Sang Septiembre 25, 2024, nagpagua sang importante nga desisyon ang Federal Supreme Court sang Brazil nga nagasuporta sa kinamatarong sang adulto nga mga pasyente nga puede sila makapangindi sa pagpatughong sang dugo kag makapili sila sang klase sang pagpabulong nga wala nagagamit sang dugo. Nagdesisyon man ang Korte nga dapat siguraduhon sang Ministry of Health nga ang mga pasyente nga wala nagpatughong sang dugo bangod sang personal nga rason ukon bangod sa ila ginapatihan sa relihion makabaton sang pagpabulong nga wala nagagamit sang dugo.

Ginbase ini nga desisyon sa kaso sang duha ka Saksi ni Jehova sa Brazil. Sang 2018, nangindi si Sister Malvina Silva nga magpirma sa form nga nagatugot sa iya mga doktor nga tughungan sia sang dugo sa tion nga operahan sia sa tagipusuon. Gani wala gindayon sang ospital ang iya operasyon. Halos duha pa ka tuig nga naghulat si Malvina para mabaton ang pagpabulong nga nagarespeto sang iya personal nga desisyon.

Sang 2014, operahan tani si Brother Heli de Souza. Pero ang ospital sa ila lugar wala sang mga gamit nga kinahanglan para maoperahan sia nga wala nagagamit sang dugo. Wala nagpasugot ang gobierno sa pangabay ni Heli nga isaylo sia sa lain nga ospital nga handa kuntani mag-opera sa iya base sa iya ginapatihan kag mga prinsipio. Asta subong, nagahulat gihapon si Heli nga maoperahan. Madamo nga mga Saksi ni Jehova sa Brazil ang nakaeksperiensia man sang amo sini nga mga kabudlayan. Ang iban sa ila gintughungan sang dugo bisan pa nangindi na sila.

Sang ginbasa ang desisyon, ang presidente sang Korte nga si Justice Luís Roberto Barroso, nagsiling: “Ang kinamatarong sa pagpangindi sa pagpatughong sang dugo bangod sa relihion sang isa nabase sa mga prinsipio sang konstitusyon parte sa pagrespeto sa tawo kag sa iya relihion. Dugang pa, base sa kinamatarong sa kabuhi kag panglawas, [ang mga Saksi ni Jehova] may kinamatarong sa pagpili sang lain nga klase sang pagpabulong kag makapangindi man sila sa pagpabulong nga nagagamit sang dugo base sa ila kinamatarong sa paghimo sang ila kaugalingon nga desisyon.”

Ginpatuman sa tanan nga korte sa Brazil ini nga desisyon parte sa pagrespeto sang personal nga desisyon sang pasyente nga magpili sang paagi sang pagpabulong. Amo man sini ang desisyon sang Supreme Court sang iban nga pungsod, lakip sa Australia, Canada, Japan, South Africa, kag United States. Pareho man ini sa desisyon nga ginpagua sang Septiembre 17, 2024, sang Grand Chamber of the European Court of Human Rights nga nagamando sa 46 ka pungsod sa Europe nga respetuhon ang personal nga desisyon sang pasyente.

Nagapasalamat gid kita kay ang Federal Supreme Court sa Brazil nagdesisyon pabor sa pagrespeto sa personal nga ginapatihan sang tanan sini nga mga pumuluyo kag sa ila kinamatarong nga makadesisyon parte sa pagpabulong.