Jipa Edẹni Tọn—Be Finẹ Wẹ Gbẹtọvi lẹ Nọ to Bẹjẹeji Ya?

YÍ NUKUN homẹ tọn do mọ dewe hlan jipa de mẹ, fihe ayihafẹsẹnamẹnu depope ma te bọ zingidi he nọ yin sisè to tòhomẹ etlẹ yin sọn olá depope ma tin te ga. Jipa lọ gblò taun, bọ nudepope ma gán hẹn jijọho he to e mẹ gble. Humọ, a vò sọn ayiha mẹ bo ma do lẹnpọn de, mọ awutu, azọ̀n ṣẹ́nṣẹ́n kavi awufiẹsa depope ma to tukladona we to agbasa mẹ. Awutugonu towe lẹ togbẹ̀, ehe zọ́n bọ a to vivi nuhe lẹdo we lẹpo tọn dù.

Jẹnukọn whẹ́, a yí nukun towe do blẹ sinmẹ vounvoun whanpẹnọ lẹ tọn pọ́n, enẹgodo a pọ́n osin tọ̀sisa de tọn lẹ he to sisẹ́, podọ a mọ sinmẹ amàmú madosọha lẹ he amà po ogbé-mú lẹ po tindo eyin yé to hinhọ́n owhè tọn nù kavi to yẹsẹ nù. Jẹhọn flẹ́flẹ́ de sọ to yìnyìn bọ a to vivi etọn dù, owán gblingblin he e hẹnwa sọ jẹ towe ji. A sọ to sisè nudidọ amà he jẹhọn to wèdona lẹ tọn po osin he to sisà gbọn osó lẹ ji tọn po, bosọ sè nudidọ po hàngbe ohẹ̀ lẹ tọn po gọna nudidọ wanvú he to azọ́nwa lẹ tọn po. Dile a yí nukun homẹ tọn do to ninọmẹ ehe pọnhlan, be e ma jlo we nado tin to ofi mọnkọ de ya?

Lẹdo aihọn pé, gbẹtọ lẹ yise dọ ofi mọnkọ de wẹ ogbẹ̀ gbẹtọvi tọn bẹjẹeji te. Na owhe kanweko susu lẹ, hagbẹ sinsẹ̀n Ju lẹ tọn lẹ po mẹhe nọ ylọ yede dọ hodotọ Klisti tọn lẹ po gọna Malenu lẹ ko plọnnu gando jipa Edẹni tọn go, yèdọ fihe Jiwheyẹwhe ze Adam po Evi po do nado nọgbẹ̀ te. Biblu dọ dọ gbẹzan yetọn gọ́ na jijọho po ayajẹ po to finẹ. Yé tin to jijọho mẹ hẹ ode awetọ, hẹ kanlin lẹ podọ hẹ Jiwheyẹwhe, yèdọ mẹhe gbọn homẹdagbe dali na yé todido lọ nado nọgbẹ̀ kakadoi to lẹdo dagbedagbe enẹ mẹ.—Jenẹsisi 2:15-24.

Sinsẹ̀n Hindu lẹ tọn lọsu tindo pọndohlan yetọn titi lẹ gando paladisi he nọ aimẹ to hohowhenu de go. Bouddha-sẹ̀ntọ lẹ yise dọ nukọntọ gbigbọmẹ tọn daho lẹ kavi Bouddha lẹ, nọ wá aimẹ to ojlẹ dagbe hugan he mẹ aihọn lọ nọ taidi paladisi de te enẹlẹ mẹ. Podọ sinsẹ̀n Aflika tọn susu wẹ nọ plọnmẹ otàn delẹ he nọ taidi otàn Adam po Evi po tọn.

Na nugbo tọn, mẹsusu sọn sinsẹ̀n po aṣa voovo lẹ po mẹ wẹ kẹalọyi linlẹn lọ dọ paladisi de tin to hohowhenu. Wekantọ de wlan dọ: “Susu gbẹtọvi lẹ tọn wẹ yise dọ paladisi de tin to hoho dai, ehe mẹ ninọmẹ pipé lẹ, mẹdekannujẹ, jijọho, ayajẹ po adọkun po tin te, bọ awufiẹsa, hunyanhunyan po gbemanọpọ lẹ po hán te. . . . Nuyise ehe zọ́n bọ ayiha yemẹpo tọn gbọṣi paladisi he yin hinhẹnbu lọ ji, sọmọ bọ ojlo vẹkuvẹku yetọn wẹ nado vọ́ ẹ mọ, podọ yé tlẹ nọ hokàn nado hẹn ẹn gọwá.”

Be asisa dopolọ mẹ wẹ otàn po aṣa ehe lẹpo po na ko wá sọn ya? Be e yọnbasi dọ nuhe “gbọṣi ayiha omẹ ehe lẹpo tọn mẹ” lọ ni yin nuhe ko nọ aimẹ pọ́n nugbonugbo de ya? Be nugbo wẹ dọ jipa de ko tin pọ́n he nọ yin Edẹni, gọna gbẹtọvi delẹ he nọ yin Adam po Evi po to hohowhenu ya?

Linlẹn ehelẹ nọ whẹ́n kikò na mẹhe do ayihaawe gandego lẹ. To ojlẹ he mẹ lẹnunnuyọnẹn ko gbayipe te ehelẹ, mẹsusu wẹ nọ lẹndọ otàngblo po hòpadọ po poun wẹ kandai ehelẹ yin. Nupaṣamẹ wẹ e yin dọ e ma yin omẹ paa lẹ kẹdẹ wẹ do ayihaawe gando otàn ehe go. Sinsẹ̀ngán susu wẹ nọ hẹn mẹlẹ ma nado yise dọ jipa Edẹni tọn ko tin pọ́n. Yé nọ dọ dọ ofi mọnkọ de ma tin pọ́n gbede. Yé sọ nọ dọ dọ oló, otàngblo, ajlú kavi apajlẹ de poun wẹ kandai enẹlẹ yin.

Nugbo wẹ dọ Biblu bẹ apajlẹ susu hẹn. Jesu lọsu na apajlẹ delẹ he gbayipe taun. Etomọṣo, Biblu ma dlẹnalọdo kandai he gando Edẹni go taidi apajlẹ de, amọ́ taidi whenuho de he yè ma gán jẹagọdo. Ṣigba, eyin nujijọ he go Biblu donù to kandai lọ mẹ lẹ ma wá aimẹ pọ́n gbede, nawẹ yè gán dejido pipotọ nuhe e dọ lẹ tọn go gbọn? Mì gbọ mí ni gbadopọnna nuhewutu mẹdelẹ nọ do ayihaawe gando jipa Edẹni tọn go bo pọ́n eyin owhẹ̀ yetọn jọ. Enẹgodo, mí na gbadopọnna nuhewutu dopodopo mítọn dona ylọ kandai enẹ dọ nujọnu.