Adọkun He Jiwheyẹwhe Nọ Namẹ

EYIN hiẹ yin nugbonọ na Jiwheyẹwhe, be e na dona we po adọkun po na enẹ wutu ya? Vlavo mọwẹ, ṣigba e sọgan nọma yin adọkun he nkọ a donukun. Lẹnnupọndo apajlẹ Malia, onọ̀ Jesu tọn ji. Angẹli Gabliẹli sọawuhia ẹ bo dọ dọ e tindo “nukundagbe daho” Jiwheyẹwhe tọn, podọ e na jì ovi de, yèdọ Ovi Jiwheyẹwhe tọn. (Luku 1:28, 30-32) Ṣogan, e ma lẹzun adọkunnọ. Whenue Malia jì Jesu, e yí “apoe awe, kavi awhànnẹvu awe” do basi avọ́nunina, yèdọ nunina he hẹntọnọ lẹ nọ na Jehovah.—Luku 2:24; Levitiku 12:8.

Be Jiwheyẹwhe ma dona Malia wẹ zọ́n bọ e do yin wamọnọ ya? Lala. Kakatimọ, whenue e yì dla Elizabẹti hẹnnumẹ etọn pọ́n, “Elizabẹti . . . gọ́ na [gbigbọ wiwe]; e sọ ze ogbè etọn daga po awhá lélé de po, bo dọmọ, Donanọ wẹ hiẹ [Malia] to yọnnu lẹ mẹ, donanọ wẹ sinsẹ́n adọ̀ towe mẹ tọn.” (Luku 1:41, 42) Malia tindo lẹblanulọkẹyi lọ nado jì Ovi yiwanna Jiwheyẹwhe tọn.

Jesu lọsu ma yin adọkunnọ. E ma yin dọ e yin jiji bo whẹ́n to lẹdo wamọnọ tọn de mẹ kẹdẹ wẹ gba, ṣigba wamọnọ wẹ e yin to gbẹzan aigba ji tọn etọn blebu mẹ. To gbèdopo, e dọna dawe he jlo na lẹzun devi etọn de dọmọ: “Wọtupọẹ lẹ tindo odò, ohẹ̀ oji aga tọn lẹ sọ do adọ́, ṣigba Ovi gbẹtọ tọn ma tindo fide na do ota etọn ai te gba.” (Luku 9:57, 58) Ṣigba, avọ́sinsan he Jesu Klisti basi bo do wá aigba ji hẹn ẹn yọnbasi na devi etọn lẹ nado mọ adọkun daho. Apọsteli Paulu wlan dọmọ: “Na mìwlẹ tọn wutu, e lẹzun agbátọnọ, na mìwlẹ nido yin adọkunnọ gbọn ohẹ́n etọn mẹ.” (2 Kọlintinu lẹ 8:9) Adọkun nankọ wẹ Jesu na devi etọn lẹ? Podọ adọkun nankọ wẹ e nọ na mí to egbehe?

Adọkun Wunmẹ Tẹ?

Adọkunnu lẹ nọ saba yin aliglọnnamẹnu nado tindo yise, na adọkunnọ de sọgan dejido akuẹ etọn go kakati nido yin Jiwheyẹwhe. Jesu dọmọ: “E na sinyẹnawuna mẹhe tindo adọkun lẹ . . . nado biọ ahọludu Jiwheyẹwhe tọn mẹ!” (Malku 10:23) Enẹwutu, e họnwun dọ adọkun he Jesu dopà etọn na hodotọ etọn lẹ ma yin agbasa tọn gba.

Na nugbo tọn, susu Klistiani owhe kanweko tintan whenu tọn lẹ wẹ yin wamọnọ. Whenue dawe he yin sẹkunọ sọn jiji whenu gbọ́n de biọ akuẹ Pita po Johanu po, Pita gblọnna ẹn dọmọ: “Fataka po sika po yẹn ma tindo: ṣigba nuhe . . . yẹn tindo wẹ yẹn na we; to oyín Jesu Klisti Nazalẹti tọn mẹ, fọ́n bo zinzọnlin.”—Owalọ lẹ 3:6.

