N’yin jiji bo yin pinplọn whẹ́n to lẹdo Rome tọn de mẹ, fie azọ́nwatọ he yin wamọnọ lẹ nọ nọ̀. Gbẹninọ to finẹ ma fá paali. N’ma yọ́n onọ̀ he ji mi taun, mọ yẹn po otọ́ ṣie po ma nọ jẹpọ. Sọn ovu wẹ ko lẹzun gbévun de bo nọ to dindan gbọn wlomẹwlomẹ.

Owhe ao poun wẹ n’do bo jẹ ajojẹ ji. Whenue n’do owhe 12 wẹ n’họ̀njẹgbé whla tintan. Whla de-deji wẹ otọ́ ṣie ko wá plan mi sọn ponọ-pámẹ yì whégbè. N’nọ to adọ̀n dọ̀n hẹ mẹlẹ mapote—n’nọ wadanu bosọ nọ duadi taun do mẹlẹpo go. Whenue n’do owhe 14, n’wá họ̀njẹgbé pete. N’jẹ amasin adínọ zan ji bosọ lẹzun dọ́gbé. Na n’masọ do adọtẹn de wutu, n’nọ gbà ohọ̀n mọto lẹ tọn, bo nọ dọ́ yé mẹ jẹ zánfinfọ́n fuu. Enẹgodo n’nọ dín fie osin te de mọ nado fún nukunmẹ bo klọ gèkọ.

N’wá bikan to ajojijẹ mẹ taun—bo nọ gbì saki yí sọn mẹlẹ si bosọ nọ gbò adó biọ owhé pẹvi po daho lẹ po gbè to zánmẹ. Mẹsusu jẹ yinyọ́n mí ji di jẹ́ngbẹn de, podọ e ma dẹn bọ n’yin hinhẹn biọ jaguda-gbẹ́ he diyin de mẹ, ehe zọ́n bọ n’wá jẹ akuẹsẹdotẹn lẹ gbà ji. Na n’nọ ylanhùn taun wutu, n’lẹzun mẹhe yè nọ na sisi de to jaguda-gbẹ́ lọ mẹ to ojlẹ kleun de godo. N’ma nọ tọ́n gbede matin osò ṣie; na nugbo tọn, kọ̀donu glọ wẹ e nọ te na mi eyin n’to amlọndọ. Danuwiwa, amasin adínọ zinzan, ajojijẹ, hogbe agbàagba lẹ zinzan, po fẹnnuwiwa po kẹdẹ wẹ n’wá pò na. Ponọ lẹ nọ to gómẹ na mi mapote. Whlasusu wẹ yé wle mi do gànmẹ; podọ na owhe lẹ eyin n’sẹ̀ngàn bo tọ́n, ojlẹ vude godo yé sọ nọ gọ̀ mi wle sú.

To gbèdopo he yè jo mi sọn gànpamẹ, n’bayi dide nado disa yì pọ́n nafẹ ṣie de. N’ma yọnẹn gbede dọ nafẹ ṣie po awe to ovi etọn lẹ mẹ po ko lẹzun Kunnudetọ Jehovah tọn. Yé basi oylọna mi nado wá opli Kunnudetọ lẹ tọn de. Na n’jlo na dín tlintlindo wutu, n’de nado hodo yé yì opli lọ. Whenue mí jẹ Plitẹnhọ Ahọluduta tọn lọ mẹ, n’tẹkudeji dọ oján he sẹpọ ohọ̀n lọ ji wẹ n’na sinai do, na nukun ṣie nido to mẹhe na biọ họmẹ po mẹhe na tọ́n lẹ po ji. Nado dọ hójọhó, osó ṣie to apò mẹ na mi.

Opli enẹ diọ gbẹzan ṣie. N’flindọ e taidi na mi dọ ogbẹ̀ devo pete mẹ wẹ n’te nkọ. Mẹhe dọnudo mi lẹpo wẹ jọmẹ, bọ nukiko yetọn sọ dọnmẹ. N’ma gán wọn homẹdagbe po ahundopo he Kunnudetọ lẹ yí do dokuavọna mi po gbede, na e sọawuhia to nukunta yetọn. Nue nukun ṣie mọ to gbenẹgbe gbọnvo pete na nue n’nọ mọ to fie n’nọ gbọn lẹ!

