Irma, nọ nọ̀ Allemagne bo ko dibla tindo owhe 90. Na e basi asidan sinsinyẹn whla awe bọ doto lẹ ko wazọ́n mẹzizẹ tọn na ẹn whlasusu wutu, e ma sọgan nọ dekunnu sọn whédegbè jẹ whédegbè dile e nọ wà do dai ba. Irma nọ dọhona mẹdevo lẹ gando nuyise etọn go gbọn wekinkan hlan hẹnnumẹ po mẹyinyọnẹn etọn lẹ po dali. Mẹsusu nọ yiwanna wekanhlanmẹ tulinamẹ po miọnhomẹnamẹ po tọn Irma tọn lẹ sọmọ bọ yé nọ ylọ ẹ nado yọ́n whenue yé na mọ wekanhlanmẹ devo yí. E sọ nọ mọ wekanhlanmẹ pẹdido tọn susu he mẹ yè nọ to bibiọ to e si nado vọ́ kanwe hlan yé te. Irma dọ dọ, “Ehe lẹpo nọ hẹn ayajẹ wá na mi bo nọ na mi dotẹnmẹ nado to yẹwhehodọ zọnmii.”

 Irma sọ nọ do wekanhlanmẹ hlan mẹhomẹ he yin ginglọn do whégbè lẹ. E dọmọ: “Nawe de ylọ mi to alokan ji bo dọ dọ wekanhlanmẹ ṣie lẹ ko miọnhomẹna emi taun to whenue asu emitọn kú. E ze wekanhlanmẹ lọ do Biblu etọn mẹ bo nọ saba hia ẹ to whèjai lẹ. Nawe devo, he asu etọn kú to agọe dọ dọ, wekanhlanmẹ ṣie lẹ ko gọalọna emi taun hugan yẹwhehodidọ sinsẹ̀ngán lẹ tọn. Nawe lọ tindo kanbiọ susu he e jlo na mọ gblọndo na bo kanse eyin emi sọgan wá dè e.”

 Mẹyinyọnẹn Irma tọn he ma yin Kunnudetọ de he sẹtẹn yì fidindẹn biọ to e si dọ ni kanwehlan emi. Irma dọmọ: “Nawe lọ nọ sẹ̀ wekanhlanmẹ ṣie lẹpo do. To whenue e kú godo, viyọnnu etọn ylọ mi bo dọna mi dọ emi hia wekanhlanmẹ he n’dohlan onọ̀ emitọn lẹpo bo kanbiọ eyin n’gán do homẹdagbe hia emi bo nọ do wekanhlanmẹ sinai do Biblu ji lẹ hlan emi lọsu.”

 Irma nọ duvivi lizọnyizọn etọn tọn taun. E dọmọ: “N’to Jehovah vẹ̀ dọ ni to huhlọn na mi zọnmii nado sẹ̀n ewọ. Dile etlẹ yindọ n’ma sọgan nọ yì sọn whédegbè jẹ whédegbè ba, n’nọ wà nuhe go n’pé.”