“Eyin n’tlẹ to zọnlinzin gbọn agbàdo zinvlu gọ́ngọ́n tọn mẹ, n’ma na dibuna owù depope, na hiẹ tin hẹ mi; opò towe po aglọpò towe po nọ vọ́ jide na mi.”—Salmu lẹ 23:4, Lẹdogbedevomẹ Aihọn Yọyọ Tọn.

 “Nugbo, eyin yẹn tlẹ to zọnlinzin gbọn agbàdo zinvlu gọ́ngọ́n tọn ṣẹnṣẹn, yẹn ma obu na di na oylan de: na hiẹ tin to dè e; aglọ towe po opò towe po, yé homẹmiọnna mi.“—Salmu lẹ 23:4, Biblu Wiwe lọ—Gun Alada.

 Jiwheyẹwhe nọ basi-hihọ́na mẹhe nọ sẹ̀n ẹn lẹ bosọ nọ penukundo yé go—etlẹ yin whenue yé to akọndona ninọmẹ sinsinyẹn lẹ. Wefọ lọ yí aliho he mẹ Jehovah nọ penukundo mẹhe nọ sẹ̀n ẹn lẹ go te jlẹdo lehe lẹngbọhọtọ de nọ penukundo lẹngbọ etọn go do. b Yé ma nọ mọ yede to ṣokẹdẹ whenue yé to pipehẹ ninọmẹ he kàn dẹpẹ biọ lẹ he wefọ ehe dlẹnalọdo taidi agbàdo zinvlu gọ́ngọ́n tọn de podọ owù okú tọn. Yé nọ mọ yede to hihọ́ glọ, taidi dọ Jiwheyẹwhe to apá yetọn wẹ nkọ.

 To ojlẹ Biblu tọn mẹ, lẹngbọhọtọ de nọ yí opò kavi aglọpò etọn zan nado basi-hihọ́na lẹngbọ etọn sọn kanlin nuwledutọ lẹ si. E sọ nọ yí aglọpò etọn, enẹ wẹ opò de he nọ dite bosọ nọ há to tónu zan nado deanana lẹngbọ lọ kavi yàn ẹn dolá na owù. Mọdopolọ, Jehovah Jiwheyẹwhe taidi Lẹngbọhọtọ owanyinọ de he nọ basi-hihọ́na mẹhe nọ sẹ̀n lẹ bosọ nọ deanana yé. Etlẹ yin to whenue gbẹ̀mẹ wá dózin do yé, Jehovah nọ penukundo yé go to aliho voovo mẹ.

•   E nọ na yé anademẹ bosọ nọ miọnhomẹna yé gbọn Ohó etọn Biblu gblamẹ.—Lomunu lẹ 15:4.

•   E nọ dotoaina odẹ̀ yetọn lẹ bo nọ na yé jijọho to apọ̀nmẹ podọ to numọtolanmẹ-liho.—Filipinu lẹ 4:6, 7.

•   E nọ yí sinsẹ̀n-basitọ hatọ lẹ zan nado na yé tuli.—Heblu lẹ 10:24, 25.

•   E nọ na yé jide dọ sọgodo na yọ́n taun whenue e na de awugblenamẹnu depope he yé to pipehẹ todin lẹ sẹ̀.—Salmu lẹ 37:29; Osọhia 21:3-5.

 Davidi wẹ kàn Salmu 23tọ, yèdọ mẹhe yin lẹngbọhọtọ de to jọja whenu bo wá lẹzun ahọlu akọta Islaeli tọn to godo mẹ. (1 Samuẹli 17:34, 35; 2 Samuẹli 7:8) Wefọ lọ bẹjẹeji po zẹẹmẹ bibasi gando Jehovah go po taidi Lẹngbọhọtọ he nọ deanana, na núdùdù bosọ nọ fakọna sinsẹ̀n-basitọ etọn lẹ, kẹdẹdile lẹngbọhọtọ paa de nọ wà do.—Salmu lẹ 23:1-3.

 To Salmu lẹ 23:4 mẹ, whenue Davidi to nùzindo hihọ́-basinamẹ Jiwheyẹwhe tọn ji, e masọ yí hogbe lọ (e) zan na Jiwheyẹwhe ba, kakatimọ hogbe lọ (hiẹ) wẹ e yizan. Diọdo kleun ehe dohia dọ Davidi vẹ́ po Jehovah po taun. Davidi yọnẹn dọ Jiwheyẹwhe nọ hò emitọn pọ́n podọ E yọ́n adán he to gbigbò emi lẹ. Enẹwutu, Davidi ma nọ dibuna owù depope.

 To Salmu lẹ 23tọ, wefọ 5 po 6 po mẹ, e diọ nuyijlẹdonugo lọ sọn lẹngbọhọtọ po lẹngbọ etọn po ji bo dọhodo jonọyitọ po jonọ etọn po ji. Taidi jonọyitọ alọtlútọ de, Jehovah yinuwa hẹ Davidi taidi jonọ nukundeji de. Kẹntọ Davidi tọn lẹ ma tlẹ penugo nado glọnalina ẹn nado mọ nukunpedomẹgo Jiwheyẹwhe tọn. To vivọnu salmu lọ tọn, Davidi do jidide etọn hia dọ Jiwheyẹwhe na do dagbewà po owanyi etọn po hia emi na pipotọ gbẹzan emitọn tọn.

 Nuyijlẹdonugo he yin yiyizan to Salmu lẹ sọha 23tọ mẹ basi zẹẹmẹ he dohia dọ nukunpedomẹgo owanyinọ he Jiwheyẹwhe nọ na mẹhe nọ sẹ̀n ẹn lẹ ma na doalọte gbede.—1 Pita 2:25.