabuhi nga Walay Katapusan
Kapitulo 2
Ang Kaaway sang Kabuhi nga Walay Katapusan
1. Sanglit madamu ang indi malipayon kag malinong, ano nga mga pamangkot ang nagautwas?
KALIPAY sa duta—halos tanan maluyag sini. Kon amo ngaa madamu ang indi malipayon? Ano ang kabangdanan? Sanglit halos tanan maluyag sing paghidait, ngaa nagainaway ang mga pungsod kag ngaa nagadinumtanay ang mga tawo? May yara ayhan kusog nga nagatiklod sa ila sa paghimu sining kalainan? Mahimu ayhan nga ang isa ka indi makita nga kusog nagakontrol sa mga pungsod?
2. Ano nga mga krimen sa maragtas ang nagapalibog sa madamu kon bala ang tawo ginakontrol sang isa ka malaut, dimakita nga gahom?
2 Madamu ang nagapalibog sa sini kon makita nila ang kapintas sang tawo—ang makahaladlok nga mga gas nga ginagamit sa inaway sa pagpuot kag sa pagpaso sa tawo tubtub mapatay, subong man ang mga bomba atomika kag napalm. Binagbinaga man ang flamethrower, ang mga kampo konsentrasyon, ang pagpatay sa minilyon ka makaluluoy nga mga tawo, subong sang natabo sa Cambodia. Sa banta mo ayhan aksidente lamang ining tanan nga kalautan? Samtang ang tawo may ikasarang sa paghimu sing makakulugmat nga mga buhat, kon binagbinagon mo ang iya kalautan, indi bala daw may yara isa ka malaut, indi makita nga gahom nga nagatiklod sa iya?
3. Ano ang ginasiling sang Biblia tuhoy sa pagginahom sa kalibutan?
3 Indi kinahanglan nga magpakot sa sini. Ang Biblia maathag nga nagapakita nga ang isa ka intelihente, dimakita nga persona nagakontrol sa mga tawo kag mga pungsod. Sa Biblia, gintawag ni Jesucristo ining gamhanan nga “ang manuggahom sining kalibutan.” (Juan 12:31; 14:30; 16:11) Sin-o sia?
4. Ano ang ginpakita sang Yawa kay Jesus, kag ano ang iya gintanyag sa iya?
4 Agod makilala naton sia, hunahunaa ang natabo sang ginsugdan ni Jesus ang iya ministeryo diri sa duta. Ang Biblia nagasiling nga sang mabawtismohan si Jesus nagkadto sia sa kahanayakan diin ginhaylo sia sang dimakita nga tinuga nga si Satanas nga Yawa. Yari ang bahin sang paghaylo: “Sa liwat gindala sia sang Yawa sa isa ka bukid nga labing mataas, kag ginpakita sa iya ang tanan nga ginharian sa kalibutan kag ang ila himaya, kag nagsiling sia sa iya: ‘Tanan ini nga butang ihatag ko sa imo, kon magyaub ka kag magsimba sa akon.’ ”—Mateo 4:8, 9.
5. (a) Ano ang nagapakita kon bala ang tanan nga pangulohan sa kalibutan iya sang Yawa? (b) Suno sa Biblia, sin-o “ang dios sining sistema sang mga butang”?
5 Hunahunaa ang gintanyag sang Yawa kay Jesucristo. “Ang tanan nga ginharian sa kalibutan.” Ang Yawa bala ang tag-iya sang tanan nga pangulohan sa kalibutan? Huo, kay ngaa gintanyag niya ini kay Jesus? Wala ginpanghiwala ni Jesus nga si Satanas ang tag-iya, kay kon indi kuntani namatok sia. Si Satanas gid ang dimakita nga manuggahom sang tanan nga pungsod sa kalibutan! Ang Biblia maathag nga nagasiling: “Ang bug-os nga kalibutan yara sa gahom sang malauton.” (1 Juan 5:19) Ang matuod, ang Pulong sang Dios nagatawag kay Satanas “ang dios sining sistema sang mga butang.”—2 Corinto 4:4.
6. (a) Ining impormasyon tuhoy sa paggahom ni Satanas nagabulig sa aton nga mahangpan ang ano? (b) Ano ang luyag ni Satanas nga himuon sa aton, gani ano ang dapat naton himuon?
