pehala shamooel 1:1-28
1 epraim+ ke pahadi pradesh ke raamataim-sopeem shehar+ mein ek* aadmi rehta tha jiska naam elkana+ tha. yah epraimi aadmi yaroham ka beta tha aur yaroham eleehoo ka, eleehoo tohoo ka aur tohoo joof ka beta tha.
2 elkana ki do patniyaan thi, ek ka naam hanna tha aur doosri ka paninna. paninna ke bachche the, magar hanna ka koi bachcha nahin tha.
3 elkana har saal senaon ke parmeshvar yahova ki upasna* karne aur uske liye balidan chadhane apne shehar se sheelo jaaya karta tha.+ sheelo mein eli ke do bete, hopni aur finehas+ yaajkon ke naate yahova ki seva karte the.+
4 ek baar jab elkana ne parmeshvar ko balidan chadhaya to usne apni patni paninna ko aur uske sabhi bete-betiyonn ko balidan mein se hisse diye,+
5 magar usne hanna ko ek khaas hissa diya kyonki woh usi se pyar karta tha. yahova ne hanna ki kokh band kar di thi.
6 hanna ki sautan use dukh dene ke liye us par lagatar taane kasti thi kyonki yahova ne uski kokh band kar di thi.
7 har saal jab woh yahova ke bhavan jaate+ tab uski sautan uske saath aisa hi bartav karti thi. woh hanna ko itna taana kasti ki hanna rone lagti aur kuch khaati-peeti nahin thi.
8 uske pati elkana ne usse kaha, “hanna, tu kyon ro rahi hai? kuch khaati kyon nahin? kyon itni udas hai?* kya main tere liye das beton se bhi badhkar nahin?”
9 jab sheelo mein woh khaa-pi chuke to hanna uthi aur vahaan gayi jahaan yaajak eli tha. woh yahova ke mandir*+ ki dehleez ke paas kursi par baitha tha.
10 hanna kadvahat se bhar gayi thi, woh fut-futkar rone lagi aur yahova se prarthna karne lagi.+
11 usne yah mannat maani, “hey senaon ke parmeshvar yahova, agar tu apni daasi ki haalaat par nazar kare aur mujh par dhyan dekar meri binti sune aur apni daasi ko ek beta de,+ to hey yahova, main use tujhe doongi taaki woh zindagi-bhar teri seva kare. uske sir par kabhi ustara nahin chalega.”+
12 hanna kaafi der tak yahova ke saamne prarthna karti rahi aur is dauran eli uska munh dekh raha tha.
13 hanna man-hi-man prarthna kar rahi thi. uske honth kaanp rahe the, magar uski aavaz nahin sunayi de rahi thi. isliye eli ne socha ki woh nashe mein hai.
14 usne hanna se kaha, “tu kab tak nashe mein rahegi? jaa, nasha utarne ke baad aana.”
15 tab hanna ne usse kaha, “nahin, mere maalik! mainne koi daakh-madira ya sharab nahin pi hai. main to dukh ki maari hoon. main sirf apne dil ka haal yahova ko bata rahi hoon.+
16 tu apni daasi ko nikammi aurat mat samajhna. main ab tak parmeshvar se prarthna kar rahi thi kyonki mera man bahot dukhi hai, main bahot pareshan hoon.”
17 tab eli ne usse kaha, “tu befikra hokar ghar jaa. israel ka parmeshvar teri binti sune, teri manokamna poori kare.”+
18 tab hanna ne usse kaha, “teri kripa is daasi par bani rahe.” tab woh aurat vahaan se chali gayi. usne jaakaar kuch khaaya aur uske chehre par fir udasi na rahi.
19 fir woh subah tadke uthe aur unhonne yahova ke saamne dandvat kiya. iske baad woh apne shehar raamah+ laut gaye. elkana ne apni patni hanna ke saath sambandh rakhe aur yahova ne hanna ki haalaat par dhyan diya.*+
20 ek saal ke andar* hanna garbhvati hui aur usne ek bete ko janm diya. hanna ne uska naam+ shamooel* rakha kyonki usne kaha, “mainne yah beta yahova se maangne par paaya hai.”
21 kuch samay baad elkana apne poore parivar ke saath yahova ke liye saalana balidan chadhane aur apni mannat-bali arpit karne gaya.+
22 magar hanna unke saath nahin gayi.+ usne apne pati se kaha, “jaise hi bachche ka doodh chhoot jaayega, main use lekar yahova ke saamne jaaungi. fir woh hamesha ke liye vahin rahega.”+
23 uske pati elkana ne usse kaha, “theek hai, tujhe jo sahi lage vahi kar. jab tak tu uska doodh nahin chhudati, tu ghar par hi rehna. toone jo kaha hai yahova use poora kare.” isliye woh aurat tab tak ghar par rahi jab tak usne apne bete ka doodh nahin chhudaya.
24 jaise hi hanna ne apne bete ka doodh chhudaya, woh use sheelo le gayi. woh apne saath teen saal ka ek bail, epa-bhar* aata aur ek bada matka daakh-madira bhi le gayi.+ sheelo mein woh apne chhote ladke ko lekar yahova ke bhavan mein gayi.+
25 vahaan unhonne bail halal kiya aur woh ladke ko eli ke paas le gaye.
26 tab hanna ne eli se kaha, “maalik, main shapath khaakaar kehti hoon ki main hi woh aurat hoon jisne yahaan tere saamne khade hokar yahova se prarthna ki thi.+
27 yah vahi ladka hai jiske liye mainne prarthna ki thi. yahova ne meri binti sunkar meri manokamna poori ki.+
28 badle mein ab main apna beta yahova ko de* rahi hoon taaki yah poori zindagi yahova ka hi rahe.”
fir usne* vahaan yahova ke saamne dandvat kiya.
kai footnote
^ ya “ke raamah mein ek joofi.”
^ ya “ko dandvat.”
^ ya “tere man ko kyon bura lag raha hai?”
^ yaani pavitra dere.
^ shaa., “ko yaad kiya.”
^ ya shaayad, “vakt aane par.”
^ matlab “parmeshvar ka naam.”
^ shaa., “udhaar de.”
^ zahir hai ki yahaan elkana ki baat ki gayi hai.
