“Na Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.”—Johanu 3:16, Lẹdogbedevomẹ Aihọn Yọyọ Tọn.

 “Na Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ, na mẹdepope he yí i sè ma nado dọ̀n, ṣigba e nido tindo ogbẹ̀ madopodo.”—Johanu 3:16, Biblu Wiwe lọ—Gun Alada.

 Jiwheyẹwhe yiwanna mí bo jlo dọ mí ni nọgbẹ̀ kakadoi. Enẹwutu, e do Visunnu etọn, Jesu Klisti, hlan aigba ji. Whenue Jesu to aigba ji fi, azọ́n susu wẹ e wà. Dopo to nuhe e wà lẹ mẹ die, e plọnnu hodotọ etọn lẹ gando Jiwheyẹwhe po Otọ́ etọn po go. (1 Pita 1:3) Onú devo wẹ yindọ, e ze ogbẹ̀ etọn jo bo kú do gbẹtọvi lẹ tamẹ. Whẹpo mí nado mọ ogbẹ̀ madopodo yí, mí dona tindo yise to Jesu mẹ.

 Obá he mẹ Jiwheyẹwhe yiwanna mí jẹ sọawuhia to hogbe ehelẹ mẹ dọ, “e namẹ Visunnu detọ́n dopo akàn etọn.” a Visunnu vonọtaun de wẹ Jesu yin na Jiwheyẹwhe. Gbọnna? Jesu kẹdẹ wẹ Jiwheyẹwhe lọsu dá tlọlọ. (Kolosinu lẹ 1:17) Ewọ wẹ “plọnji nudida lẹpo tọn.” (Kolosinu lẹ 1:15) Nudida he pò lẹpo, yèdọ kakajẹ angẹli devo lẹ ji, wẹ wá aimẹ gbọn Jesu gblamẹ. Etomọṣo, Jehovah b Jiwheyẹwhe yigbe nado do Visunnu vivẹ́ etọn hlan “nado yilizọn namẹ bo ze ogbẹ̀ etọn jo taidi ofligọ de do ota mẹsusu tọn mẹ.” (Matiu 20:28) Jesu jiya bo kú nado fli mí gọ̀ sọn ylando po okú po si, ehe mí dugu etọn sọn dawe tintan lọ, Adam dè.—Lomunu lẹ 5:8, 12.

 Yise didohia to Jesu mẹ bẹ nususu hẹn hugan yíyí ewọ sè kavi gbeyiyi na nuhe e ko wà na mí lẹ poun. Mí nọ do yise mítọn hia eyin mí nọ setonuna Visunnu Jiwheyẹwhe tọn bo nọ yinuwa di ewọ. (Matiu 7:24-27; 1 Pita 2:21) Biblu dọ dọ: “Mẹhe nọ do yise hia to Visunnu lọ mẹ tindo ogbẹ̀ madopodo; mẹhe nọ vẹtolina Visunnu lọ ma na mọ ogbẹ̀.”—Johanu 3:36.

 Jesu dọ ohó enẹlẹ to whenue e to hodọ na nukọntọ sinsẹ̀n Juvi lẹ tọn de he nọ yin Nikodẹmi. (Johanu 3:1, 2) To hodọdopọ enẹ mẹ, Jesu dọ nususu gando Ahọluduta Jiwheyẹwhe tọn c po nado yin “vivọji” po go. (Johanu 3:3) E sọ dọ dọdai gando lee e na kú do go. ‘Visunnu gbẹtọ tọn dona yin zizedaga [yin pipla do pòtin go], na mẹdepope he yise to ewọ mẹ nido sọgan tindo ogbẹ̀ madopodo.’ (Johanu 3:14, 15) Enẹgodo, e zinnudeji dọ Jiwheyẹwhe yiwanna gbẹtọvi lẹ taun wẹ zọ́n bọ e jlo na na yé ogbẹ̀ madopodo. Jesu dotana bo dọ dọ nado mọ ogbẹ̀, mí dona do yise hia bosọ nọ wazọ́n he nọ hẹn homẹhun Jiwheyẹwhe lẹ.—Johanu 3:17-21.