6 Nagabulig ini sa aton sa paghangop sa ginsiling ni Jesus: “Ang akon ginharian indi bahin sining kalibutan.” (Juan 18:36) Mahangpan man naton kon ngaa nagadinumtanay kag nagapinatyanay ang mga pungsod samtang handum sang tagsa ka normal nga tawo ang mabuhi sa paghidait. Huo, si “Satanas . . . nagapatalang sa bug-os napuy-an nga duta.” (Bugna 12:9) Luyag man niya nga patalangon kita. Indi niya luyag nga makabaton kita sing kabuhi nga walay katapusan sa Dios. Gani dapat naton awayon ang iya malain nga impluensia. (Efeso 6:12) Dapat naton makilala si Satanas kag ang iya paghikot agod indi mapatalang.
KON SIN-O ANG YAWA
7. Ngaa indi naton makita ang Yawa?
7 Si Satanas nga Yawa isa ka matuod nga persona. Indi sia kalautan lamang nga nagaluntad sa tawo, subong amo ang pagpati sang iban. Matuod, indi makita sang tawo ang Yawa, subong nga indi man nila makita ang Dios. Ang Dios kag ang Yawa espiritu nga mga persona, mga porma sang kabuhi nga mas mataas sa tawo kag indi makita.—Juan 4:24.
8. Ngaa madamu nga tawo ang nagapati nga gintuga sang Dios ang Yawa?
8 Mahimu may mamangkot, ‘Kon ang Dios gugma, ngaa gintuga niya ang Yawa?’ (1 Juan 4:8) Ang matuod, wala gintuga sang Dios ang Yawa. ‘Apang kon gintuga sang Dios ang tanan,’ mahimu isiling sang isa ka tawo, ‘pat-od nga gintuga niya ang Yawa. Sin-o pa? Sa diin naghalin ang Yawa?’
9. (a) Ano nga sahi sang mga persona ang mga anghel? (b) Ano ang kahulugan sang “yawa” kag “satanas”?
9 Suno sa Biblia nagtuga ang Dios sing madamu espiritu nga persona kasubong niya. Sa Biblia, ginatawag sila nga mga anghel. “Mga anak sang Dios” sila. (Job 38:7; Salmo 104:4; Hebreo 1:7, 13, 14) Gintuga sila sang Dios nga himpit. Wala sing yawa ukon satanas sa ila. Ang “yawa” nagakahulugan manugpasipala kag ang “satanas” nagakahulugan manugpamatok.
10. (a) Sin-o ang naghimu kay Satanas nga Yawa? (b) Paano mahimu sang isa ka maayong tawo ang iya kaugalingon nga mangin kriminal?
10 Apang, sang ulihi ang isa sining espiritu nga mga anak sang Dios naghimu sang iya kaugalingon nga Yawa, kon sayoron, isa ka malaut nga butigon nga nagapakalain sa iban. Ginhimu man niya ang iya kaugalingon nga Satanas, kon sayoron, manugpamatok sa Dios. Wala sia pagtugaha nga amo sina, kundi nangin amo sia sina sang ulihi na lang. Sa pag-ilustrar: Ang kawatan indi ginabun-ag nga kawatan. Mahimu nga maayo ang iya pamilya, bunayag ang mga ginikanan kag masinulondon sa kasugoan ang iya mga utod. Apang ang iya handum sa mabakal sang kuarta mahimu nga nagtiklod sa iya nga mangawat. Gani, paano nangin Satanas nga Yawa ang isa sang espiritu nga mga anak sang Dios?
11. (a) Ano nga katuyoan sang Dios ang nahibaloan sang rebelyuso nga anghel? (b) Ano ang ginhandum sadto sining anghel, kag gani ano ang iya nahimu?
11 Ang anghel nga nangin Yawa nagakabuhi na sang gintuga sang Dios ang duta kag sang ulihi ang unang tawhanon nga mag-asawa, sanday Adan kag Eva. (Job 38:4, 7) Gani nabatian niya ang pagsiling sang Dios sa ila nga manganak sila. (Genesis 1:27, 28) Nahibaloan niya nga indi magdugay mapuno ang duta sing matarong nga mga tawo nga nagasimba sa Dios. Amo yadto ang katuyoan sang Dios. Apang, ining anghel nasilaw sa iya ginaangkon nga katahom kag kaalam kag naghandum nga sia ang simbahon sa baylo sang Dios. (Ezequiel 28:13-15; Mateo 4:10) Sa baylo nga sikwayon ining malain nga handum, ginbinagbinag niya ini. Gani naghikot sia agod matigayon ang dungog kag pagkaimportante nga ginhandum niya. Ano ang iya ginhimu?—Santiago 1:14, 15.
12. (a) Paano nakighambal ining anghel kay Eva, kag ano ang iya ginsugid sa iya? (b) Paano nangin Satanas nga Yawa ining anghel? (c) Ano ang sayop nga pagtamod tuhoy sa dagway sang Yawa?
