Pareho sa madamo nga pungsod, ang mga awtoridad sa Sri Lanka naghimo man sang mga kasuguan sa ila pagtinguha nga malikawan ang paglapta sang COVID-19. Para matuman ini nga mga kasuguan, ginagamit sang aton mga kauturan sa mga sign-language group ang teknolohiya para makapanaksi sa mga apa kag bungol.

Si Vihanga Fernando, nga isa ka payunir nga sister, nagabantala paagi sa letter writing. Madamo nga apa ang nabudlayan magbasa sang nasulat nga mga tinaga, gani ginabutangan niya sang mga drowing ang iya mga sulat para ipaathag ang mga kamatuoran sa Biblia.

Si Sister Rosie Chithravelautham nagaduhaduha sang primero nga magdumala sang mga Bible study paagi sa videoconference. Nagsiling sia: “Sang una, indi nami ang signal kag indi maintiendihan sang iban nga mga apa ang akon ginasenyas.” Pero determinado gid si Rosie nga padayunon ang iya pagbantala bisan pa may pandemic. Gani gintestingan niya ini liwat. Subong, tatlo na ang iya Bible study, kag nagatambong na sila sa mga miting paagi sa videoconference.

Si Nirosha Shiranthi, nga isa ka apa nga sister nga nabawtismuhan sang Marso 2020, nakulbaan magpanaksi paagi sa video call. Gani ginpangamuyo niya ini kay Jehova. Dayon, nag-aplay sia bilang auxiliary payunir sang bulan sang Memoryal. Madamo nga apa ang nagtan-aw sang Memoryal bangod gin-agda sila ni Nirosha, kag gusto mabal-an sang pila sa ila ang tanda sang katapusan nga mga adlaw. Pito ka Bible study ang nasugdan niya. Nagsiling sia: “Nalipay gid ako kon nagabantala ako. Bisan indi kita makagua sa aton balay, makabantala kita gihapon. Ginatuman gid ni Jehova ang iya katuyuan.” Nagdesisyon si Nirosha nga padayunon ang iya pag-auxiliary payunir.

Nalipay gid kita nga mabalitaan ining maayo nga mga eksperiensia halin sa Sri Lanka. Resulta ini sang panikasog sang aton mga kauturan nga apa kag bungol para dayawon ang ngalan ni Jehova.—Salmo 113:1.