Nuhe devi Jakobu dọ lẹ sọ dohia dọ suhugan mẹhe tin to agun Klistiani tọn mẹ lẹ tọn wẹ yin wamọnọ. E wlan dọmọ: “Mì dotoai, mì mẹmẹsunnu yiwanna ṣie lẹ emi, Be Jiwheyẹwhe ma ko de wamọnọ aihọn he tọn lẹ do basi adọkunnọ yise tọn, podọ whédutọ ahọludu lọ tọn he e dopagbe etọn hlan yé he yiwanna ẹn lẹ?” (Jakobu 2:5) Humọ, apọsteli Paulu lọsu  tlẹ yidogọ dọ e ma yin “nuyọnẹntọ susu gbọn agbasalan tọn mẹ” kavi “hlọnhlọnnọ” kavi “mẹgboogbo” lẹ wẹ yin yiylọ wá agun Klistiani tọn mẹ gba.—1 Kọlintinu lẹ 1:26.

Eyin adọkun he Jesu na hodotọ etọn lẹ ma yin agbasa tọn, adọkun wunmẹ tẹwẹ e na yé? To wekanhlanmẹ he Jesu dohlan agun Smana tọn mẹ, e dọmọ: “Yẹn yọ́n . . . nukunbibia po ohẹ́n towe po (ṣigba adọkunnọ wẹ hiẹ).” (Osọhia 2:8, 9) Mahopọnna dọ Klistiani he tin to Smana lẹ yin wamọnọ, yé tindo adọkun he họakuẹ tlala hú fataka kavi sika. Gbọnna? Na yé tindo yise bo hẹn tenọgli yetọn go na Jiwheyẹwhe. Yise họakuẹ tlala, “na omẹ pó ma tindo yise gba.” (2 Tẹsalonikanu lẹ 3:2) Na taun tọn, wamọnọ wẹ mẹhe ma tindo yise lẹ yin to nukun Jiwheyẹwhe tọn mẹ.—Osọhia 3:17, 18.

Adọkun He Yise Nọ Hẹnmẹ Tindo Lẹ

Aliho tẹlẹ mẹ wẹ yise yin nuhọakuẹ te taun? Mẹhe tindo yise to Jiwheyẹwhe mẹ lẹ nọ mọaleyi sọn “adọkun dagbewà, linsinsinyẹn, po homẹfa etọn po” mẹ. (Lomunu lẹ 2:4) Humọ, yé sọ nọ jaya na “jona ylando [yetọn lẹ] tọn” wutu na yé tindo yise to avọ́sinsan ofligọ Jesu tọn mẹ wutu. (Efesunu lẹ 1:7) Humọ, yewlẹ tọn wẹ nuyọnẹn, he nkọtọn “ohó Klisti tọn” nọ na mẹhe tindo yise lẹ. (Kọlọsinu lẹ 3:16) Eyin yé hodẹ̀ hlan Jiwheyẹwhe to yise mẹ, “jijọho Jiwheyẹwhe tọn he hú nuyọnẹn lẹpo” na whlá ahun po ayiha yetọn lẹ po, bo na yé pekọ po ayajẹ po.—Filippinu lẹ 4:7.

Gbọnvona ale ehe lẹpo, mẹhe yise to Jiwheyẹwhe mẹ gbọn Ovi etọn, Jesu Klisti gblamẹ lẹ, sọ tindo todido jiawu ogbẹ̀ madopodo tọn. Mí yọ́n hogbe Jesu Klisti tọn  ehelẹ ganji dọmọ: ‘Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ, na mẹdepope he yí i sè ma nado dọ̀n, ṣigba e nido tindo ogbẹ̀ madopodo.’ (Johanu 3:16) Todido jiawu enẹ nọ lodo eyin mí tindo oyọnẹn he pegan Otọ́ po Ovi po tọn, na Jesu dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.”—Johanu 17:3.