12 Gingamit sang rebelyuso nga anghel ang man-ug sa pagpakighambal sa unang babayi, si Eva. Kaangay ini sa ginahimu sang isa ka tawo nga hanas, nga daw nagapahambal sa isa ka sapat ukon monyika nga malapit sa iya. Apang ang nagapakighambal kay Eva amo gid ang rebelyuso nga anghel, nga ginatawag sa Biblia “ang dumaan nga man-ug.” (Bugna 12:9) Nagsiling sia nga nagabinutig ang Dios, kag nagalikom sa iya sang ihibalo nga dapat niya mahibal-an. (Genesis 3:1-5) Malaut ini nga binutig, gani nangin yawa sia. Nangin manugpamatok man sia sa Dios, ukon Satanas. Sa amo, indi matuod nga ang Yawa may sungay kag ikog nga nagadumala sa duog sang tormento sa idalom sang duta. Sia isa ka gamhanan gid, apang malaut nga anghel.
ANG GAMUT SANG MGA PALALIGBAN SA KALIBUTAN
13. (a) Ano ang reaksion ni Eva sa binutig sang Yawa? (b) Ano ang mga pangangkon nga ginhimu sang Yawa?
13 Nagmadinalag-on ang pagbinutig sang Yawa kay Eva. Nagpati sia kag naglalis sa Dios. Kag nahaylo niya ang iya bana nga lalison man ang sugo sang Dios. (Genesis 3:6) Ang yawa nangangkon nga ang tawo sarang mabuhi nga wala ang Dios. Kag ang tawo kuno makagahom sa iya kaugalingon sing madinalag-on, bisan pa wala sing bulig sang Dios. Nangangkon man ang Yawa nga mapatalikod niya sa Dios ang tanan nga mangin anak nanday Adan kag Eva.
14. Ngaa wala sa gilayon ginpatay sang Dios si Satanas?
14 Sa pagkamatuod, sarang sang Dios patyon si Satanas sa gilayon. Apang indi masabat ang mga pamangkot nga ginpautwas ni Satanas, mga pamangkot nga madumduman sang mga anghel nga nagatan-aw sadto. Gani ginhatagan sang Dios si Satanas sing tion nga pamatod-an ang iya mga ginsiling. Ano ang resulta?
15, 16. (a) Ano ang ginpamatod-an sang pagligad sang tion tuhoy sa mga pangangkon sang Yawa? (b) Ano ang malapit na matabo?
15 Ang pagligad sang tion nagpamatuod nga ang mga tawo indi makagahom sa ila kaugalingon sing madinalag-on nga wala sing bulig sang Dios. Napaslawan gid ang ila mga pagtinguha. Nag-antos ang mga tawo sa idalom sang mga pangulohan sang tawo, nga, suno sa Kasulatan, ginamaniobra sang Yawa. Ang paghatag man sang Dios sing tion maathag nga nagpakita nga wala mapatalikod ni Satanas ang tanan nga tawo sa pagsimba sa Dios. May yara nagapabilin nga matutom sa paggahom sang Dios. Halimbawa, imo mabasa sa Biblia, nga si Satanas napaslawan sa pagpugong kay Job nga mag-alagad sa Dios.—Job 1:6-12.
16 Sa amo napamatod-an nga binutig ang mga ginsiling sang Yawa. Takus gid sia laglagon bangod sia ang nag-umpisa sang malaut nga pagrebelde sa Dios. Makalilipay nga nalab-ot na naton karon ang tion nga tapuson sang Dios ang paggahom ni Satanas. Sa paglaragway sa unang tikang sa paghimu sini, ang Biblia nagasugid sing isa ka importante nga inaway sa langit nga wala makita ukon mabatian sang katawhan sa duta. Basaha sing maayo ang masunod nga rekord sang Biblia:
17. (a) Paano ginalaragway sang Biblia ang inaway sa langit? (b) Ano ang resulta sadto sa langit, kag sa duta?
17 “Nagsugod ang inaway sa langit: Si Miguel [ang ginbanhaw nga si Jesucristo] kag ang iya mga anghel nagpakig-away batok sa dragon, kag ang dragon nagbato upod sa iya mga anghel apang nalutos sila, kag wala na sing duog sa ila sa langit. Kag ginhulog ang dakung dragon, yanang dumaan nga man-ug, nga ginatawag nga Yawa kag Satanas, nga nagapatalang sa bug-os napuy-an nga duta; ginhulog sia sa duta, kag ang iya mga anghel ginhulog kaupod niya. ‘Gani, magkalipay kamo, mga langit kag tanan kamo nga nagapuyo dira! Kailo sa duta kag sa dagat, kay ang Yawa nagpanaug sa inyo, nga nagabalingaso sa kaakig, bangod nga nakahibalo sia nga may malip-ot lamang sia nga tion.’ ”—Bugna 12:7-9, 12.
