“Yise wẹ yin nukundido dejidego nuhe mí to todo lẹ tọn, yèdọ kunnudenu he họnwun onú tangan he ma yin mimọ lẹ tọn.”—Heblu lẹ 11:1, Lẹdogbedevomẹ Aihọn Yọyọ Tọn.

“ Dinvie yise wẹ dodo onú yè to todo tọn, okunnu onú he mí ma mọ tọn.”—Heblu lẹ 11:1, Biblu Wiwe lọ—Gun Alada.

 Zẹẹmẹ he whete hugan he Owe-wiwe lẹ bayi gando yise go wẹ to wefọ ehe mẹ, wefọ lọ sọ dohia dọ yise tintindo ma yin nado yí nude sè poun.

 “Yise wẹ yin nukundido dejidego nuhe mí to todo lẹ tọn.” To kandai dowhenu tọn Heblu lẹ 11:1 tọn mẹ, hogbe Glekigbe tọn he yin lilẹdo “yise” nọ na linlẹn adọgbigbo, jidide kavi dolilo tọn. Yise enẹ ma nọ sinai do nujlomẹ lẹ ji; “nukundido dejidego” wẹ e yin. Hodidọ Glẹkigbe tọn he yin lilẹdo “nukundido dejidego” a gán sọ yin lilẹdo “jlọjẹ he mẹde do,” bo nọ dlẹnalọdo opà he nọ na jidide kavi adọgbigbo mẹhe do jlọjẹ lọ.

 “Yise wẹ . . . kunnudenu he họnwun [kavi, “kunnudenu he dutomẹji,” nudọnamẹ odò tọn] onú tangan he ma yin mimọ lẹ tọn.” Yè nọ do yise eyin kunnudenu he dutomẹji lẹ tin. Kunnudenu enẹlẹ nọ sinyẹn sọmọ bọ eyin mẹde ma tlẹ mọ nude nukun sọ nukun, e nọ yọnẹn dọ e tin nugbo.

 Owe Biblu tọn he nọ yin Heblu lẹ yin wekanhlanmẹ de he apọsteli Paulu kàn sẹdo Klistiani owhe kanweko tintan tọn he nọ nọ̀ Jelusalẹm po lẹdo etọn po mẹ lẹ. Lehe yise yin nujọnu do sọ ji wẹ Paulu dọhodo to adà wekanhlanmẹ lọ tọn ehe mẹ. Di apajlẹ, e kàn dọ: “Matin yise, e ma yọnbasi nado hẹn homẹ Jiwheyẹwhe tọn hùn ganji, na mẹhe to dindọnsẹpọ ẹ dona yise dọ ewọ tin podọ ewọ wẹ ahọsumẹtọ mẹhe to dindin in vẹkuvẹku lẹ tọn.” (Heblu lẹ 11:6) Whenue Paulu ko bayi zẹẹmẹ yise tọn to Heblu lẹ 11:1 mẹ godo, e wá na apajlẹ sunnu po yọnnu delẹ po tọn he do jẹhẹnu ehe hia to Biblu mẹ. E dọ lehe yé do yise hia bo yinuwa sọgbe hẹ ojlo Jiwheyẹwhe tọn do.—Heblu lẹ 11:4-38.