Lalo de Nọ Hẹn Devo Wá

“MÌ NỌ payi,” wẹ apọsteli Paulu wlan hlan Klistiani he nọgbẹ̀ to vivọnu owhe kanweko tintan W.M. tọn lẹ. Etẹwutu e do na yé avase mọnkọtọn? E dọmọ: “Vlavo mẹde sọgan tin he na domọwle mì taidi nuyànwẹnna etọn gbọn tamẹnuplọnmẹ po oklọ ovọ́ po dali sọgbe hẹ aṣa gbẹtọ lẹ tọn.”—Kọlọsinu lẹ 2:8, NW.

Mahopọnna avase Paulu tọn, bẹsọn ṣẹnṣẹn owhe kanweko awetọ W.M. tọn, Klistiani delẹ jẹ linlẹn tamẹnuplọnmẹtọ hohowhenu tọn lẹ tọn yizan ji nado basi zẹẹmẹ nuyise yetọn lẹ tọn. Etẹwutu? Yé jlo na yin alọkẹyi gbọn wesetọ Ahọluigba Lomu tọn lẹ dali bo gbọnmọ dali dọ̀n mẹsusu wá sinsẹ̀n yetọn mẹ.

Justin Martyr, dopo to mẹhe diyin hugan to Klistiani ehelẹ mẹ, yise dọ ojlẹ dindẹn whẹpo Jesu, he yin Hoyidọtọ Jiwheyẹwhe tọn do wá aigba ji, e ko sọawuhia tamẹnuplọnmẹtọ Glẹki tọn lẹ. Sọgbe hẹ nuhe Justin po tamẹnuplọnmẹtọ he tindo pọndohlan etọn nkọ lẹ po dọ, linlẹn susu he sinsẹ̀n Klistiani tọn yí sọn tamẹnuplọnmẹ po otangblo lẹ po mẹ wẹ zọ́n bọ mẹsusu do nọ yiwanna sinsẹ̀n enẹ lẹdo aihọn pé.

Wunmẹ sinsẹ̀n Klistiani tọn he Justin Martyr doai mọ ogbẹ́ susu. Ṣigba, alọkikẹyi lalo de zọ́n bọ lalo devo lẹ yin pipàdo bọ ehe wá dekọtọn do nuhe mẹsusu nọ pọnhlan to egbehe taidi sinsẹ̀n-nuplọnmẹ Klistiani tọn mẹ. Nado de lalo ehelẹ gbà, yí nuhe owe alọdlẹndonu tọn delẹ dọ jlẹdo nuhe Biblu plọn mí taun go to hosọ he bọdego lẹ mẹ.

[Asisa Yẹdide tọn to weda 9]

Lẹgba: Barrators—Giampolo/The Doré Illustrations For Dante’s Divine Comedy/Dover Publications Inc.; angẹli lẹ: Art Resource, NY; yẹdide atọ̀n-to-dopomẹ tọn: Museo Bardini, Florence