Sang Hulyo 6, 2023, nakadaug sang first prize ang 15 ka pamatan-on nga mga Saksi ni Jehova halin sa siudad sang Kassel, Germany. Bangod ini sa ila project nga nagapakita sang maisog nga halimbawa ni Sister Wilhelmine Pötter, nga napatay kay ginhingabot sia sang mga Nazi.

Sa bilog nga siudad sang Kassel, ang Stolpersteine in Kassel Foundation naghimo sang mga stepping stone bilang gagmay nga mga monumento para dumdumon ang mga napatay sa tion sang Nazi regime. Nalakip sa mga gindumdom amo si Wilhelmine kag ang iya bana nga si Justus Pötter. May dalan man nga ginngalanan sunod sa ngalan ni Wilhelmine sa katupad nga village sang Niestetal. Bilang bahin sang ikanapulo nga anibersaryo sang foundation, ang mga estudyante halin sa bilog nga siudad ginpapili sang isa ukon sobra pa sa mga biktima sang paghingabot sang Nazi. Mahimo sila sang report parte sa kabuhi sang ila napilian, kag isugid kon ano nga mga leksion ang ila natun-an.

Ginpili sang grupo sang mga kauturan, nga nagaedad 13 asta 23, si Wilhelmine para sa ila project. Naghimo sila sang 24 ka minuto nga video parte sa iya kabuhi nga may tig-ulo Obedient to God Alone. Ginsugid sang video kon paano sia ginpriso sang mga Nazi sang 1937 kag napatay sang 1942 sa concentration camp sa Ravensbrück sa edad nga 49. Dugang pa, ang mga estudyante naghimo sang gagmay nga mga poster nga may mga piktyur sang mga sulat ni Wilhelmine sa iya bana kag sa iya pamilya sang napriso sia. Ini nga mga poster gin-display sa bus stop sa kalye nga ginngalanan sunod kay Wilhelmine.

Sa isa ka sulat para sa iya bana, nga napetsahan Abril 25, 1937, si Wilhelmine nagsulat: “Pinalangga nga Justus, nalipay ako nga kalmado lang kita nga duha kag may mabakod nga pagtuo sa Dios sang ginsentensiahan kita. Subong, ginatugyan naton ang tanan sa kamot sang Ginuo, para padayon niya kita nga giyahan. Labaw sa tanan, ginapangamuyo ko sa Ginuo nga pabakuron kita sa espirituwal kag sa pisikal para matuman naton ang aton promisa sa iya nga mangin matutom asta sa katapusan. Indi sia magtugot nga hatagan kita sang kabudlayan nga labaw sa aton masarangan. Gani magatulok kita sa aton Ginuo kag Agalon nga may mabakod nga pagsalig.” Ginsabat ang iya pangamuyo, kay nakapabilin sila nga matutom asta sa ila kamatayon sa concentration camp.

Si Sister Alexandra Altemeier, nga 23 anyos, nagsiling sini sa video: “Si Wilhelmine kag ang iya bana nakabalo nga bangod mga sumulunod sila sang Cristo hingabuton gid sila. Ginbaton nila ang paghingabot, pag-aresto, kag bisan ang kamatayon bangod sang ila pagtuo kay kabalo sila nga indi sila pagkalimtan sang Dios.” Si Brother Ole Schröder, nga 18 anyos, nagbulig man sa project. Nagsiling sia: “Ginapalig-on gid ako sang halimbawa ni Sister Pötter. Takus gid sia ilugon bangod sang iya katutom, pagkamainunungon sa Dios, pagbatas, kag padayon nga kalipay. Ang iya halimbawa nagtudlo sa akon nga importante gid nga mangin abyan sang Dios.”

Sa award ceremony, ginpatan-aw ang bilog nga video sa 180 ka tawo, lakip sa mga estudyante, miembro sang media, ang mayor sang banwa, ang head sang Department of Culture, kag ang direktor sang school district.

Napalig-on gid kita upod sa aton mga kauturan nga nagpartisipar sa sini nga project bangod sa halimbawa sang pagtuo kag kaisog ni Justus kag ni Wilhelmine. Sigurado kita nga indi pagkalimtan ni Jehova ang mga matutom sa iya.—Hebreo 6:10.