Ayinamẹ lẹ Na Ayajẹ Whẹndo Tọn

Mẹplọnlọ Dido Ovi lẹ Go

John dọmọ: a Whẹpo mẹjitọ ṣie lẹ do nọ domẹplọnlọ go e na nuṣiwa de wutu, yé nọ tẹnpọn nado yọ́n nuhewutu n’do wàmọ po ninọmẹ he mẹ n’wàmọ te po. N’nọ tẹnpọn nado hodo apajlẹ yetọn to whenuena n’to mẹplọnlọ do viyọnnu ṣie lẹ go. To alọ devo mẹ, oplọn he asi ṣie Alison mọyi gbọnvona ṣie. Otọ́ etọn po onọ̀ etọn po nọ yawu domẹplọnlọ ovi lẹ go. E taidi dọ yé ma nọ lẹnnupọndo ninọmẹ po nuhe hẹn nuṣiwa lọ wá po ji whẹpo do nọ hò ovi yetọn lẹ. To whedelẹnu, n’nọ mọdọ aliho sinsinyẹn mọnkọtọn mẹ wẹ asi ṣie nọ domẹplọnlọ ovi mítọn lẹ go te.

Carol dọmọ: Owhe atọ́n poun wẹ n’tindo to whenue otọ́ ṣie gbẹkọ whẹndo mítọn go. E ma nọ kàn nudepope sè gando yẹn po nọviyọnnu ṣie atọ̀n lẹ po go. Onọ̀ ṣie nọ wazọ́n sinsinyẹn whẹpo mí do nọ mọ dùdù po nùnù po, podọ azọngban susu wẹ n’dona didá nado penukundo nọviyọnnu ṣie lẹ go. E ma bọawu nado duvivi ovu whenu tọn, na n’to nuyiwa taidi mẹjitọ to ojlẹ dopolọ mẹ. Kakajẹ egbehe, n’nọ yiwanna azọ́n hugan aihun. Eyin ovi ṣie titi lẹ tindo nuhudo mẹplọnlọ tọn, n’nọ hanú susu gando nuṣiwa yetọn lẹ go. N’nọ jlo na yọ́n nuhewutu yé do wàmọ. To vogbingbọn mẹ, asu ṣie Mark ma nọ hanú sọmọ. Otọ́ owanyinọ de he ma nọ joalọdokọji na ovi etọn lẹ wẹ jì i, podọ e nọ wlebòna onọ̀ Mark tọn ganji. Asu ṣie nọ yawu didẹ nuhahun hẹ viyọnnu mítọn lẹ. E nọ gbeje ninọmẹ lọ pọ́n, nọ penukundego, bo masọ nọ ze ayiha deji ba.

SỌGBE hẹ nuhe John po Carol po dọ, aliho he mẹ hiẹ yin pinplọn whẹ́n te sọgan yinuwado lehe a nọ plọn ovi towe titi lẹ do ji. To whenuena asu po asi po de wá sọn whẹndo he tindo aṣa mẹpinplọn tọn voovo lẹ mẹ, yé nọ saba tindo pọndohlan voovo gando lehe ovi lẹ na yin pinplọn do go. To whedelẹnu, vogbingbọn ehelẹ nọ fọ́n nuhahun lẹ dote to alọwle mẹ.

Eyin nuṣikọna mẹjitọ lọ lẹ taun, enẹ sọgan yidogọna nuhahun lọ lẹ. Mẹhe ṣẹṣẹ bẹ vijiji lẹ nọ mọdọ ovi pinplọn nọ hẹn agbọ́pemẹ bosọ nọ yí whenu susu to mẹsi. Joan po asu etọn Darren po, he plọn viyọnnu awe whẹ́n dọmọ: “N’yiwanna viyọnnu ṣie lẹ, ṣigba yé ma nọ yawu yihọ to whenue n’jlo dọ yé ni wàmọ. Podọ yé nọ fọ́n to ojlẹ he mẹ yé dona gbẹ́ pò to amlọndọ. Yé sọ nọ gbòhódonù na mi eyin n’to hodọ. Yé nọ  jo afọpa, avọ̀ po aihundanu yetọn lẹ po do fidepope poun bo ma nọ sẹ̀ nuhe yé dupò lẹ do.”

