Ong-li yin dopo to Kunnudetọ Jehovah tọn lẹ mẹ to Bulgarie. E nọ plọn Biblu hẹ yọnnu jọja de he nọ yin Zlatka, mẹhe asu etọn ma nọ plọnnu hẹ yé. Ong-li dọmọ: “To whenue mí to hodọdo gbẹzan whẹndo tọn ji, n’zinnudeji dọ nujọnu wẹ e yin nado nọ dọna alọwlemẹ mítọn po ovi mítọn lẹ po dọ mí yiwanna yé. Zlatka pọ́n mi po awubla po, bo dọ dọ n’ma ko dọna asu ṣie po viyọnnu owhe ṣinẹnẹ-mẹvi ṣie po pọ́n dọ n’yiwanna yé!”

 Zlatka basi zẹẹmẹ dọ, “N’gán wà nulẹpo na yé, amọ́ n’ma sọgan dọ hogbe enẹlẹ na yé.” Podọ e yidogọ dọ, “Onọ̀ ṣie ma dọna mi pọ́n dọ emi yiwanna mi, podọ onọ̀-daho ṣie lọsu ma dọna onọ̀ ṣie pọ́n dọ emi yiwanna ẹn.” Ong-li dohia Zlatka sọn Biblu mẹ dọ Jehovah dọna Jesu tlọlọ dọ emi yiwanna ẹn. (Matiu 3:17) E na tuli Zlatka nado hodẹ̀ hlan Jehovah gando whẹho lọ go bo yí do basi yanwle nado dọna asu etọn po viyọnnu etọn po dọ emi yiwanna yé.

 Ong-li dọmọ: “To azán awe godo, Zlatka dọna mi po ayajẹ po dọ emi ko hodẹ̀ hlan Jehovah nado biọ alọgọ. Whenue asu etọn lẹkọwa whégbè, e dọna ẹn dọ emi plọn to Biblu pinplọn emitọn whenu dọ nujọnu wẹ e yin na asi lẹ nado yiwanna asu yetọn bo nọ do sisi hia yé. Enẹgodo, e yí agbọ́ vude, bo dọna asu etọn dọ emi yiwanna ẹn taun! To whenue viyọnnu etọn lẹkọwa whégbè, Zlatka gbò e fán bo dọna ẹn dọ emi yiwanna ẹn! Zlatka dọna mi dọmọ: ‘Todin n’mọ kọgbọ taun. Sọn owhe susu die, n’ma nọ dọ numọtolanmẹ ṣie tọ́n, amọ́ po alọgọ Jehovah tọn po, n’wá penugo nado dọna whẹndo ṣie dọ n’yiwanna yé.’

 Ong-li zindonukọn dọmọ: “N’dukosọna asu Zlatka tọn bọ e dọna mi dọ, ‘Mẹsusu ko dọna mi dọ Zlatka ni ma plọn Biblu hẹ we blo, amọ́ ayihaawe ma tin Biblu pinplọn etọn ko hẹn ale wá na whẹndo mítọn. Todin mí vẹ́ dogọ bosọ tindo ayajẹ to whẹndo mítọn mẹ.’”