Biblu dohia dọ e ma yin Jiwheyẹwhe wẹ dá Lẹgba. Amọ́, ewọ wẹ dá mẹhe wá lẹzun Lẹgba. Biblu dọ gando Jiwheyẹwhe go dọmọ: “Pipé wẹ azọ́n etọn, aliho etọn lẹpo wẹ nọ do whẹdida dodo hia. Jiwheyẹwhe nugbonọ de wẹ bo ma nọ dawhẹ agọ̀ gbede; dodonọ podọ nugbonọ wẹ ewọ.” (Deutelonomi 32:3-5) Sọgbe hẹ nuhe wefọ ehe dọ, mí sọgan wá tadona lọ kọ̀n dọ Satani Lẹgba ko yin mẹpipe podọ dodonọ to ojlẹ de mẹ wayi, bo tlẹ yin dopo to angẹli he yin visunnu Jiwheyẹwhe tọn lẹ mẹ.

 To Johanu 8:44 mẹ, Jesu dọ dọ Lẹgba “masọ nọ nọte to nugbo mẹ,” ehe dohia dọ Satani ko yin nugbonọ podọ mẹpipe to ojlẹ de mẹ wayi.

 Ṣigba, taidi nudida nuyọnẹntọ Jehovah tọn he pò lẹ, angẹli he wá lẹzun Satani tindo mẹdekannujẹ nado de nuhe yin dagbe kavi oylan. To whenue e de nado yinuwa jẹagọdo Jiwheyẹwhe bo sisẹ́ asu po asi po tintan lọ nado wà nudopolọ, e hẹn ede zun Satani, ehe zẹẹmẹdo “Agọjẹdomẹtọ.”​—Jenẹsisi 3:1-5; Osọhia 12:9.