Jack, he asi etọn jẹazọ̀n apọṣimẹ sinsinyẹn tọn de to whenuena ovi yetọn awetọ yin jiji godo, flin dọmọ: “N’nọ saba gọ̀ sọn azọ́nmẹ vujẹvujẹ, podọ n’nọ nọ̀ zánnukle nado penukundo viyẹyẹ mítọn go. Ehe nọ hẹn ẹn vẹawu nado plọn viyọnnu mítọn mẹho bo domẹplọnlọ e go dile e jẹ do. E nọ whànwu dọ mí ma nọ na ẹn ayidonugo dile mí nọ wà do dai, na nọvi etọn wutu.”

Whenue mẹjitọ he nuṣikọna lẹ ma kọngbedopọ do aliho he mẹ ovi de sọgan yin pinplọn te ji, gbemanọpọ kleun kleun lẹ sọgan dekọtọn do wiwọ́ mẹ. Gbemanọpọ he ma yin dididẹ lẹ sọgan zọ́n bọ ovi lọ na mọ ali do yé go bọ enẹ na hùn dotẹnmẹ dotena ẹn nado hò ota yetọn dopọ. Nunọwhinnusẹ́n Biblu tọn tẹlẹ wẹ na gọalọna asu po asi po de nado tindo kanṣiṣa dagbe to whẹndo mẹ to whenuena yé to ovi yetọn lẹ plọn?

Nọ Yí Whenu Zan hẹ Alọwlemẹ Towe

Sunnu po yọnnu po dona wlealọ whẹpo do jivi, podọ kanṣiṣa lọ dona zindonukọn etlẹ yin to whenue ovi lẹ ko jẹ yede si godo. Gando kanṣiṣa alọwle tọn go, Biblu dọmọ: “Nuhe Jiwheyẹwhe kọndopọ mì dike gbẹtọ klan ẹn blo.” (Matiu 19:6) To alọ devo mẹ, wefọ he jẹnukọn dohia dọ ojlo Jiwheyẹwhe tọn wẹ yindọ ovi de ni “jo otọ́ po onọ̀ etọn po” do eyin e wlealọ. (Matiu 19:5) Na nugbo tọn, ovi pinplọn yin dopo to nuhe alọwle bẹhẹn lẹ mẹ, e ma yin enẹ ji wẹ alọwle lọ sinai do gba. Matin ayihaawe, mẹjitọ lẹ dona nọ yí whenu susu zan nado plọn ovi yetọn lẹ, ṣigba nado jẹ yanwle ehe kọ̀n, yé dona flindọ alọwle he lodo ganji wẹ yin dodonu dagbe hugan lọ.

Etẹwẹ yin dopo to aliho he mẹ asu po asi po de sọgan hẹn haṣinṣan yetọn lodo dile yé to ovi lẹ plọn whẹ́n te mẹ? Eyin e yọnbasi, mì nọ de whenu delẹ dovo to gbesisọ mẹ nado yizan to pọmẹ mì omẹ awe lẹ kẹdẹ. Mọwiwà na gọalọna mì nado dọhodo whẹho titengbe whẹndo mìtọn tọn delẹ ji podọ nado deayidai dopọ. Nado dọ hójọhó, e ma nọ bọawu na asu po asi po lẹ nado yí whenu zan dopọ. Alison, onọ̀ he yin nùdego jẹnukọn dọmọ, “Whenue yẹn po asu ṣie po jlo na yí ojlẹ vude zan dopọ janwẹ viyọnnu mítọn pẹvi nọ biọ ayidonugo mítọn kavi ovi mítọn he tindo owhe ṣidopo nọ fọ́n tukla de dote, taidi ‘N’ma mọ wekantin ṣie lẹ.’”

Joan po Darren po, he yin nùdego wayi lẹ ze ganmẹ tangan de dai, he mẹ ovi yetọn lẹ na nọ yihọ te, podọ ehe nọ gọalọna yé nado tindo whenu he yé na yizan dopọ. “Egbesọegbesọ wẹ mí nọ biọ to viyọnnu mítọn lẹ si nado yawu mlọnai na mí nọ ṣimiyọ́n to ogàn tangan de mẹ wutu,” wẹ Joan dọ. “Enẹ nọ gọalọna yẹn po Darren po nado mọ agbọ́ bo dọhodopọ.”

