ONỌ̀ ṣie kanse mi dọmọ: “Naegbọn a ma jlo na sẹ̀n tọgbo towe lẹ taun? Be a ma yọnẹn dọ yewlẹ wẹ zọ́n bọ a do tin togbẹ̀ ya? A ma jlo na do pinpẹn-nutọn-yinyọnẹn depope hia yé wẹ? Nawẹ a sọgan gbẹ́ aṣa he ko yin zizedai sọn hoho gbọ́n enẹlẹ dai gbọn? Eyin a gbẹ́ nado gbògbéna tọgbo mítọn lẹ, be didọ a te dọ sinsẹ̀n mítọn yin nulunu niyẹn.” Enẹgodo, onọ̀ ṣie jẹflumẹ bo bẹ avi.

Osun vude jẹnukọn, Kunnudetọ Jehovah tọn lẹ ko ze plọnmẹ Biblu donukọnna onọ̀ ṣie. E ma jlo na plọnnu, ṣigba nado jọmẹ hẹ yé, e dọna yé nado plọnnu hẹ mi. Amọ́ todin e jẹ homẹgble do go e ji. E ma ka nọ yinuwa hẹ mi domọ dai, na n’nọ saba setonuna ẹn. Ṣigba, na n’jlo na hẹn homẹ Jehovah tọn hùn wutu, n’ma sọgan setonuna ẹn to ojlẹ enẹ mẹ. Mọwiwà ma bọawu, amọ́ Jehovah na mi huhlọn.

Bouddha wẹ whẹndo mítọn nọ sẹ̀n dile suhugan mẹhe to Japon lẹ tọn nọ wà do. Amọ́, osun awe poun to whenue Kunnudetọ Jehovah tọn lẹ plọnnu hẹ mi godo, n’kudeji dọ nuhe Biblu dọ lẹ yin nugbo. To whenue n’wá mọdọ n’tindo Otọ́ olọn mẹ tọn de, n’tindo ojlo vẹkuvẹku nado yọ́n ewọ. Yẹn po Mama po nọ yí ayajẹ do dọhodo nuhe plọn n’te lẹ ji. N’jẹ opli Dimanche tọn lẹ yì ji to Plitẹnhọ Ahọluduta tọn mẹ. Dile oyọnẹn ṣie na nugbo lọ to jijideji, n’dọna Mama dọ n’ma nasọ sẹ̀n Bouddha ba. Nuyiwa etọn diọ to afọdopolọji. E dọmọ: “Winyannu wẹ e yin nado tindo mẹde to whẹndo lọ mẹ he ma yiwanna tọgbo mítọn lẹ.” E dọna mi nado doalọtena Biblu pinplọn po opli lẹ yìyì po. N’ma lẹn gbede dọ onọ̀ ṣie sọgan dọ mọ! E masọ taidi mẹhe n’yọnẹn dai ba.

N’plọn to Efesunu lẹ weta 6 mẹ dọ Jehovah jlo dọ ma nọ setonuna mẹjitọ ṣie lẹ. Papa kọngbedopọ hẹ Mama. To bẹjẹeji, n’lẹndọ eyin n’dotoaina yé, yelọsu na dotoaina mi bọ jijọho na gọwá whẹndo lọ mẹ. Gbọnvona enẹ, tẹnpọn he n’na basi nado biọ wehọmẹ daho to sisẹpọ bọ n’dona wleawu. Enẹwutu, n’yigbe nado wà nuhe mẹjitọ ṣie lẹ dọ bo ma yì opli na osun atọ̀n, ṣigba n’dopà na Jehovah dọ n’na gọ̀ opli bẹ to osun atọ̀n lọ lẹ godo.

Nudide he n’basi ma sọgbe na whẹwhinwhẹ́n awe wutu. Tintan, n’lẹndọ owanyi he n’tindo na Jehovah ma na depò to osun atọ̀n lọ lẹ gblamẹ. Ṣigba, haṣinṣan he n’tindo hẹ ewọ wá depò po awuyiya po. Awetọ, kakati nado nọte do alọhẹndotenamẹ enẹlẹ ji, Mama  po Papa po sọ gbidikọna mi dogọ nado doalọtena nuhe gando sinsẹ̀n-bibasi nugbo go lẹpo.

To Plitẹnhọ Ahọluduta tọn mẹ, n’mọ mẹsusu he to pipehẹ nukundiọsọmẹ whẹndo tọn. Yé hẹn mi deji dọ Jehovah na na mi huhlọn. (Mat. 10:34-37) Yé dọna mi dọ yẹn ji wẹ Jehovah jlo na gbọn do whlẹn whẹndo ṣie gán. Enẹwutu, n’jẹ dẹ̀ho ji vẹkuvẹku bo jlo na plọn nado nọ ganjẹ Jehovah go.

Hagbẹ whẹndo ṣie tọn lẹ dohomẹkẹn mi to aliho susu mẹ. Mama nọ to vivẹ̀ mi bosọ nọ tẹnpọn nado diọlinlẹnna mi. N’nọ saba nabọẹ. Amọ́ eyin n’dọho, mí nọ saba dọnnu, na mí omẹ awe lẹ nọ to tintẹnpọn nado dohia dọ nuhe dọ mí te wẹ sọgbe. N’wá mọdọ ninọmẹ lọ sọgan ko pọnte, eyin n’kẹalọyi pọndohlan Mama tọn po nuyise etọn lẹ po. Mẹjitọ ṣie lẹ nọ de whégbè-zọ́n susu na mi, na ma do gbọṣi whégbè. To whedelẹnu, yé nọ suhọ̀n do mi do gbonu kavi nọ dù núdùdù lẹpo tẹ̀ mi.

