N’whẹ́n to lẹdo tòdaho Montréal tọn he gbọgbé de mẹ. Whenue n’do osun ṣidopo, otọ́ ṣie kú, bọ onọ̀ ṣie kẹdẹ dona penukundo whédo lọ blebu go. Ovi ṣinatọ̀n wẹ mẹjitọ ṣie lẹ ji, podọ yẹn wẹ yin pòdevi lọ.

Sọn ovu whenu gbọ́n wẹ amasin adínọ nùnù, akọ̀hiho, danuwiwa, gọna gbẹdido hẹ sẹ́nhẹngbatọ lẹ ko lẹzun apadewhe gbẹzan ṣie tọn. Whenue n’do owhe ao wẹ n’jẹ lizọnyi ji na galọtọ lẹ gọna akuẹyànnamẹtọ he nọ hòmẹdu lẹ. N’nọ saba dolalo bọ e sọ nọ vivi na mi nado sẹ̀ ajì do hòmẹdu to aliho depope he e biọ mẹ. Nude wẹ he nọ hẹn awuvivi wá na mi taun.

To whenue n’do owhe 14, n’wá bikan taun to ajì sisẹ̀ nado nọ hòmẹdu mẹ. Di apajlẹ, n’gán họ̀ núzinzan susugege he yè ma yí sika akú do basi lẹ, vlavo alọkọ-gàn, kọnú po alọkẹ lẹ po, bo yí azọ́nwanu ogànnọ de do dó wuntùn yé go nado do yé hia di núzinzan sika akú tọn akuẹ vivẹnu lẹ, enẹgodo n’nọ sà yé to ali ji podọ to húnglintẹn nusatẹn dahodaho lẹ tọn. Akuẹ susu mimọ to aliho he bọawu mọnkọ mẹ nọ vivi na mi taun. To ojlẹ de mẹ, akuẹ he n’mọ to gbèdopo gbẹ́ yì dọla Canada tọn 10 000, yèdọ nudi 4 712 627F CFA!

Whenue n’do owhe 15 bo yin yinyàn sọn wehọ he mẹ yè nọ gọalọna nuylankan-watọ lẹ nado diọ jijọ te, n’ma do fie n’na nọ dọ́ ba. Enẹwutu, n’nọ dọ́ alipá, whẹ̀nọtẹn lẹ, kavi owhé mẹhe n’nọ dogbẹ́ hẹ delẹ tọn gbè.

Na nuwiwa mẹhodu tọn lẹ mẹ janwẹ n’nọ doalọ te wutu, ponọ lẹ nọ to gómẹ na mi whẹwhẹ. N’ma ka yin wiwle sú do gànmẹ pọ́n, na nuhe n’nọ sà lẹ ma yin nufìnfìn wutu. Amọ́, yé nọ gbò akuẹ susu na mi nado sú, na mẹhodu, ajọnu oklọ tọn gọna ajọwiwa matin gbedewema yíyí wutu. Na n’ma nọ dibuna nudepope-nọ wutu, n’nọ yì ṣinyan akuẹ na akuẹyànnamẹtọ he nọ hòmẹdu lẹ sọn mẹhe yé yànkuẹ na lẹ si. Owùnu de wẹ, podọ whedelẹnu n’nọ hẹn osò do apá. To ojlẹ delẹ mẹ, n’kọnawudopọ to nuwiwa sẹ́nhẹngba tọn lẹ mẹ.

Owhe 17 poun wẹ n’do whla tintan he n’sèhó gando Biblu go. To ojlẹ lọ mẹ, họntọn ṣie yọnnu he po yẹn po nọ nọ̀ ohọ̀ dopolọ mẹ wẹ jẹ Biblu plọn ji hẹ Kunnudetọ Jehovah tọn lẹ. Amọ́, n’jẹagọdo osẹ́n he Biblu do gando walọyizan go lẹ, enẹwutu n’tlọ́n apá na ẹn, bo yì jẹpọ hẹ yọnnu devo he n’tlẹ ko to tintọ́n hẹ dai de.

Nuhe wá yinuwado ji e wẹ whenue yọnnu awetọ he n’to tintọ́n hẹ lọ lọsu jẹ nuplọn ji hẹ Kunnudetọ lẹ! Aliho gbẹninọ tọn etọn diọ, podọ e jiawu na mi nado mọdọ e lẹzun gbetọ walọmimiọnnọ bosọ nọ fahomẹ taun. N’siọ oylọ-basinamẹ lọ nado wá opli Kunnudetọ Jehovah tọn lẹ tọn de to Plitẹnhọ Ahọluduta tọn mẹ. Gbẹtọ jijọ dagbenọ podọ homẹdagbenọ he to finẹ lẹ dokuavọna mi. E gbọnvo taun na mẹhe ṣẹnṣẹn n’ko gbọn lẹ! N’ma nọ do numọtolanmẹ lọ gbede dọ n’yin nude na whẹndo ṣie; na sọn ovu whenu ṣie gbọ́n wẹ n’mọdọ n’jẹdò owanyi sisosiso po awuvẹmẹ po tọn. Mẹdọndogo he n’duvivi etọn to Kunnudetọ Jehovah tọn lẹ dè wẹ yin nuhe sin hudo n’do lọ pẹẹ. Whenue Kunnudetọ lẹ biọ nado plọn Biblu hẹ mi, po homẹhunhun po wẹ n’kẹalọyi.