Gbọn ganmẹ tangan he mẹ ovi de na nọ yihọ te zizedai dali, e ma yindọ asu po asi po de na mọ whenu he yé na nọ yizan dopọ kẹdẹ wẹ gba, ṣigba yé nasọ gọalọna ovi lọ ma nado “lẹn ede tọn glanglan hù ehe jẹ e ni lẹn.” (Lomunu lẹ 12:3) Vudevude, ovi he yin pinplọn nado nọ yihọ do ganmẹ lẹ na wá mọdọ dile etlẹ yindọ yé yin apadewhe whẹndo lọ tọn, e ma yin yewlẹ kẹdẹ wẹ yin nujọnu to whẹndo lọ mẹ gba—yé dona kọngbedopọ hẹ aṣa whẹndo lọ tọn kakati yé ni donukun dọ whẹndo lọ ni kọngbedopọ hẹ ojlo yetọn.

TẸ́N EHE PỌ́N: Mì ze ganmẹ họyiyi tọn de dai bo tẹnpọn nado nọ hodo e to gbesisọ mẹ. Eyin ovi towe na whẹwhinwhẹ́n de he wutu e dona dọngbàn vude whẹpo do yihọ, di apajlẹ eyin e dọ dọ emi na nù osin, hiẹ sọgan kẹalọyi obiọ etọn whladopo. Ṣigba ma dike ovi towe ni nọ sisẹ́ ganmẹ họyiyi tọn do nukọn po obiọ mapote po blo. Eyin ovi towe biọ nado nọ nukle na nukunwhiwhe atọ́n dogọ bọ hiẹ jlo na nagbè e, ma dike ni zẹ̀ nukunwhiwhe atọ́n lọ go blo. Eyin ogàn lọ hò, dọ ni yì mlọnai bo masọ yigbena obiọ devo blo. Dike ‘Mọwẹ towe ni yin Mọwẹ, Lala, Lala.’—Matiu 5:37.

Mì Nọ Do Gbekọndopọ Mìtọn Hia

“Ovi ṣie, sè mẹplọngbe otọ́ towe tọn, a gbẹ́ osẹ́n onọ̀ towe tọn dai blo,” wẹ howhinwhẹn nuyọnẹn tọn de dọ. (Howhinwhẹn lẹ 1:8) Wefọ  ehe dohia dọ otọ́ po onọ̀ po wẹ tindo jlọjẹ lọ nado yí aṣẹpipa zan do ovi yetọn lẹ ji. Ṣigba, eyin asu po asi po lọ tlẹ wá sọn whẹndo he tindo aṣa mẹpinplọn tọn he taidi dopolọ lẹ mẹ, yé sọgan nọma kọngbedopọ do aliho he mẹ ovi lẹ na yin pinplọn te po nunọwhinnusẹ́n whẹndo tọn he dona yin hihodo to whẹho tangan de mẹ lẹ po ji. Nawẹ mẹjitọ lẹ sọgan duto nuhahun enẹ ji gbọn?

John, he yin nùdego wayi dọmọ, “N’mọdọ e ma sọgbe nado nọ dọnnu to nukun ovi lẹ tọn mẹ.” Ṣigba, e yigbe dọ gbekọndopọ didohia nọ bọawu nado dọ hugan nado wà. John yidogọ dọmọ: “Ovi lẹ nọ yawu doayinugo. Eyin hogbe mítọn ma tlẹ ko do gbemanọpọ hia, viyọnnu mítọn sọgan doayi e go to nuyiwa mítọn lẹ mẹ.”

Nawẹ John po Alison po duto nuhahun ehe ji gbọn? Alison dọmọ: “Eyin aliho he mẹ asu ṣie to mẹplọnlọ do viyọnnu mítọn go te ma hùnhomẹ na mi, n’nọ nọte jẹ whenue ovi lọ masọ tin to yakẹ nado sè nuhe dọ mí te whẹpo n’do nọ dọ linlẹn ṣie lẹ tọ́n. N’ma nọ jlo dọ e ni lẹndọ emi sọgan mọ ali do mí go gbọn gbemanọpọ mítọn lẹ yiyizan dali. Eyin e doayi e go dọ mí ma kọngbèdopọ do whẹho de ji, n’nọ dọna ẹn dọ hagbẹ whẹndo lọ tọn lẹpo wẹ dona hodo anademẹ Jehovah tọn, podọ n’nọ litaina tatọ́-yinyin otọ́ etọn tọn sọn ojlo mẹ wá dile ewọ lọsu dona litaina aṣẹpipa yẹn po otọ́ etọn po tọn do.” (1 Kọlintinu lẹ 11:3; Efesunu lẹ 6:1-3) John dọmọ: “To whenuena mí tin topọ to whẹndo mẹ, yẹn wẹ nọ saba domẹplọnlọ ovi mítọn lẹ go. Ṣigba, eyin Alison mọnukunnujẹ ninọmẹ de mẹ hugan mi, n’nọ jo dotẹnmẹ do na ẹn nado domẹplọnlọ ovi lọ lẹ go bọ n’nọ nọgodona ẹn. Eyin homẹ ṣie ma hùn do e go do whẹho de ji, n’nọ dọhodeji hẹ ẹ to whedevonu.”