Na taun tọn, dile etlẹ yindọ gbigbọ-liho wẹ Jiwheyẹwhe nọ dona mí te, dona enẹlẹ sọ nọ hẹn ale wá to numọtolanmẹ-liho podọ to agbasa-liho ga. Lẹnnupọndo apajlẹ Dalídio tọn ji, to Brésil. Whẹpo e do tindo oyọnẹn he sọgbe gando lẹndai Jiwheyẹwhe tọn go, e ko yin ahànnumunọ de dai. Enẹ zọ́n bọ ewọ po whẹndo etọn po nọ tindo nuhahun sinsinyẹn. Humọ, akuẹ ma nọ nọte to alọmẹ na ẹn. Ṣigba, e wá jẹ Biblu plọn ji po Kunnudetọ Jehovah tọn lẹ po, podọ e basi diọdo ayidego tọn lẹ.

Nuhe Dalídio plọn sọn Biblu mẹ lẹ gọalọna ẹn nado jo walọ ylankan etọn lẹ do. E dovivẹnu to gbigbọ-liho sọmọ bọ e dọ dọ, “To dai, n’nọ yì sọn ahànnutẹn de jẹ ahànnutẹn devo, ṣigba todin n’nọ yì sọn whédegbè jẹ whédegbè.” E ko lẹzun lizọnyizọnwatọ whenu-gigọ́ tọn he nọ lá Ohó Jiwheyẹwhe tọn todin. E ma yin agbasalilo etọn kẹdẹ wẹ diọdo enẹ hẹn pọnte to e go gba, ṣigba e sọ hẹn ninọmẹ akuẹzinzan tọn etọn pọnte. Dalídio dọ dọ, “Akuẹ he n’nọ và do ahàn mẹ dai, wẹ n’do nọ gọalọna mẹhe tin to nuhudo mẹ lẹ kavi nado họ̀ nuhe n’tindo nuhudo etọn lẹ todin.” Gbọn gbẹdido hẹ mẹhe tindo pọndohlan gbigbọmẹ tọn dopolọ hẹ ẹ lẹ dali, e ko tindo họntọn nujọnu tọn susu. Todin, Dalídio tindo jijọho ahun mẹ tọn po pekọ po hugan nudepope he e sọgan ko donukun whẹpo do wá yọ́n Jiwheyẹwhe.

Sọ lẹnnupọndo apajlẹ Renato tọn ji, yèdọ dẹpẹ de he hẹn gbẹzan etọn pọnte gbọn yise tintindo to Jehovah Jiwheyẹwhe mẹ dali. Eyin a mọ lehe e do ayajẹ do to egbehe, e na vẹawuna we nado yise dọ adán ko gbò e pọ́n to gbẹ̀mẹ. Whenue e gbẹ́ yin viyẹyẹ pẹnyẹn-pẹnyẹn wẹ onọ̀ etọn jo e do. Onọ̀ etọn ze e do saki de mẹ bo sisẹ́ ẹ do oján de glọ, apà sù to e go bọ agbasa etọn sọ zún, podọ ahọnkan etọn gbẹ́ pò to e go gblẹgblẹ. Nawe awe delẹ jugbọn finẹ wá jei bo mọdọ saki lọ to whinwhàn to oján glọ. Tlolo, yé lẹndọ mẹde wẹ jo asévi do finẹ. Whenue yé wá mọdọ viyẹyẹ de wẹ, yé yawu ze e yì dotowhé he to yakẹ de na yé nido penukundego.

Dopo to nawe lọ lẹ mẹ yin Kunnudetọ Jehovah tọn, podọ e dọho ovi lọ tọn na Kunnudetọ hatọ etọn devo he nọ yin Rita. Ohò susu wẹ ko gble do Rita pọ́n, podọ viyọnnu dopo gee wẹ e tindo. E to visunnu dín nukun awe, enẹwutu, e basi nudide nado yí Renato hẹn taidi ovi etọn.

