Gin-release ni Brother Cephas Kalinda, miembro sang Branch Committee sa Zambia ang Bag-ong Kalibutan nga Badbad Sang Cristianong Griegong Kasulatan sa Mbunda nga lenguahe sang Nobiembre 5, 2022. Gin-release ini nga Biblia paagi sa narekord na nga daan nga programa nga gin-stream sa sobra 1,500 ka tumalambong. Nangin available na dayon ang digital nga kopya sini nga Biblia. Ang naimprinta nga kopya mangin available sa Enero 2023.

Ginahambal ang Mbunda sa Angola kag sa Zambia. Sang mga dekada ’30, ginsugdan sang mga Saksi ni Jehova ang pagbantala sa mga tawo nga nagahambal sang Mbunda sa Northern Rhodesia (nga Zambia na subong). Sang 2014, nagporma sang Mbunda nga translation team. Ang remote translation office ara sa Mongu, sa Western Province sang Zambia.

Wala labot sa Bag-ong Kalibutan nga Badbad Sang Cristianong Griegong Kasulatan, may isa lang ka Biblia nga na-translate sa Mbunda nga lenguahe. Pero, mahal ini kaayo kag mabudlay intiendihon. Gani, antes sini nga release, ang mga Saksi ni Jehova nga nagahambal sang Mbunda nagagamit sang Bag-ong Kalibutan nga Badbad sa iban nga lenguahe.

Parte sa sining bag-o gin-release nga Biblia, ang isa ka translator nagsiling: “Natural ini, maathag, mahapos basahon kag ang pinakaimportante, ginasugid sini ang insakto gid nga kamatuoran sa Biblia.”

Ginsugid sang isa ka translator ang kabudlayan parte sa paggamit sang daan nga translation kon nagaistorya sa iban parte sa Biblia. Sia nagsiling: “Ang ngalan nga Jehova indi gid mabasa sa bisan diin nga bersikulo sa daan nga translation. Ginagamit sini ang titulo nga ‘Amon Agalon nga Dios’ kon nagapatuhoy kay Jehova. Bangod sini, indi gid makilala sang mga tawo ang ngalan sang Dios. Pero sa sining bag-o gin-release nga Cristianong Griegong Kasulatan mabasa ang ngalan nga Jehova sing 237 ka beses.”

Nagasalig kita nga makabulig gid ining bag-o gin-release nga translation sa mga kauturan naton nga nagahambal sang Mbunda para mangin mas malapit sila kay Jehova kag magbakod pa gid ang ila pagtuo sa iya.—Santiago 4:8.