“Enẹwutu, mì nọ whiwhẹ mìde to alọ huhlọnnọ Jiwheyẹwhe tọn glọ, na ewọ nido ze mì daga to ojlẹ sisọ mẹ, dile mì to magbọjẹ mìtọn lẹpo bẹ dlan ewọ ji, na e to mìtọn hòpọn wutu.”—1 Pita 5:6, 7, Lẹdogbedevomẹ Aihọn Yọyọ Tọn.

 “Enẹwutu, mì whiwhẹ mìde to alọ gángán Jiwheyẹwhe tọn glọ, na ewọ nido ze mì daga to ojlẹ etọn mẹ: mì bẹ magbọjẹ mìtọn lẹpo do alọ etọn mẹ; na ewọ to tukla mìtọn jẹ wutu.”—1 Pita 5:6, 7, Biblu Wiwe lọ—Gun Alada.

 Sọgbe hẹ hogbe ehelẹ, apọsteli Pita hẹn Klistiani lẹ deji dọ, yé gán yí jidide do hodẹ̀ hlan Jiwheyẹwhe gando nuhahun po ahunmẹdunamẹnu yetọn lẹ po go. Jiwheyẹwhe nọ do nukundagbe hia whiwhẹnọ lẹ, podọ e nasọ dona yé susugege.

 “Mì nọ whiwhẹ mìde to alọ huhlọnnọ lọ . . . glọ.” To Biblu mẹ, alọ Jiwheyẹwhe tọn nọ saba dlẹnalọdo huhlọn etọn nado whlẹnmẹ podọ nado basi hihọ́namẹ. (Eksọdusi 3:19; Deutelonomi 26:8; Ẹzla 8:22) Eyin Klistiani lẹ nọ ganjẹ Jiwheyẹwhe go, yé nọ dohia dọ emi whiwhẹ emide to alọ etọn glọ. Yé nọ yọ́n dogbó yetọn lẹ, bo nọ kẹalọyi dọ emi ma gán duto whlepọn lẹ ji na emide. (Howhinwhẹn lẹ 3:5, 6; Filipinu lẹ 4:13) Yé nọ deji dọ Jiwheyẹwhe tindo huhlọn nado yinuwa do ota yetọn mẹ to ojlẹ he sọgbe mẹ podọ to aliho he yọ́n hugan mẹ.—Isaia 41:10.

 “Na ewọ nido ze mì daga to ojlẹ sisọ mẹ.” Mẹhe nọ yí homẹfa do doakọnna whlepọn lẹ gán deji dọ Jiwheyẹwhe na ze yé daga kavi dona yé. Ewọ ma na dike sinsẹ̀n-basitọ etọn lẹ ni yin whiwhlepọn kakadoi kavi zẹ̀ nuhe yé sọgan doakọnna go. (1 Kọlintinu lẹ 10:13) Kakatimọ, eyin yé zindonukọn nado to nudagbe lẹ wà, ayihaawe ma tin dọ Jiwheyẹwhe na dona yé “to ojlẹ sisọ mẹ.”—Galatianu lẹ 6:9.

 “Dile mì to magbọjẹ mìtọn lẹpo bẹ dlan ewọ ji, na e to mìtọn hòpọn wutu.” Klistiani lẹ gán bẹ kavi ze magbọjẹ yetọn lẹpo dlan Jiwheyẹwhe ji, gbọn whiwhẹ yíyí do hodẹ̀ hlan ewọ dali. Owe alọdlẹndonu tọn de basi zẹẹmẹ dọmọ: “Hogbe lọ nado zedlan nọ saba zẹẹmẹdo nado dovivẹnu bo ze nude dlan sọn míde go. E nọ zẹẹmẹdo nuhe yè desọn ojlo mẹ do wà de.” Eyin Klistiani de ze magbọjẹ etọn lẹ dlan Jiwheyẹwhe ji, nuhihà etọn lẹ gán depò bọ e na wá tindo numimọ nuhe Biblu ylọ dọ “jijọho Jiwheyẹwhe tọn” tọn. (Filipinu lẹ 4:6, 7) E gán deji dọ Jiwheyẹwhe jlo na gọalọna emi, na e yọnẹn dọ Jiwheyẹwhe nọ hò emitọn pọ́n bo sọgan yí huhlọn madodogbó etọn do penukundo emi go.—Salmu lẹ 37:5; 55:22.

 Weta 5​tọ wẹ fó wekanhlanmẹ he apọsteli Pita kàn hlan Klistiani lẹ. (1 Pita 1:1) Hodotọ Klisti tọn hohowhenu tọn lẹ pehẹ whlepọn voovo he whlé yise yetọn pọ́n bo gán ko do magbọjẹ na yé lẹ, dile e yindo na Klistiani lẹ to egbehe. (1 Pita 1:6, 7) Na Pita mọnukunnujẹ nuhahun yetọn lẹ mẹ wutu, e kàn wekanhlanmẹ de he whànmẹ bosọ na tulimẹ de to nudi 62-64 W.M.—1 Pita 5:12.

 Pita dotana wekanhlanmẹ etọn gbọn nuflinmẹ tulinamẹ tọn de nina mẹhe to pipehẹ whlepọn yise tọn lẹ dali. Eyin yé yin whiwhẹnọ bo ganjẹ Jiwheyẹwhe go, yé gán deji dọ Jiwheyẹwhe na gọalọna emi nado nọtegli. (1 Pita 5:5-10) Hogbe Pita tọn lẹ gán na tuli Klistiani he to pipehẹ homẹkẹn to egbehe lẹ ga.

 Pọ́n video kleun ehe nado mọ nue to owe 1 Pita tọn mẹ delẹ.