Sọn whenue gbọ́n Renato pò to ovu wẹ Rita ko dọna ẹn dọ e ma yin emi wẹ onọ̀ etọn jọnun. Ṣigba e wlebòna ẹn ganji bo dovivẹnu nado do nujinọtedo Biblu tọn do ahun mẹ na ẹn. Dile e to whinwhẹ́n, e jẹ ojlo tindo to Biblu mẹ ji. E sọ yọ́n pinpẹn aliho jiawu he mẹ e yin whinwhlẹngán  te tọn taun. Nukun etọn nọ hlá dasin whedepopenu he e hia hogbe psalm-kàntọ Davidi tọn he dọmọ: “Whenuena otọ́ ṣie po onọ̀ ṣie po gbẹ́ mi dai, whenẹnu wẹ OKLUNỌ na dealọyí mi.”—Psalm 27:10.

Nado do pinpẹn-nutọn-yinyọnẹn etọn hia na nuhe Jehovah wà na ẹn lẹpo, Renato yí baptẹm to 2002 bo lẹzun lizọnyizọnwatọ whenu-gigọ́ tọn to owhe he bọdego mẹ. Kakajẹ din, e ma ko yọ́n mẹhe yin otọ́ po onọ̀ etọn jọnun po, podọ vlavo e ma na yọ́n yé gbede. Ṣigba, Renato mọdọ dopo to nunina họakuẹ hugan he e ko mọyi lẹ mẹ wẹ nado yọ́n Jehovah bo tindo yise to e mẹ taidi Otọ́ owanyinọ po mẹtọnhopọntọ de po.

Vlavo hiẹ to jijlo vẹkuvẹku nado tindo haṣinṣan pẹkipẹki owanyinọ de hẹ Jiwheyẹwhe, he sọgan hẹn gbẹzan towe pọnte taun. Dotẹnmẹ lọ nado tindo haṣinṣan mọnkọtọn hẹ Jehovah Jiwheyẹwhe po Ovi etọn Jesu Klisti po hundote na mẹlẹpo—vlavo mí yin adọkunnọ kavi hẹntọnọ. Haṣinṣan enẹ sọgan nọma hẹnmẹ jẹ adọkun to agbasa-liho, ṣigba e nọ namẹ jijọho ahun mẹ tọn po pekọ he akuẹ he tin to aihọn mẹ lẹpo ma sọgan họ̀ po. Ehe do nugbo-yinyin hogbe Howhinwhẹn lẹ 10:22 tọn hia, he dọmọ: “Dona OKLUNỌ tọn, e nọ hẹnmẹ wàdọkun, e ma nọ yí awubla dogọ ẹ gba.”

Jehovah Jiwheyẹwhe nọ tindo ojlo nujọnu tọn to mẹhe nọ dọnsẹpọ ẹ lẹ mẹ. E dọmọ: “Eyin dọ hiẹ ko dotoai hlan osẹ́n ṣie! Whenẹnu wẹ jijọho towe do ko taidi otọ̀, dodo towe di agbówhẹn ohù tọn.” (Isaia 48:18) Podọ e dopagbe dona susu tọn na mẹhe dọnsẹpọ ẹ po mẹwhinwhàn dagbe po bosọ tindo pọndohlan dagbe lẹ. E dọmọ: “Ale whiwhẹ tọn po osi OKLUNỌ tọn po wẹ adọkun, yẹyi, po ogbẹ̀ po.”—Howhinwhẹn lẹ 22:4.

[Blurb on page 6]

Yise tintindo to Jiwheyẹwhe mẹ nọ hẹn jijọho, pekọ, po ayajẹ po wá

[Yẹdide to weda 5]

Dile Jesu tlẹ wá sọn whẹndo hẹntọnọ tọn de mẹ to aigba ji, Jiwheyẹwhe dona whẹndo lọ taun