jo pati-patni ek-doosre ki izzat karte hain, woh ek-doosre ki bhaavnaon ka khayal rakhte hain, aise vakt par bhi jab unki raay aapas mein na milti ho. shaadishuda zindagi par likhi ek kitab kehti hai, “jin pati-patniyon ke dil mein ek-doosre ke liye izzat hoti hai, woh koi anban hone par apni-apni baat par ade nahin rehte, balki samasya ke baare mein ek-doosre se baat karte hain. woh ek-doosre ki dhyan se sunte hain. fir koi aisa raasta nikalte hain, jis par donon raazee hon.”

pavitra shastra ki salah: ‘pyar sirf apne faayde ki nahin sochta.’​—1 kurinthiyon 13:4, 5.

“apni patni ki izzat karne ka matlab hai, uski kadar karna, use anmol samajhna aur aisa koi kaam na karna, jisse use thes pahunche ya hamara rishta kamzor pad jaaye.”​—micah.

agar pati-patni ek-doosre ka aadar na karein, to woh baat-baat par taane maareinge, kamiyaan gineinge, yahaan tak ki ek-doosre ko neecha dikhayenge. jaankaron ke mutabik ye saari baatein is baat ki nishani hai ki aage chalkar unki shaadi nahin tikegi.

“agar aap apni patni ko taane maarein ya uska mazak udayen, to woh apni hi nazar mein gir jaayegi, uska aap par se bharosa uth jaayega aur aapki shaadishuda zindagi tabah ho jaayegi.”​—brian.

khud se poochhiye

ek hafte tak apni baaton aur apne vyavhar par dhyan deejiye. fir khud se poochhiye:

• ‘mainne kitni baar apne saathi mein kamiyaan nikalin aur kitni baar uski taareef ki?’

• ‘mainne apne saathi ko kaise jataya ki main uski izzat karta hoon?’

apne saathi se is baare mein baat keejiye

• aap donon kis tarah apni baaton aur vyavhar se ek-doosre ka aadar kar sakte hain?

• aapka saathi kis tarah apni baaton aur vyavhar se aapka anadar karta hai?

ise aazmaiye

• aapke saathi ko kis tarah aapki izzat karni chahiye, iske teen tareeke likhiye. apne saathi se kahiye ki woh bhi aise teen tareeke likhe, jisse aapko uski izzat karni chahiye. aap donon ne jo likha hai, woh ek-doosre ko deejiye. fir jaisa likha hai, vaise ek-doosre ki izzat keejiye.

• apne saathi ke un gunon ke baare mein likhiye, jo aapko bahot pasand hain. fir use bataiye ki aapko uske ye gun kitne achhe lagte hain.

“agar main apne pati ki izzat karti hoon, to main apne vyavhar se jataungi ki mujhe unki kadar hai aur main chahti hoon ki woh khush rahein. iske liye zaroori nahin ki main unke liye koi bahot bada kaam karoon. main unki khaatir chhote-chhote kaam karke bhi jata sakti hoon ki main unka aadar karti hoon.”​—megan.

sau baat ki ek baat: aap shaayad sochein ki aap apne saathi ki bahot izzat karte hain, magar aapke saathi ko bhi lagna chahiye ki aap uski izzat karte hain.

pavitra shastra ki salah: “karuna se bharpoor gehre lagav, kripa, namrata, komalta aur sabra ka pehnava pehen lo.”​—kulussiyon 3:12.