Dọnsẹpọ Jiwheyẹwhe

Ewọ Yọ́n Dogbó Mítọn

Levitiku 5:2-11

“N’NỌ wà nuhe go n’pé lẹpo, ṣigba n’gbẹ́ nọ mọdọ n’dona dovivẹnu dogọ.” Nuhe yọnnu dopo dọ niyẹn gando vivẹnu he e nọ do nado hẹn homẹhun Jiwheyẹwhe go. Be Jehovah Jiwheyẹwhe nọ kẹalọyi vivẹnu ahundopo tọn he sinsẹ̀n-basitọ etọn lẹ nọ do ya? Be e nọ hò nugopipe po ninọmẹ yetọn lẹ po pọ́n ya? Nado na gblọndo kanbiọ ehelẹ tọn, mì gbọ mí ni gbadopọnna nuhe Osẹ́n Mose tọn dọ gando avọ́nunina delẹ go, dile e yin mimọ do to Levitiku 5:2-11 mẹ.

To Osẹ́n Mose tọn glọ, Jiwheyẹwhe biọ dọ avọ́sinsan kavi avọ́nunina voovo lẹ ni yin bibasi nado mọ jona ylando lẹ tọn yí. Ninọmẹ he yin nùdego to wefọ ehelẹ mẹ gando mẹhe waylando to mayọnẹn mẹ de go. (Wefọ 2-4) To whenue ylando etọn wá zun yinyọnẹn na ẹn, e dona yigbe etọn bo na avọ́nunina whẹgbledo tọn—yèdọ “asi de sọn kanlinpa lọ mẹ, lẹngbọvu de kavi gbọgbọẹ de.” (Wefọ 5, 6) Ṣigba eyin wamọnọ de wẹ ewọ yin bo ma tindo lẹngbọvu kavi gbọgbọẹ de lo? Be Osẹ́n lọ biọ dọ e ni yí kanlin lọ to mẹde si whẹ́ bo gbọnmọ dali tlọ ede biọ ahọ́ mẹ wẹ ya? Be e dona wazọ́n kakajẹ whenue e mọ akuẹ nado họ̀ kanlin lọ, bo gbọnmọ dali sisẹ́ avọ́ he e dona sán nado mọ jona ylando etọn lẹ tọn yí lọ do nukọn wẹ ya?

Nado do mẹtọnhopọn owanyinọ Jehovah tọn hia, Osẹ́n lọ dọmọ: “Eyin huhlọn etọn whè na lẹngbọvu dopo, whenẹnu ewọ na hẹn avọ́nunina whẹgbledo tọn etọn wá na enẹ ehe mẹ e ko waylando te, owhlé awe, kavi awhànnẹvu awe, jẹ OKLUNỌ lọ dè.” (Wefọ 7) Eyin Islaelivi de yin wamọnọ sọmọ bo ma sọgan na lẹngbọvu de, homẹ Jiwheyẹwhe tọn nọ hùn nado kẹalọyi nuhe go huhlọn etọn pé—enẹ wẹ owhlé awe kavi awhànnẹvu awe.

Eyin huhlọn mẹlọ tọn ma tlẹ pé ohẹ̀ awe lọsu go lo? “Whẹnẹnu ewọ na hẹn avọ́nunina etọn wá na enẹ ehe mẹ ewọ ko waylando te, madaotọ efa [nudi kilo dopo] linfin dagbedagbe tọn dopo na avọ́nunina ylando de tọn,” wẹ Osẹ́n lọ dọ. (Wefọ 11) Na mẹhe jẹhẹ́n klókló, Jehovah hẹn ẹn yọnbasi nado na avọ́nunina ylando tọn he ma biọ dọ ohùn kanlin tọn ni yin sinsọndai. a To Islaeli, ohẹ́n ma nọ glọnalina mẹde nado mọ jona ylando tọn yí kavi nado gbọwhẹ hẹ Jiwheyẹwhe.

Etẹwẹ osẹ́n avọ́nunina whẹgbledo tọn lẹ plọn mí gando Jehovah go? Osẹ́n lọ plọn mí dọ ewọ yin Jiwheyẹwhe awuvẹmẹtọ he yọ́n dogbó sinsẹ̀n-basitọ etọn lẹ tọn. (Psalm 103:14) E jlo dọ mí ni dọnsẹpọ ẹ bo tindo haṣinṣan dagbe hẹ ẹ mahopọnna ninọmẹ sinsinyẹn mítọn lẹ taidi yọnhowhe, azọ̀n, azọngban whẹndo tọn kavi azọngban devo lẹ. Homẹmiọnnamẹnu wẹ nado yọnẹn dọ homẹ Jehovah Jiwheyẹwhe tọn nọ hùn to whenue mí wà nuhe go mí pé lẹpo na ẹn.

[Nudọnamẹ odò tọn]