24 mai, 2022 ko amareeki raajya texas ke ek chhote-se kasbe uvalde mein ek bhayanak vaardat hui. the new york times akhbar ke mutabik, ‘ek vyakti ne ek prathmik school (robb elementary school) mein 19 bachchon aur do teacheron ko bandook se maar daala.’

 dukh ki baat hai ki is tarah ki dil dehlanevali ghatnayen bahot aam ho gayi hain. usa today akhbar mein yah report di gayi thi ki sirf amareeka mein “pichhle saal school mein goleebari ki 249 vaardatein huin. itni vaardatein shaayad 1970 se lekar ab tak aur kisi saal mein nahin huin.”

 aakhir aisi khaufnak ghatnayen kyon hoti hain? inka saamna hum kaise kar sakte hain? kya aisi hinsa kabhi khatm hogi? in savalon ke javab bible mein diye gaye hain.

•   bible mein bataya gaya hai ki “aakhiri dinon” mein bahot-se log “lagav na rakhnevale” aur “khoonkhar” honge. aaj hum usi samay mein ji rahe hain. isliye bahot-se log bereham ho gaye hain aur andhadhundh maar-kaat kar rahe hain. yahi nahin, bible mein bataya gaya hai ki aise log “bad-se-badtar hote chale jaayenge.” (2 timuthiyus 3:1-5, 13) is baare mein aur jaanne ke liye, “aakhir kyon itni dukh-takaleefein hain?” lekh padhein.

 kai logon ke man mein yah saval aata hai, ‘ishvar school mein goleebari jaisi khaufnak vaardatein hone se kyon nahin rokta?’ is baare mein bhi bible mein bataya gaya hai. yah jaanne ke liye “achhe logon ke saath bura kyon hota hai?” lekh padhein.

•   “jo baatein pehale se likhi gayi thi, woh isliye likhi gayin ki hum unse seekhein aur shastra se ... hum dilasa paayen taaki hamare paas aasha ho.”—romiyon 15:4.

 jab hamare chaaron taraf hinsa ho rahi ho, to aise haalaat ka saamna karne mein bible ki salah hamare bahot kaam aa sakti hai. is baare mein zyada jaanne ke liye “kya aisi duniya mumkin hai, jahaan hinsa na ho?” lekh padhein.

 aisi dil dehlanevali khabrein sunkar ya dekhkar chhote bachche sehum jaate hain. aise mein maata-pita unki madad kaise kar sakte hain? yah jaanne ke liye “achhe rishte rakhein” lekh mein “bachchon ko samjhein aur unki madad karein” sheershak ke neeche di jaankari aur “buri khabron ka bachchon par asar” lekh padhein.

•   “woh unhein atyachar aur zulm se chhudayega.”—bhajan 72:14.

•   “woh apni talvarein peetkar hal ke faal aur apne bhaalon ko hansiya banayenge. ek desh doosre desh par fir talvar nahin chalayega aur na log fir kabhi yuddh karna seekheinge.”—mika 4:3.

 parmeshvar woh sab karega, jo insan ke bas ke baahar hai. swarg mein kaayam uski sarkar saare hathiyar nasht kar degi aur har tarah ki hinsa khatm kar degi. parmeshvar ki sarkar aur kya-kya karegi, yah jaanne ke liye “parmeshvar ke raaj mein ‘har taraf shaanti rahegi’” lekh padhein.