Manugwali 4:1-16
4 Ginbinagbinag ko liwat ang tanan nga pagpamigos nga ginahimo sa idalom sang adlaw. Nakita ko ang mga luha sang mga ginpigos kag wala gid sing nagalugpay sa ila.+ Kag gamhanan ang mga nagapigos sa ila, kag wala sing nagalugpay sa ila.
2 Gani nahunahuna ko nga mas maayo pa ang patay sangsa buhi.+
3 Kag mas maayo pa gid ang wala pa matawo,+ nga wala makakita sang makapasubo nga mga ginahimo sa idalom sang adlaw.+
4 Kag nakita ko ang tuman nga paghimakas* sang mga tawo kag ang ila pagtinguha nga mangin sampaton bangod sang ila pagpaindisanay;+ wala man ini sing pulos, paglagas lamang ini sa hangin.
5 Ang buangbuang nagapanimuko bisan daw mapatay na sia sa gutom.*+
6 Mas maayo pa ang diutay nga pahuway* sangsa tuman nga pagpangabudlay* kag paglagas sa hangin.+
7 Ginbinagbinag ko ang isa pa ka halimbawa sang butang nga wala sing pulos sa idalom sang adlaw:
8 May isa ka tawo nga nagaisahanon, wala sia sing kaupod; wala man sia sing anak ukon utod, apang wala sia nagauntat sa pagpangabudlay. Wala sia sang kaayawan sa manggad.+ Apang wala sia nagapamangkot sa iya kaugalingon, ‘Para kay sin-o ako nagapangabudlay? Ngaa ginadingutan ko ang akon kaugalingon* sing maayo nga mga butang’?+ Wala man ini sing pulos kag makapasubo ini nga buluhaton.+
9 Ang duha mas maayo sangsa isa,+ bangod may maayo nga padya* ang ila pagpangabudlay.
10 Kay kon matumba ang isa, mapabangon sia sang iya kaupod. Apang ano ang matabo sa isa nga natumba kon wala sing magpabangon sa iya?
11 Dugang pa, kon ang duha tuparay nga maghigda, mainit-initan sila, apang paano sia mainit-initan kon nagaisahanon lang sia?
12 Kag mahapos man sia daugon kon isa lang sia, apang kon duha sila, mabudlay sila daugon. Kag ang lubid nga tatlo ka dupli indi madali* mabugto.
13 Mas maayo pa ang imol nga pamatan-on nga maalamon sangsa tigulang nga hari nga buangbuang,+ nga wala na nagapamati sa laygay.+
14 Kay naggua sia* sa bilangguan agod mangin hari,+ bisan pa natawo sia nga imol sa ginharian.+
15 Ginbinagbinag ko ang natabo sa tanan nga nagakabuhi sa idalom sang adlaw, kag subong man sa pamatan-on nga nagbulos sa hari.
16 Bisan pa madamo ang sakop niya, sa ulihi ang magasunod sa ila indi na malipay sa iya.+ Wala man ini sing pulos, paglagas lamang ini sa hangin.
Footnote
^ Ukon “pagpangabudlay.”
^ Sa literal, “kag ginakaon ang iya kaugalingon nga unod.”
^ Sa literal, “isa ka hakop nga pahuway.”
^ Sa literal, “duha ka hakop nga pagpangabudlay.”
^ Ukon “kalag.”
^ Ukon “may mas daku nga kaayuhan.”
^ Ukon “mahapos.”
^ Ayhan nagapatuhoy sa pamatan-on nga maalamon.