Nawẹ hiẹ sọgan wagbọn bọ gbemanọpọ he nọ zọnpọ hẹ ovi lẹ pinplọn ma nado hẹn wiwọ́ wá hiẹ po alọwlemẹ towe po ṣẹnṣẹn, bọ mì ma nasọ do hẹn sisi he ovi mìtọn lẹ tindo na mì bu?

TẸ́N EHE PỌ́N: Mì nọ de whenu dovo to sẹmẹsẹmẹ nado dọhodo whẹho he gando ovi lẹ pinplọn go lẹ ji, bo nọ voawu nado dọhodo gbemanọpọ depope he mì sọgan tindo ji. Mì nọ tẹnpọn nado mọnukunnujẹ pọndohlan ode awetọ tọn mẹ, bo yọnẹn dọ dopodopo mìtọn wẹ tindo haṣinṣan etọn titi hẹ ovi lọ.

Mì Ma Dike Ovi lẹ Pinplọn Ni Klan Mì Blo

Matin ayihaawe, ovi lẹ pinplọn ma bọawu. To whedelẹnu, azọngban lọ sọgan kàn dẹpẹ biọ. Ṣigba, e yá wẹo kavi e dẹn wẹo, ovi lẹ na wá jẹ yede si, podọ hiẹ po alọwlemẹ towe po na duvivi haṣinṣan pẹkipẹki de tọn whladopo dogọ taidi asu po asi po. Be ovi lẹ pinplọn na dekanpona kanṣiṣa alọwle tọn mìtọn kavi hẹn ẹn lodo wẹ ya? Gblọndo kanbiọ ehe tọn na sinai do lehe mì nọ yí nunọwhinnusẹ́n he tin to Yẹwhehodọtọ 4:9, 10 mẹ zan ganji do ji; e dọmọ: “Omẹ awe pọnte hú mẹdopo; na yé tindo ale dagbe de na magbọjẹ yetọn. Na eyin [ode] jai, mẹde na ze ogbẹ́ etọn dote.”

Whenuena mẹjitọ lẹ kọngbedopọ, enẹ nọ tindo kọdetọn dagbe. Carol, he yin nùdego jẹnukọn dọ numọtolanmẹ etọn lẹ dọmọ: “N’yọnẹn dọ asu ṣie tindo jẹhẹnu dagbe susu, ṣigba ovi lẹ pinplọn dopọ zọ́n bọ n’sọ mọ jẹhẹnu dagbe etọn devo lẹ. Sisi po owanyi he n’tindo na ẹn po nọ sinyẹn deji dile n’to mimọ bọ e to nukunpedo viyọnnu mítọn lẹ go po owanyi po.” John dọ gando Alison go dọmọ, “Eyin n’to mimọ lehe asi ṣie nọ penukundo ovi mítọn lẹ go po mẹtọnhopọn po do, enẹ nọ hẹn owanyi po sisi he n’tindo na ẹn po siso deji.”

Eyin mì nọ yí whenu zan hẹ ode awetọ bo nọ kọngbedopọ to ovi mìtọn lẹ pinplọn whenu, kanṣiṣa alọwle mìtọn tọn na lodo dogọ dile ovi mìtọn lẹ to whinwhẹ́n. Apajlẹ dagbe tẹwẹ mì jlo na zedai na ovi mìtọn lẹ?

[Nudọnamẹ odò tọn]

KANSE DEWE DỌ . . .

▪ Whenu nẹmu wẹ n’nọ yizan po alọwlemẹ ṣie po to sẹmẹsẹmẹ eyin ovi lẹ ma tin to yakẹ?

▪ Aliho tẹ mẹ wẹ n’nọ nọgodona alọwlemẹ ṣie te eyin e to mẹplọnlọ do ovi mítọn lẹ go?