Yaa niba n bua U Tienu leni bi niteginkaaba n ye i jaanbuoli kuli nni. Tin bani ke U Tienu nua laa niba ki go kubi ba mangidi ti pala. Yaala n bia tie ke bi tiendi mi biadima i jaanbudi yeli po. (Kolinta Yaaba Tilieli 4:3, 4; 11:13-15) Ti yaa cengi i labaali ti yen gba ke i jaanbuoli tiama yen kuani bi yula li koanli nni, o buolu paadima, leni a bila faligidima nni. I moamoani a naa tuona biidi yaaba n bua U Tienu pali.—Cogi mani Matiyu 24:3-5, 11, 12.

I moamoani jaanma kpiagidi U Tienu, ama mi faama jaanma naa tiendi o yanbuama ba. Bi bangidi bi niba yaala n ki ye bibili nni. Bi naa togidi i moamoani U Tienu po leni bi tinkpiba po ba. Ama Jeova bua bi niba n bandi i moamoani o po.—Cogi mani Matiyu 10:28; Timote Tikpiali 2:3-5.

I jaanbuoli yaaba n tua ke bi bua U Tienu, ama ki nan n bua Sutaani ŋanduna yeni, naa tiendi o yanbuama ba. (Jaka 4:4) Bibili yii mi faama jaanma buoli kuli ke “o dieciamu Babilona.” Babilona den tie dogu ke o den ye Nowe yogunu ki tabankinkaaga cuama puoli po. Mi faama jaanma buoli kuli cili o yaa ninni. Ne leni waamu U Tienu ba bolini yaa jaanbuoli n buondi bi niba ki go mabindi bi yeni.—Cogi mani Mi Doagidima 17:1, 2, 5, 16, 17; 18:8.

Ama labaaliŋamu n go ye. Jeova naa sundi yaa ninteginkaaba n ye mi faama jaanma nni po ba. O bangidi-ba i moamaoni ke bi taagi leni i moamoani jaanma niba, yaaba n dagidi leni bi lieba.—Cogi mani Mise 4:2, 5.

Jeova kubi yaa niba n bua i moamoani leni yaaba n tiegi. O kubi ba ki ñani ba mi faamagaanma nni. Yaaba n bua U Tienu yeni tuodi ki ŋa wani kaa bua yaala.—Cogi mani Mi Doagidima 18:4.

Yaala n cili tua Kilisiti niba yogunu, bi niteginkaaba tuo leni li pamanli bi ŋoadikaaba n den togidi yaa labaaliŋamu. Bi lebidi bi yema ki tuo U Tienu yanbuama. Lani n cedi ke bi yema den pia mi fuoma, bi go den bani ke saala ba ti yaa ŋani. Bi tuo u labaaliŋamu ki ŋa Jeova n ga liiga bi yema nni. Bi tie tipo bontogidikaaŋamu.—Cogi mani Tesalonika Yaaba Tikpiali 1:8, 9; 2:13.

Jeova gaani yaa niba n ŋaani mi faama jaanma ki taagi leni o niba yeni. Yi yaa tuo i moamoani jaanma yi ba tua U Tienu danli, ki taani leni yaa niba n bua bi yaba. Yi go ba ti ba yaa miali n kan gbeni.—Cogi mani Maka 10:29, 30; Kolinta Yaaba Tilieli 6:17, 18.

U Tienu n ba ti bolini mi faama jaanma yeni tie labaaliŋamu. Li ba cedi bi niba n faabi bi yula cain. Mi faama jaanma kan go boandi bi niba, ki mabini-ba, bi ki paadi-ba leni bi yaba. Laa yogunu bi niba baa taani leni bi lieba i moamoani jaanma nni ki kpiagi i moamoani Tienu.—Cogi mani Mi Daagidima 18:20, 21; 21:3, 4.