Nuhe n’jẹ pinplọn ji sọn Biblu mẹ lẹ wẹ na ko zọ́n bọ n’pò togbẹ̀. N’ko to tito basi dai hẹ hagbẹ ṣie awe delẹ nado yì jẹajo to fide, nado suahọ he n’dù to akọ̀hotẹn lẹ, ehe hugan dọla 50 000, yèdọ nudi 23 580 760F CFA. Amọ́, n’dopẹ́ taun dọ n’ma kọnawudopọ hẹ yé ba! Hagbẹ ṣie dai tọn lọ lẹ uwọ gbẹ́ yì ajo lọ gbé. Dopo to yé mẹ yin wiwle bọ omẹ awetọ yin hùhù.

Dile n’zindonukọn nado to Biblu plọn wẹ n’wá mọdọ n’dona basi diọdo susu lẹ. Di apajlẹ, n’plọn nuhe Biblu dọ to 1 Kọlintinu lẹ 6:10 mẹ dọmọ: “Ajotọ lẹ, nukunkẹnnọ lẹ, ahànnumunọ lẹ, mẹvlẹtọ lẹ po alọslonamẹtọ lẹ po ma na dugu Ahọluduta Jiwheyẹwhe tọn.” Whenue n’hia wefọ enẹ, bo mọ obá he mẹ ninọmẹ ṣie ylan taun jẹ, dasin wayi do mi. N’mọdọ gbẹzan ṣie pete wẹ n’dona diọ. (Lomunu lẹ 12:2) N’nọ wadanu dai bo ylanhùn taun, bosọ nọ to lalodo poun.

Ṣigba, dile n’to Biblu plọn n’wá mọdọ Jehovah yin lẹblanunọ bo nọ jonamẹ. (Isaia 1:18) N’hodẹ̀ vivẹvivẹ bo biọ alọgọ Jehovah tọn nado duto jijọ ṣie hoho tọn lẹ ji. E sọ gọalọna mi bọ vudevude n’penugo nado diọ gbẹtọ-yinyin ṣie. Afọdide titengbe devo he n’sọ ze wẹ yindọ yẹn po họntọn yọnnu ṣie po basi kandai alọwle mítọn tọn to ahọluwhé.

Owhe 24 wẹ n’do bo wlealọ bo ko tindo ovi atọ̀n. Todin, n’dona mọ agbasazọ́n de he sọgbe hẹ osẹ́n. Amọ́, n’ma plọnwe kaka de, bo masọ yọ́n fihe n’na lẹhlan. Enẹwutu, n’sọ vọ́ hodẹ̀ vivẹ́ hlan Jehovah. Enẹgodo, n’yì dín azọ́n. N’nọ dọna mẹhe dè n’yì dín azọ́n te lẹ dọ n’jlo na diọ gbẹzan ṣie, bo na nọ yin nugbonọ to azọ́n lọ kọ̀n. To whedelẹnu, n’nọ hẹn ẹn họnwun na yé dọ n’ko to Biblu plọn bọ ojlo ṣie wẹ nado lẹzun tòvi dagbe de. Azọ́ngán susu wẹ gbẹ́ nado yí mi. To godo mẹ, to hokansemẹ azọ́n dindin tọn devo de whenu, n’dọ nuhe mẹ n’ko jugbọn wayi lẹpo na mẹhe to hokanse mi lọ bọ e dọna mi dọ: “N’ma yọ́n nuhewutu wẹ, amọ́ nude to didọ na mi dọ ma yí we.” N’kudeji dọ odẹ̀ he n’hò lẹ wẹ mọ gblọndo. To ojlẹ de godo, yẹn po asi ṣie po yí baptẹm bo lẹzun Kunnudetọ Jehovah tọn lẹ.

Eyin n’togbẹ̀ to egbehe, nunọwhinnusẹ́n Biblu tọn lẹ he n’yí do yizan mẹ bosọ nọgbẹ̀ di Klistiani de wẹ zọ́n. N’tindo whẹndo ayajẹnọ de. Na n’kudeji dọ Jehovah ko jona mi wutu, n’tindo ayihadawhẹnamẹnu wiwe de.

To owhe 14 he wayi lẹ mẹ, n’yí dee zan to sinsẹ̀nzọn whenu-gigọ́ tọn mẹ, bo ko gọalọna mẹdevo lẹ nado yọ́n nuhe Biblu plọnmẹ lẹ, podọ to agọe asi ṣie hòpodona mi to sinsẹ̀nzọn whenu-gigọ́ tọn mẹ. To owhe 30 he wayi lẹ gblamẹ, homẹ ṣie hùn dọ n’gọalọna azọ́nwatọgbẹ́ ṣie 22 nado jẹ Jehovah sẹ̀n ji. N’gbẹ́ nọ yì nusatẹn dahodaho lẹ nukọn—amọ́ e ma yin nado hòmẹdu ba dile n’nọ wà do dai. Todin, eyin n’yì dọ́n, n’nọ saba dọhona mẹdevo lẹ gando nuyise ṣie lẹ go. Ojlo ṣie wẹ nado na yé nude, enẹ wẹ: todido lọ nado nọgbẹ̀ to aihọn yọyọ sọgodo tọn de mẹ, fihe mẹhodutọ lẹ ma na tin te.—Salmu lẹ 37:10, 11.