18. (a) San-o natabo ang inaway sa langit? (b) Ano ang nagakatabo sa duta sugod sang “ginhulog” si Satanas?
18 San-o natabo ining inaway sa langit? Suno sa pamatuod natabo ini sadtong Inaway Kalibutanon I, nga nagsugod sang 1914. Subong ginapakita sa Bugna, si Satanas gintabog sa mga langit sadtong tion, nga buot silingon nagapuyo kita sa sulod sang iya “malip-ot lamang nga tion” sugod sadto. Gani, karon na ang “katapusan nga mga adlaw” sang kalibutan ni Satanas. Ang nagadugang nga pagkamalinapason, kahadlok, mga inaway, kakulang sing kalan-on, mga balatian kag iban pa nga kalisdanan nga aton ginaantos mga pamatuod sining kamatuoran.—Mateo 24:3-12; Lucas 21:26; 2 Timoteo 3:1-5.
19. (a) Ano ang ginapanikasogan karon ni Satanas? (b) Ano ang maalamon nga himuon naton?
19 Sanglit nahibaloan ni Satanas nga malapit na matapos ang iya “malip-ot lamang nga tion,” labi pa nga nagapanikasog sia nga punggan ang mga tawo sa pag-alagad sa Dios. Luyag niya dalahigon ang pinakamadamu nga mga tawo sa iya kalaglagan. Ang Biblia nagakabagay nga nagalaragway sa iya subong nagangurob nga leon nga nagapangita sang iya tulukbon. (1 Pedro 5:8, 9) Kon indi naton luyag nga madakpan niya, dapat naton ton-an kon paano sia nagasalakay kag ang mga paagi man nga ginapatalang niya ang mga tawo.—2 Corinto 2:11.
KON PAANO GINAPATALANG NI SATANAS ANG MGA TAWO
20. (a) Daw ano ka madinalag-on ang pagsalakay ni Satanas? (b) Ngaa mapaabot naton nga sa masami ang iya pagpatalang daw indi malain, kundi mapuslanon pa?
20 Indi paghunahunaa nga mahapos makita ang mga paagi ni Satanas sa pagpatalang. Lantip sia sa pagdaya. Tuso gid ang iya mga paagi sa nagligad nga linibo ka tuig amo kon ngaa madamu sa karon ang wala gani nagapati nga nagakabuhi sia. Para sa ila ang kalautan kag kalainan normal nga mga kahimtangan nga indi madula. Si Satanas nagapanghikot kasubong sang mga lider sang krimen sa karon nga nagapakunokuno subong talahuron, apang sa likod gali, nagahimu sing kalautan. Ang Biblia nagapaathag: “Si Satanas nagapakaanghel sang kapawa.” (2 Corinto 11:14) Sa amo mapaabot naton nga ang iya pagpatalang sa tawo daw indi malain, kundi mapuslanon pa.
21. Ano ang isa ka paagi nga gingamit ni Satanas?
21 Dumduma nga si Satanas nagpakunokuno nga abyan kay Eva. Nian ginlimbong niya si Eva sa paghimu sing butang nga pagdumdom niya maayo para sa iya. (Genesis 3:4-6) Amo man sa karon. Halimbawa, ginasugyot ni Satanas ang mga tawo nga unahon ang mga kaayohan sang tawhanon nga pangulohan sa baylo sang ila pag-alagad sa Dios. Nagbunga ini sing nasyonalismo kag nagresulta sa makakulugmat nga inaway. Sini lang, napahulag ni Satanas ang mga tawo nga tilawan ang lainlain nga plano para sa paghidait kag kalig-onan. Ang isa sini amo ang Nasyones Unidas. Apang nakatuga bala ini sing mahidaiton nga kalibutan? Wala gid! Sa baylo, ginpahilayo sini ang tawo sa kahimusan sang Dios sa pagpaluntad sing paghidait sa katawhan, ang iya nagapakari nga ginharian sa idalom ni Jesucristo, ang “Prinsipe sang Paghidait.”—Isaias 9:6; Mateo 6:9, 10.
