Manugwali 5:1-20
5 Halungi ang imo mga tikang kon magkadto ka sa balay sang matuod nga Dios;+ mas maayo nga magkadto ka didto agod magpamati,+ sangsa maghalad kaangay sang ginahimo sang mga buangbuang,+ kay wala sila makahibalo nga malain ang ila ginahimo.
2 Indi ka magpadasudaso sa imo ginahambal, ukon magpadalidali sa paghambal sa imo tagipusuon sa atubangan sang matuod nga Dios,+ kay ang matuod nga Dios yara sa langit apang ikaw yari sa duta. Gani maghalong ka sa imo ginahambal.+
3 Bangod sa tuman nga pagpangabudlay*+ ang tawo nagadalamguhanon, kag bangod sa sobra nga hambal ang tawo nagahambal sing kabuangan.+
4 Kon magpanaad ka sa Dios, indi pagpadugaya ang pagtuman sini,+ kay wala sia nahamuot sa mga buangbuang.+ Kon ano ang ginpanaad mo, tumana ini.+
5 Mas maayo pa nga indi ka magpanaad sangsa magpanaad ka nga indi mo pagtumanon.+
6 Indi ka magpakasala bangod sang imo ginhambal*+ kag indi ka magsiling sa anghel* nga nagsala ka.+ Ngaa paakigon mo ang matuod nga Dios bangod sang imo ginsiling kag gub-on niya ang imo mga hinimuan?+
7 Kay subong nga ang sobra nga kabalaka nagapadalamguhanon,+ ang sobra nga hambal nagaresulta man sa wala sing pulos. Apang kahadluki ang matuod nga Dios.+
8 Indi ka matingala kon makita mo nga ginapigos ang imol kag ginalapas ang katarungan kag pagkamatarong sa inyo lugar.+ Kay inang mataas nga opisyal ginatan-aw sang mas mataas pa sa iya, kag may mas mataas pa sangsa ila.
9 Subong man, ang patubas sang duta ginbahinbahin sa ila tanan; bisan ang hari nagasalig sa sini.+
10 Ang nagahigugma sa pilak indi maayawan sa pilak, kag ang nagahigugma sa manggad indi makontento sa kinitaan.+ Wala man ini sing pulos.+
11 Kon magdamo ang maayo nga mga butang, nagadamo man ang nagapanginpulos sa sini.+ Kag ano bala ang bentaha sini sa tag-iya, magluwas sa pagtan-aw niya sini?+
12 Mahamuok ang katulugon sang mamumugon, diutay man ukon madamo ang iya ginakaon, apang ang manggaranon wala ginapatulog sang iya kabuganaan.
13 May nakita ako nga makapasubo gid* nga nagakatabo sa idalom sang adlaw: Ang manggad nga ginatago sang tawo para sa iya kahalitan.
14 Nadula ini nga manggad bangod sa wala nagmadinalag-on nga pagpasimpalad,* kag sang nangin amay sia wala sia sing nahatag nga palanublion sa iya anak.+
15 Subong nga ang tawo hublas sang naggua sia sa tiyan sang iya iloy, magataliwan man sia nga hublas.+ Kag indi niya madala ang bisan ano nga butang nga iya ginpangabudlayan.+
16 Ini man nga butang makapasubo:* Kon paano sia nag-abot, amo man ang iya pagtaliwan; kag ano ang makuha niya sa iya pagpangabudlay nga wala man lang sing pulos?+
17 Sa bug-os niya nga kabuhi nagakaon sia sa kadulom, nga may daku nga kalisod kag pagbalatian kag kaakig.+
18 Ini ang pinakamaayo kag husto nga butang nga nakita ko: Ang tawo magkaon kag mag-inom kag magpangalipay sa tanan niya nga ginpangabudlayan+ diri sa idalom sang adlaw sa malip-ot nga kabuhi nga ginhatag sang matuod nga Dios sa iya, kay amo ina ang iya padya.*+
19 Kag kon hatagan sang matuod nga Dios ang tawo sing manggad kag mga pagkabutang,+ kag gintugutan niya sia sa pagpanginpulos sa sini, dapat niya batunon ang iya padya* kag magkalipay sa iya ginpangabudlayan. Dulot ini sang Dios.+
20 Kay indi niya pirme matalupangdan* ang mga kabudlayan sang iya malip-ot nga kabuhi, bangod ginapuno sang matuod nga Dios ang iya tagipusuon sing kalipay.+
Footnote
^ Ukon “tuman kadamo nga ginakabalak-an.”
^ Sa literal, “imo unod.”
^ Ukon “mensahero.”
^ Ukon “kalamidad.”
^ Ukon “hilikuton.”
^ Ukon “kalamidad.”
^ Ukon “bahin.”
^ Ukon “bahin.”
^ Ukon “madumduman.”
