Kanbiọ Wehiatọ Mítọn lẹ Tọn . . .

Etẹwẹ Plitẹnhọ Ahọluduta Tọn de Yin?

▪ Plitẹnhọ Ahọluduta tọn yin nọtẹn de he Kunnudetọ Jehovah tọn lẹ nọ yizan na sinsẹ̀n-bibasi yetọn. Plitẹnhọ Ahọluduta tọn fọtọ́n susu wẹ yé to yiyizan lẹdo aihọn pé. Hugan agun 105000 Kunnudetọ Jehovah tọn lẹ tọn wẹ nọ pli to plitẹnhọ mọnkọtọn lẹ mẹ to sẹmẹsẹmẹ.

Plitẹnhọ Ahọluduta tọn lẹpo wẹ nọ tindo ohọ̀ de fie hodidọ gbangba tọn po nuplọnmẹ sinai do Biblu ji lẹ po nọ yin bibasi te. To suhugan Plitẹnhọ lẹ tọn mẹ, oplò he ji opli lẹ nọ yin anadena sọn de nọ tin. To paa mẹ, oján he sọgan hẹn gbẹtọ 100 yì 300 wẹ nọ yin awuwlena do e mẹ. Plitẹnhọ Ahọluduta tọn lẹ sọ nọ tindo klasi dopo kavi humọ, wekantẹn de gọna wesẹdotẹn kleun de he nọ bẹ owe sinai do Biblu ji po owe alọdlẹndonu tọn lẹ po hẹn, ehe hagbẹ agun lọ tọn depope sọgan yizan nado basi dodinnanu.

Ṣigba, hiẹ ma na mọ yẹdide sinsẹ̀n tọn po boṣiọ he tindo kanṣiṣa tlọlọ hẹ ṣọṣi Mẹylọhodotọklisti tọn lẹ po depope to Plitẹnhọ Ahọluduta tọn de mẹ gba. A ma na mọ agbà kavi satin depope to finẹ. Etẹwutu? Na Kunnudetọ Jehovah tọn lẹ yise dọ onú mọnkọtọn lẹ yiyizan jẹagọdo gbedide Biblu tọn lọ nado “họ̀nna boṣiọ-sinsẹ̀n.” (1 Kọlintinu lẹ 10:14; Johanu 4:24) Susu ṣọṣi po tẹmpli lẹ po tọn go wẹ yè nọ wà anazọ́n do zẹjlẹgo bosọ nọ và aṣọ́ na. Ṣigba, Plitẹnhọ Ahọluduta tọn lẹ nọ yin awuwlena to aliho de mẹ bọ nuhe to e mẹ lẹpo nọ yọ́n-na-yizan na lẹndai he yé tin na podọ yé sọ nọ to jlẹkaji. Ayidonugo nọ yin zizedo anademẹ Biblu tọn he nọ yin nina to ohọ̀ lọ mẹ ji kakati nido yin awusọhia ohọ̀ lọ tọn.

Naegbọn e do nọ yin yiylọdọ Plitẹnhọ Ahọluduta tọn? Onú tintan he ji opli he nọ yin bibasi to Plitẹnhọ Ahọluduta tọn mẹ lẹ nọ zinnudo wẹ nuplọnmẹ Biblu tọn lẹ po owẹ̀n tangan etọn he gando “ahọluduta Jiwheyẹwhe tọn” go po, yèdọ hosọ he ji lizọnyizọn Jesu tọn sinai do. (Luku 4:43) Enẹwutu, yinkọ lọ Plitẹnhọ Ahọluduta tọn he wá aimẹ to gblagbla 1930 tọn lẹ mẹ, basi zẹẹmẹ lẹndai ohọ̀ ehelẹ tọn to aliho he sọgbe mẹ—enẹ wẹ nado ze sinsẹ̀n-bibasi nugbo daga podọ nado yin ahọnkan na “wẹndagbe ahọluduta lọ tọn” lilá. (Matiu 24:14) Nalete, Plitẹnhọ Ahọluduta tọn lẹ ma tin na nuwiwa ayidedai pọmẹ tọn kavi na ajọwiwa gba. Nunina he gbẹtọ lẹ nọ basi sọn ojlo mẹ wá lẹ wẹ nọ hẹn ẹn yọnbasi nado gbá ohọ̀ ehelẹ bo penukundo yé go podọ nado gọalọ na nukọnyiyi Ahọluduta lọ tọn. Agbán depope ma nọ yin zize gbọn nukọn namẹ nado ṣinyan akuẹ. Kakatimọ, apotin de nọ tin to finẹ, ehe mẹ mẹdepope sọgan basi nunina do eyin e jlo e.

Lẹndai dopolọ wẹ Plitẹnhọ Ahọluduta tọn he tin to aihọn lọ mẹ lẹpo tin na, ṣigba aliho he mẹ yé nọ yin gbigbá te nọ gbọnvo podọ ode nọ klohu de, na azọ́nwanu họgbigbá tọn he tin-to-aimẹ, ninọmẹ aimẹ tọn po ninọmẹ akuẹzinzan tọn Kunnudetọ Jehovah tọn he tin to lẹdo lọ mẹ lẹ tọn po wutu. Bliki, atin po zannu po nọ yin yiyizan nado gbá Plitẹnhọ delẹ. Devo lẹ nọ tindo họta kẹdẹ bo ma nọ tindo adó kavi nọ yin sẹhọ̀ he yè whè obá lẹdo lẹ.

Mí nọ kẹalọyi jonọ he wá opli to Plitẹnhọ Ahọluduta tọn mẹ lẹ to whepoponu. (Heblu lẹ 10:25) Na nugbo tọn, opli lẹ nọ yin bibasi to sẹmẹsẹmẹ bo nọ zinnudo hosọ Biblu tọn de ji, ehe nọ fọnjlodotena hagbẹ agun lọ tọn he nọ wá to gbesisọ mẹ lẹ po jonọ lẹ po. Naegbọn hiẹ ma na yì dla Plitẹnhọ Ahọluduta tọn he tin to lẹdo towe mẹ pọ́n?

[Yẹdide to weda 14]

Malawi, Aflika

Angleterre, Grande-Bretagne