pehala shamooel 4:1-22
4 shamooel ka sandesh poore israel mein failta gaya.
fir israeli palishtiyon se yuddh karne nikaal pade. unhonne ebnezer ke paas chhaavni daali aur palishtiyon ne apek ke paas chhaavni daali.
2 palishtiyon ne israeliyon se mukabla karne ke liye morcha baandha. yuddh mein palishtiyon ne israeliyon ka bura hashra kar diya, unke kareeb 4,000 aadmiyon ko yuddh ke maidan mein maar daala aur unhein hara diya.
3 jab woh lautkar apni chhaavni mein aaye to israel ke mukhiyaon ne kaha, “aaj yahova ne hamein palishtiyon se kyon haarne diya?*+ chalo, hum sheelo se yahova ke karar ka sandook le aayen+ taaki woh sandook hamare beech rahe aur hamein dushmanon ke haath se bachaye.”
4 isliye logon ne kuch aadmiyon ko sheelo bheja aur woh vahaan se yahova ke karar ka sandook le aaye, jo senaon ka parmeshvar hai aur karoobon par* virajman hai.+ sachche parmeshvar ke karar ke sandook ke saath eli ke donon bete hopni aur finehas+ bhi the.
5 jaise hi yahova ke karar ka sandook chhaavni mein pahuncha, saare israeli itni zor se chillane lage ki zameen kaanpne lagi.
6 jab palishtiyon ne yah shor suna to woh kehne lage, “ibri logon ki chhaavni mein yah shorgul kaisa?” baad mein unhein pata chala ki yahova ka sandook israeliyon ki chhaavni mein aaya hai.
7 tab palishti dar gaye, woh kehne lage, “unki chhaavni mein ishvar aa gaya hai!”+ fir unhonne kaha, “ab to hum maare gaye! aisa aaj tak kabhi nahin hua!
8 haay, ab kya hoga! us mahapratapi ishvar ke haath se kaun hamein bachayega? usi ishvar ne veerane mein tarah-tarah ke kehar dhaakaar misriyon ko maar daala tha.+
9 magar palishtiyo, himmat se kaam lo, mardangi dikhao taaki jaise un ibriyon ne tumhari gulami ki hai, vaise tumhein unki gulami na karni pade.+ haan, mardangi dikhao aur unka mukabla karo!”
10 tab palishtiyon ne israeliyon se jamkar ladai ki aur unhein hara diya.+ sabhi israeli apne-apne tamboo mein bhaag gaye. us din bahot maar-kaat machi aur israeliyon ke 30,000 paidal sainik maare gaye.
11 aur-to-aur, parmeshvar ka sandook zabt kar liya gaya aur eli ke donon bete hopni aur finehas bhi maare gaye.+
12 us din binyameen gotra ka ek aadmi yuddh ke maidan se bhaagkar sheelo aaya. usne apne kapde faade the aur sir par dhool daal rakhi thi.+
13 jab woh sheelo pahuncha tab eli sadak kinare kursi par baitha raasta taak raha tha, kyonki use sachche parmeshvar ke sandook ki bahot chinta ho rahi thi aur uska dil kaanp raha tha.+ us aadmi ne shehar ke sab logon ko khabar di. tab saara shehar cheekhne-chillane laga.
14 eli ne cheekh-pukar sunkar kaha, “shehar mein yah khalbali kyon machi hai?” fir vahi aadmi daudkar eli ke paas aaya aur use khabar di.
15 (eli 98 saal ka tha, uski aankhon ki raushni chali gayi thi, use kuch dikhayi nahin deta tha.)+
16 us aadmi ne eli se kaha, “main hi yuddh ke maidan se bhaagkar aaya hoon. main aaj hi vahaan se aaya hoon.” eli ne usse poochha, “yuddh mein kya hua beta? mujhe bata.”
17 us aadmi ne eli ko yah khabar sunayi, “israeli palishtiyon se buri tarah haar gaye hain aur yuddh se bhaag gaye hain.+ tere donon bete hopni aur finehas bhi maare gaye+ aur dushmanon ne sachche parmeshvar ka sandook zabt kar liya hai.”+
18 jaise hi us aadmi ne sachche parmeshvar ke sandook ka zikra kiya, eli jo faatak ke paas baitha tha, apni kursi se peechhe ki taraf gir pada aur uski gardan toot gayi aur uski maut ho gayi, kyonki woh boodha ho chuka tha aur shareer se bhaari tha. usne 40 saal tak israel ka nyay kiya tha.
19 uski bahoo yaani finehas ki patni poore dinon pet se thi. jab usne suna ki sachche parmeshvar ka sandook zabt kar liya gaya hai aur uske sasur aur pati ki maut ho gayi hai, to woh dard se dohari ho gayi aur achanak uski prasav-peeda shuroo ho gayi. usne ek bachche ko janm diya,
20 jiske baad uski maut ho gayi. jab woh aakhiri saansein gin rahi thi to paas khadi aurton ne usse kaha, “dar mat, tere beta hua hai.” magar woh kuch nahin boli aur usne unki baaton par koi dhyan nahin diya.*
21 usne apne bete ka naam ikabod*+ rakha aur kaha, “israel ki shaan bandhuai mein chali gayi.”+ usne yah baat isliye kahi kyonki sachche parmeshvar ka sandook zabt kar liya gaya tha aur uske sasur aur pati ki maut ho chuki thi.+
22 usne kaha, “israel ki shaan bandhuai mein chali gayi kyonki sachche parmeshvar ka sandook zabt kar liya gaya hai.”+
kai footnote
^ shaa., “yahova ne hamein kyon hara diya?”
^ ya shaayad, “ke beech.”
^ ya “par man nahin lagaya.”
^ matlab “shaan kahaan hai?”
