Brooke yin Kunnudetọ Jehovah tọn de he nọ nọ̀ États-Unis. To azọ̀n bẹplamẹ COVID-19 tọn whenu, e nọ dekunnu gbọn wekanhlanmẹ gblamẹ. Na nugbo tọn, Brooke nọ kàn wekanhlanmẹ susu to osẹ dopodopo mẹ. Amọ́ to owhe dopo daa godo, e jẹ gbigbọjọ ji. Kakajẹ whenẹnu, omẹ dopo gee wẹ na gblọndo na wekanhlanmẹ etọn bo dọna ẹn dọ ni masọ kanwehlan emi gbede ba blo. Brooke do ayihaawe bo mọdọ vivẹnudido emitọn lẹ ma diọ onú kaka de.

 Amọ́ to nukọn mẹ, Kim yèdọ Kunnudetọ hatọ de he nọ wazọ́n to akuẹsẹdotẹn de dọhona Brooke gando hodọdopọ he e tindo hẹ ahisinọ de go. Ahisinọ lọ dọna Kim dọ emi mọ wekanhlanmẹ he yè yí alọ do kàn de yí sọn Kunnudetọ Jehovah tọn de dè. Dile e wá họnwun do, wekanhlanmẹ he e mọyi sọn Brooke dè hodọ wẹ e te! To osẹ he bọdego mẹ, ahisinọ lọ lẹkọyi akuẹsẹdotẹn lọ. Dile e to hodọna Kim, e kanse e eyin emi sọgan yì opli agun tọn lẹ, he nọ yin bibasi gbọn kanji.

 Ojlẹ vude to enẹgodo, David yèdọ Kunnudetọ devo dọhona Brooke gando azọ́nwatọgbẹ́ de go, he mọ dopo to wekanhlanmẹ etọn lẹ mẹ yí. Nuhe yinuwado azọ́nwatọgbẹ́ ehe ji taun wẹ yindọ alọ wẹ yè yí do kàn wekanhlanmẹ lọ. E dọmọ: “E na yọ́n taun eyin mẹsusu lẹ gán nọ do ojlo hia to mẹdevo lẹ mẹ to aliho enẹ mẹ.” David yí dotẹnmẹ hundote ehe zan nado dekunnu na ẹn dogọ bosọ dopà nado hẹn owe de wá na ẹn, podọ homẹ dawe lọ tọn hùn nado kẹalọyi.

 Kunnudetọ Jehovah tọn lẹ yọnẹn dọ yé gán nọma yọ́n whenue okún he yé do to lizọnyizọn lọ mẹ de na tọ́nkun. (Yẹwhehodọtọ 11:5, 6) Etomọṣo, numimọ Brooke tọn gọalọna ẹn nado sọ vọ́ yọ́n pinpẹn adà he yiwà e te to lizọnyizọn Klistiani tọn lọ mẹ tọn dogọ.—1 Kọlintinu lẹ 3:6.