Aliho susu mẹ wẹ yè gán kannuse gando zẹẹmẹ ogbẹ̀ tọn go te, di apajlẹ, a sọgan kanse dọ Naegbọn mí do to gbẹ̀mẹ? kavi Be ogbẹ̀ ṣie do lẹndai de ya? Biblu dohia dọ nuhewutu mí do wá gbẹ̀mẹ wẹ nado tindo haṣinsan họntọnjihẹmẹ tọn de hẹ Jiwheyẹwhe. Mì gbọ mí ni gbadopọnna nugbo dodonu tọn Biblu tọn delẹ he hẹn enẹ họnwun.

•   Jiwheyẹwhe wẹ Mẹdatọ mítọn. Biblu dọmọ: “[Jiwheyẹwhe] wẹ dá mí, podọ etọn wẹ míwlẹ.”—Salmu 100:3; Osọhia 4:11.

•   Jiwheyẹwhe nọ do lẹndai de gando nuhe e dá lẹpo go, kakajẹ mílọsu lẹ ji.—Isaia 45:18.

•   Jiwheyẹwhe dá mí to aliho de mẹ nado nọ mọdọ mí do “nuhudo gbigbọmẹ tọn” lẹ, ehe bẹ ojlo lọ nado yọ́n zẹẹmẹ kavi lẹndai ogbẹ̀ tọn hẹn. (Matiu 5:3) Ewọ jlo dọ mí ni hẹn pẹkọ wá na ojlo enẹ.—Salmu 145:16.

•   Mí nọ hẹn pekọ wá na nuhudo gbigbọmẹ tọn mítọn gbọn vivẹnudido nado jihọntọn hẹ Jiwheyẹwhe dali. Dile etlẹ yindọ mẹdelẹ sọgan nọ lẹndọ e ma yọnbasi paali nado vẹ́ hẹ Jiwheyẹwhe, Biblu na mí tuli dọmọ: “Mì dọnsẹpọ Jiwheyẹwhe, ewọ nasọ dọnsẹpọ mì.”—Jakọbu 4:8; 2:23.

•   Nado lẹzun họntọn Jiwheyẹwhe tọn, mí dona nọ zan gbẹzan mítọn sọgbe hẹ lẹndai he ewọ do bo do dá mí. Biblu do lẹndai ehe hia to Yẹwhehodọtọ 12:13 mẹ: “Gbọ mí ni sè opodo ohó lẹpo pete tọn: Dibusi Jiwheyẹwhe bosọ yìn osẹ́n etọn lẹ: na ehe wẹ azọ́n gbẹtọ lẹpo tọn pete.”—Biblu Wiwe lọ—Gun

•   To sọgodo, mí gán duvivi lẹndai he Jiwheyẹwhe tindo na mí to dowhenu tọn to gigọ́ mẹ, to whenue ewọ na de yajiji sẹ̀ mlẹnmlẹn bo na ogbẹ̀ madopodo họntọn etọn lẹ, yèdọ mẹhe nọ sẹ̀n ẹn lẹ.—Salmu 37:10, 11.