Na nugbo tọn, Jiwheyẹwhe nọ hò devizọnwatọ etọn he to azọ̀njẹ lẹ tọn pọ́n. Nue Biblu dọ gando devizọnwatọ nugbonọ de go die: “Jehovah na hẹn ẹn dote to azọ̀nzàn ji.” (Salmu lẹ 41:3) Eyin a to ahidi hẹ azọ̀n jẹmagbọ de, afọdide atọ̀n he bọdego ehelẹ sọgan gọalọna we:

1.   Biọ huhlọn to odẹ̀ mẹ nado doakọnna. A sọgan mọ “jijọho Jiwheyẹwhe tọn he yiaga hugan nukunnumọjẹnumẹ lẹpo” yí, ehe sọgan de magbọjẹ towe pò bosọ na we huhlọn.—Filipinu lẹ 4:6, 7.

2.   Wleawuna pọndohlan dagbe. Biblu dọ dọ: “Amasin dagbe de wẹ ahun he gọ́ na ayajẹ yin, ṣigba, ayiha he jẹflumẹ nọ hẹnmẹ gbọjọ.” (Howhinwhẹn lẹ 17:22) Plọn nado nọ yìn aslan pẹẹde pẹẹde, na e gán de awubla towe pò bo nasọ wadagbe na agbasalilo towe.

3.   Ze ayiha do todido sọgodo tọn towe ji. Eyin todido towe dolido to ayiha towe mẹ e gán gọalọna we nado tindo ayajẹ mahopọnna azọ̀n jẹmagbọ. (Lomunu lẹ 12:12) Biblu dọ dọdai dọ ojlẹ de na wá bọ “depope to mẹhe nọ nọ̀ aigba lọ ji lẹ mẹ ma na dọmọ: ‘N’to azọ̀njẹ.’” (Isaia 33:24) Jiwheyẹwhe na ko hẹn azọ̀n jẹmagbọ he glo lẹnnunuyọnẹntọ lẹ to egbè lẹpo gbọ. Di apajlẹ, Biblu dọ dọ mẹhomẹ lẹ na lẹzun jọja bo na tindo agbasalilo dagbe whla dopo dogọ: “Gbọ agbasa etọn ni gọjẹ e mẹ hugan jọja whenu tọn; Gbọ e ni lẹgọ do azán huhlọn jọja whenu tọn etọn mẹ.”—Jobu 33:25.

 Ayidonugo: Dile etlẹ yindọ Kunnudetọ Jehovah tọn lẹ nọ kẹalọyi alọgọ he Jiwheyẹwhe nọ namẹ, yé sọ nọ dín nukunpedomẹgo dotowhe tọn na azọ̀n jẹmagbọ. (Malku 2:17) Etomọṣo, mí ma nọ basi ajọjijla na wunmẹ nukunpedomẹgo dotowhe tọn depope; mẹdopodopo wẹ dona basi nudide he gando agbasalilo edetiti tọn go lẹ.