Sang Hulyo 12, 2024, ginpagua sa prisuhan si Brother Vasiliy Meleshko. Gindesisyunan sia nga guilty kag ginsentensiahan sang tatlo ka tuig nga pagkapriso sang 2021.

Samtang napriso si Vasiliy, ginsaylosaylo sia sa indi magnubo sa pito ka prisuhan. May ara gani bes nga ang asawa ni Vasiliy nga si Zoya, wala ginsugiran kon diin sia sa sulod sang halos isa ka bulan. Grabe gid ang kabalaka sang iya asawa bangod madamo sia sang ginabatyag sa panglawas.

Ginsugid ni Zoya kon ano ang nakabulig sa ila ni Vasiliy nga makabatas bisan pa layuay sila: “Nabal-an namon nga malipay gid si Satanas kon pasugtan namon ini nga sitwasyon nga magguba sang amon pag-asawahay kag magpaluya sa amon sa espirituwal.” Nagsiling pa gid si Zoya: “Gani, ginhimo gid namon ni Vasiliy ang tanan namon nga masarangan para mangin mabakod kag suod ang amon relasyon sa isa kag isa kag kay Jehova. Ginpadal-an ako ni Vasiliy sang mga sulat nga nagapasalig nga palangga gid niya ako, kag may ginahambal gid sia pirme para pabakuron ang akon pagtuo.”

Nagapasalamat kita nga nakaupod na liwat ni Vasiliy si Zoya kag ang ila pamilya kag mga abyan. Samtang padayon naton nga ginapangamuyo ang aton mga kauturan nga ara sa prisuhan bangod sa ila pagtuo, makasalig kita nga alay-ayon kita ni Jehova sa tanan naton nga kabudlayan.—Salmo 55:22.