N’jẹ Biblu plọn ji hẹ Kunnudetọ lẹ. Lehe n’to nuplọn sọ, mọ wẹ e to wunhọ́n na mi dogọ dọ n’dona diọ aliho gbẹninọ tọn ṣie mlẹnmlẹn do niyẹn. Nuhe Howhinwhẹn lẹ 13:20 dọ yinuwado ji e sisosiso, he dọmọ: “Mẹhe nọ zinzọnlin hẹ nuyọnẹntọ na yọnnuin, ṣigba, mẹhe nọ dogbẹ́ hẹ nulunọ ma na tindo kọdetọn dagbe.” N’wá mọdọ n’dona tọ́n sọn jaguda-gbẹ́ he mẹ n’te lọ mẹ. Enẹ wiwà ma bọawu paali, amọ́ Jehovah gọalọ bọ e pà mi.

N’sọ vọ́ awusọhia ṣie jlado. N’dovivẹnu susu bo jo siga nùnù po amasin adínọ zinzan po do. N’pà oda he dite to ota na mi lọ pò, jo tómẹnu dido dó, bosọ doalọtena hogbe agbàagba lẹ. Todin, n’penugo whla tintan to gbẹzan ṣie mẹ nado nọ duto dee ji.

N’ma ko yiwanna wehihia po wepinplọn po gbede dai, enẹwutu avùnnukundiọsọmẹnu daho wẹ e yin na mi nado nọ ze ayiha do fidopo bo plọn Biblu po sọwhiwhe po. Amọ́, n’vánkan dego, podọ vudevude n’wá yiwanna Jehovah, bọ nude jẹ didiọ ji to ohò ṣie mẹ—ayihadawhẹnamẹnu ṣie jẹ tuklado mi ji. N’nọ saba tindo numọtolanmẹ agọ̀ lẹ gando dee go, bo nọ do ayihaawe eyin Jehovah gán jo nuylankan he n’ko wà lẹpo na mi. To ojlẹ mọnkọ lẹ mẹ, n’nọ mọ homẹmimiọn yí taun, eyin n’hia kandai lehe Jehovah jona Ahọlu Davidi do tọn to whenue e waylando sinsinyẹn lẹ godo.—2 Samuẹli 11:1–12:13.

Nudevo he kàn dẹpẹ biọ wẹ hodidọ na mẹdevo lẹ gando nuyise ṣie lẹ go to lizọnyizọn họndekọn jẹ họndekọn tọn mẹ. (Matiu 28:19, 20) N’nọ hanú sinsinyẹn dọ n’gán wá tọ́n jẹ mẹhe go n’ko wadanu do kavi gbleawuna to aliho de kavi devo mẹ wayi lẹ ji! Ṣigba vudevude, n’penugo nado duto nue nọ dobuna mi lẹ ji. N’nọ gọalọna mẹdevo lẹ todin nado plọnnu gando Otọ́ owanyinọ olọn mẹ tọn mítọn go, mẹhe nọ jonamẹ susugege, podọ n’to vivi ayajẹ nujọnu tọn he enẹ nọ hẹnwa tọn dù.

Nupinplọn gando Jehovah go whlẹn ogbẹ̀ ṣie! Susu to hagbẹ ṣie dai tọn lẹ mẹ wẹ ko kú kavi to gànpamẹ, amọ́ gbẹzan yẹn tọn gọ́ na ayajẹ nujọnu tọn bọ n’sọ tindo todido de hlan sọgodo. N’ko plọn nado nọ do whiwhẹ hia, nado nọ setonu, podọ nado nọ dava homẹgble sinsinyẹn ṣie. Taidi kọdetọn de, n’nọ do haṣinṣan dagbe hẹ mẹhe lẹdo mi lẹ. N’sọ to vivi alọwle ayajẹnọ de tọn dù hẹ asi whanpẹnọ ṣie Carmen. Mí omẹ awe lẹ nọ mọ awuvivi susu dile mí to alọgọna mẹdevo nado plọn Biblu.

Etẹ nkọ! N’nọ yin nugbonọ to azọ́n he wà n’te kọ̀n todin—bọ to whedelẹnu, n’tlẹ nọ yì akuẹsẹdotẹn lẹ, amọ́ e ma yin nado jẹajo, kakatimọ nado hẹn yé do wiweji wẹ!