pehala shamooel 5:1-12
5 jab palishtiyon ne sachche parmeshvar ka sandook zabt kar liya+ to woh use ebnezer se ashdod le gaye.
2 vahaan woh sandook ko apne daagon devta ke mandir mein le gaye aur daagon ki moorat ke paas rakh diya.+
3 agle din jab ashdod ke log subah tadke uthe to unhonne dekha ki daagon ki moorat yahova ke sandook ke saamne munh ke bal zameen par giri padi hai.+ unhonne moorat uthayi aur vaapas uski jagah rakh di.+
4 doosre din subah tadke uthne par unhonne dekha ki daagon ki moorat fir se yahova ke sandook ke saamne munh ke bal zameen par giri padi hai. moorat ka sir aur uski donon hatheliyaan kati hui hain aur mandir ki dehleez par padi hain. sirf uska dhad, jo machhli jaisa dikhta tha,* saabut bacha hua tha.
5 yahi vajah hai ki aaj ke din tak ashdod mein daagon ke pujari aur uske mandir mein jaanevala koi bhi mandir ki dehleez par pair nahin rakhta.
6 yahova ne ashdod ke logon ko kadi saza di aur ashdod aur uske praanton mein rehnevalon ko bavaseer se peedit karke unka bura haal kar diya.+
7 yah dekhkar ashdod ke aadmiyon ne kaha, “israel ke parmeshvar ka sandook hamare beech se hata do kyonki woh hamare saath aur hamare daagon devta ke saath badi kathorta se pesh aaya hai.”
8 isliye unhonne palishtiyon ke sabhi sardaron ko bulvaya aur unhein ikattha karke unse poochha, “hum israel ke parmeshvar ke sandook ka kya karein?” unhonne kaha, “israel ke parmeshvar ka sandook yahaan se hatakar gat le jaao.”+ tab palishti, israel ke parmeshvar ke sandook ko gat le gaye.
9 jab sandook ko gat le jaaya gaya, to yahova ne us shehar par bhi kehar dhaaya jisse vahaan dar fail gaya. usne shehar ke sabhi logon ko, chhote se lekar bade tak, sabko bavaseer ke rog se maara.+
10 isliye gat ke logon ne sachche parmeshvar ka sandook ekron+ bhijva diya. magar jaise hi sandook ekron pahuncha, vahaan ke log chillane lage, “woh israel ke parmeshvar ka sandook hamare paas kyon le aaye? kya woh hamein aur hamare logon ko maar daalna chahte hain?”+
11 fir unhonne palishtiyon ke sabhi sardaron ko bulvaya aur unhein ikattha karke unse kaha, “israel ke parmeshvar ka sandook hamare yahaan se door kar do. use vaapas uski jagah bhej do taaki hum aur hamare log maar na daale jaayen.” unhonne aisa isliye kaha kyonki unke poore shehar par maut ka khauf chhaa gaya tha. shehar par sachche parmeshvar ki zabardast maar padi thi+
12 aur jo log zinda bache unhein bavaseer ka rog lag gaya. shehar ke sabhi log aasman ki taraf dekhkar madad ke liye pukarne lage.
kai footnote
^ shaa., “sirf daagon.”