22. Ano ang indi luyag ni Satanas nga mahibal-an naton?
22 Agod makabaton sing kabuhi nga walay katapusan, dapat nga may yara kita sibu nga ihibalo nahanungod sa Dios, sa iya Hari-nga-Anak kag sa iya ginharian. (Juan 17:3) Indi luyag ni Satanas nga mahibaloan mo ini, gani himuon niya ang tanan agod balabagan ikaw. Paano? Ang isa paagi sa pagpautwas sing pagpamatok sa imo, ayhan pagyubit. Ang Biblia nagasiling: “Ang tanan nga nagahandum sa pagkabuhi nga may diosnon nga debosyon upod kay Cristo Jesus pagahingabuton man.”—2 Timoteo 3:12.
23. (a) Paano gamiton ni Satanas bisan ang aton mga abyan kag mga paryente sa pagpalas-ay sa aton? (b) Ngaa indi gid ikaw magpadaug sa pagpamatok?
23 Mahimu nga ang suod nga mga abyan ukon mga paryente magsiling sa imo nga indi sila ugyon sa imo pag-usisa sa Kasulatan. Si Jesucristo mismo nagpaandam: “Sa pagkamatuod, ang mga kaaway sang tawo amo ang mga katapo sang iya panimalay. Ang nagahigugma sang amay ukon iloy labi pa sa akon indi takus sa akon; kag ang nagahigugma sang anak nga lalaki ukon anak nga babayi labi pa sa akon indi takus sa akon.” (Mateo 10:36, 37) Mahimu nga palas-ayon ikaw sang mga paryente, ginahimu ini sing sinsero bangod indi nila nahibaloan ang dalayawon nga kamatuoran sa Biblia. Apang kon untatan mo ang pagtuon sang Pulong sang Dios bangod sang pagpamatok, paano ka tamdon sang Dios? Kag kon mag-untat ka, paano mo mabuligan ang mga abyan kag mga hinigugma sa paghangop nga ang sibu nga ihibalo sa Biblia subong ka importante sa kabuhi ukon kamatayon? Ang imo pagpabilin sa mga butang nga imo naton-an sa Pulong sang Dios mahimu nga mag-impluensia sa ila sa ulihi nga magtuon man sang kamatuoran.
24. (a) Ano pa ang iban nga mga paagi nga ginagamit sang Yawa agod sablagan ang mga tawo sa pagtigayon sing nagahatag kabuhi nga ihibalo? (b) Daw ano ka importante sa banta mo ang pagtuon sang Pulong sang Dios?
24 Sa pihak nga bahin, basi sulayon ka ni Satanas sa imoral nga butang, nga indi kalahamut-an sa Dios. (1 Corinto 6:9-11) Ukon mahimu nga pabatyagon ka niya nga wala ka sing tion sa pagtuon sing Biblia. Apang kon binagbinagon mo ini, may mas importante pa bala sa pagkuha sini nga sahi sang ihibalo? Dili pagtuguti ang bisan ano nga magsablag sa imo sa pagtigayon sining ihibalo nga makadul-ong sa imo sa pagbaton sing kabuhi nga walay katapusan sa paraiso sa duta!
25. Kon padayon nga sumpungon naton ang Yawa, ano ang indi niya mahimu sa aton?
25 Ang Biblia nagapalig-on: “Sumpunga ang Yawa.” Kon himuon mo ini, “magapalagyo sia sa inyo.” (Santiago 4:7) Buot bala silingon nga kon pamatokan mo ang pagsalakay ni Satanas magauntat sia kag indi ka na niya paggamuhon? Indi, indi sia mag-untat sa pagtinguha nga pahimuon ka sang luyag niya. Apang kon padayon nga sumpungon mo sia, indi gid niya ikaw madala sa pagsumpong sa Dios. Gani, magmaukod sa pagkuha sang importante nga ihibalo sa Biblia kag himua ang imo naton-an. Importante ini agod indi ikaw malimbong sang isa pa ka paagi ni Satanas sa pagpatalang sa mga tawo, ang dimatuod nga relihion.
[Mga Pamangkot sa Pagtinuon]
[Piktyur sa pahina 16, 17]
Matanyag ayhan ni Satanas kay Cristo ining tanan nga pangulohan sang kalibutan kon indi ini iya?
[Piktyur sa pahina 19]
Ining kawatan wala mabun-ag nga kawatan, subong nga ang Yawa wala gintuga nga “yawa”
[Piktyur sa pahina 20, 21]
Ang inaway sa langit natapos sang ginhulog si Satanas kag ang mga demonyo sa duta. Mabatyagan ninyo karon ang epekto sini
[Piktyur sa pahina 24]
Mahimu may mamatok sa imo padayon nga pagtuon sing Biblia
