Ang Gwangju District Court sa South Korea nag-iskedyul nga hearingon ang kaso ni Brother Hye-min Kim, sa Disiembre 8, 2022. Si Hye-min nangindi nga magsoldado bangod sa iya konsiensia. Sia man ang una nga nagpangindi sa alternative civilian service (ACS) sang pungsod bangod daw pagsilot na ini. Posible sia nga sentensiahan nga mapriso sing 36 ka bulan kag may criminal record sia pagkatapos sini.

Ang 36 ka bulan nga ACS sang Korea amo ang pinakamalawig sa bilog nga kalibutan. Doble ang kalawigon sini sangsa pagserbisyo sa militar. Sa sulod sining tatlo ka tuig, ang mga nagpangindi nga magsoldado gina-detain, nga daw pareho sa pag-house arrest, sa mga dormitoryo sa sulod sang prisuhan, kag grabe kabudlay sang mga restriksion nga ginapatuman sa ila. Gani, imbes nga mangin matuod nga alternative sa pagserbisyo sa militar, ang ACS sang South Korea ginatawag sang mga eksperto sa bilog nga kalibutan nga “alternative nga pagsilot.” a

Sa talalupangdon nga desisyon sang Hunyo 28, 2018, ginkilala sang Constitutional Court of South Korea nga ginaproteksionan sang Korean Constitution ang kinamatarong sang mga nagpangindi nga magsoldado. Gani ginpaandaman sini ang mga nagahimo sang kasuguan nga mangin basihan sang ACS: “Kon tam-an kalawig ukon tam-an kabudlay ang alternative service amo nga daw indi na ini masarangan himuon sang mga nagapangindi nga magsoldado bangod sa konsiensia, mangin wala sing pulos ang katuyuan sang alternative service ukon mangin isa na lamang ini ka porma sang pagsilot sa ila, kag magalapas ini sa iban pa nga importante nga mga kinamatarong.”

Ang international standard para sa alternative service ginhimo sang United Nations Commission on Human Rights paagi sa isa ka resolusyon sang 1998. Ang mga pungsod nga may compulsory nga pagserbisyo sa militar ginpahanumdom nga dapat hatagan nila ang mga nagapangindi nga magsoldado sang isa ka porma sang pagserbisyo nga “para sa kaayuhan sang publiko kag indi isa ka klase sang pagsilot.”

Indi ini ang una nga tion nga ginkasuhan si Hye-min. Sang Septiembre 2020, gin-acquit sia sang Supreme Court sang South Korea bilang isa nga nagpangindi nga magsoldado bangod sa konsiensia. Pagligad sang pila ka semana, nag-apply sia para sa ACS. Kinahanglan niya nga maghulat asta sang Pebrero 7, 2022 para sugdan ang iya ACS. Pero, pagkatapos niya mabinagbinag sing maayo ang programa sang ACS nga daw halos pagsilot na, matinahuron sia nga nagdesisyon nga pangindian ang ACS.

Kon ang korte magdesisyon pabor kay Hye-min, mahimo ini magpahulag sa gobierno nga liwaton ang programa sang ACS para masunod sini ang international standards. Ini nga pagbag-o makahatag gid sang daku nga benepisyo indi lamang sa aton mga kauturan sa South Korea kag sa ila mga pamilya kundi pati man sa tanan nga Korean. Samtang wala pa ang desisyon, ginapangamuyo naton nga ang tanan nga apektado sini nga isyu padayon nga magsalig nga buligan sila ni Jehova nga ‘makabatas sing bug-os nga may pagpailob kag kalipay.’—Colosas 1:11.