Mama biọ alọgọ mẹdevo lẹ tọn. E dọna mẹplọntọ ṣie nado dọhona mi, amọ́ mẹplọntọ ṣie ma dádo whẹho lọ mẹ. Mama plan mi yì ogán etọn dè to azọ́nmẹ na ewọ nido dohia mi dọ sinsẹ̀n lẹpo wẹ yin ovọ́. To whégbè, Mama nọ tẹkan hlan hẹnnumẹ mítọn lẹ bo nọ biọ alọgọ yetọn po avi po. Ehe nọ vẹna mi, amọ́ to opli lẹ ji, tulinamẹ mẹho lẹ tọn nọ hẹn mi nado mọdọ kunnude wẹ Mama te to mayọnẹn mẹ na mẹhe e to ohó ṣie dọna lẹpo.

N’wá pannukọn whẹho wehọmẹ alavọ tọn yìyì tọn. Mẹjitọ ṣie lẹ jlo dọ ma yì wehọmẹ enẹ, na yé lẹndọ ehe na zọ́n bọ n’na wá mọ agbasazọ́n dagbe de. Mí ma nọ penugo nado dọhodo  whẹho ehe ji to jijọho mẹ. Enẹwutu, n’gbọ bo nọ kanwe na Mama po Papa po nado dọ yanwle ṣie lẹ na yé. Papa gblehomẹ bo sìn-adán dọmọ: “Eyin nude wẹ a lẹndọ emi na wà nado mọ azọ́n, bo yawu jẹeji to osọ, e ma yinmọ a ma to owhé ehe gbè na nọ.” N’hodẹ̀ na Jehovah do whẹho lọ ji. To wunkẹngbe he n’to lizọnyizọn lọ mẹ, mẹmẹyọnnu voovo awe biọ to asi e nado yin mẹplọntọ whégbè tọn na ovi yetọn lẹ. Homẹ Papa tọn ma hùn do ehe go, e ma tlẹ nọ dọho hẹ mi ba bo jẹ vọdona mi ji. Mama dọ dọ e na ko jlo emi dọ ma yin sẹ́nhẹngbatọ de hugan dọ ma yin Kunnudetọ Jehovah tọn.

To whedelẹnu, n’nọ kanse dee eyin ojlo Jehovah tọn wẹ e yin dọ ma jẹagọdo nubiọtomẹsi mẹjitọ ṣie lẹ tọn sọmọ. Ṣigba, dẹ̀hiho gọna ayihamẹlinlẹnpọn do wefọ Biblu tọn he dọhodo owanyi Jehovah tọn ji lẹ ji gọalọna mi nado tindo pọndohlan dagbe gando nukundiọsọmẹ lọ go, bosọ mọnukunnujẹemẹ jẹ obá de mẹ dọ onú ṣie wẹ to ahunmẹduna mẹjitọ ṣie lẹ. Jehovah gọalọna mi nado lẹnnupọn to aliho he sọgbe mẹ bo yọ́n nuhe n’na wà. Humọ, lehe n’to mahẹ tindo to lizọnyizọn lọ mẹ do sọ, mọ wẹ n’nọ duvivi etọn do niyẹn. N’wá tindo yanwle nado lẹzun gbehosọnalitọ.

To whenue mẹmẹyọnnu delẹ yọnẹn dọ n’jlo na lẹzun gbehosọnalitọ, yé na mi ayinamẹ dọ ma nọte jẹ whenue homẹgble mẹjitọ ṣie lẹ tọn na depò. N’hodẹ̀ bo biọ nuyọnẹn, n’basi dodinnanu, bo gbeje mẹwhinwhàn ṣie pọ́n, bosọ dọho hẹ mẹmẹsunnu po mẹmẹyọnnu he whèwhín delẹ po. N’wá tadona lọ kọ̀n dọ homẹ Jehovah tọn wẹ n’jlo na hẹn hùn. Podọ, eyin n’tlẹ dọngbàn nado bẹ gbehosọnalitọ jẹeji, enẹ ma na zọ́n bọ mẹjitọ ṣie lẹ na diọ pọndohlan yetọn.

To whenue n’to owhe godo tọn ṣie mẹ to wehọmẹ daho wẹ n’lẹzun gbehosọnalitọ. To whenue n’basi gbehosọnalitọ na ojlẹ vude godo, e jlo mi nado yì sẹ̀n to fie nuhudo sù te. Amọ́, Papa po Mama po ma jlo dọ ma yì sọn whégbè. Enẹwutu, n’nọte kakajẹ whenue n’tindo owhe 20. Na ayiha Mama tọn nido jai, n’biọ to wekantẹn alahọ tọn si nado deazọ́nna mi do hùwaji Japon tọn, fie hẹnnumẹ mítọn lẹ te.

Azọ́ndenamẹ enẹ hẹn dona wá na mi, na susu mẹhe n’plọnnu hẹ lẹ tọn wẹ yí baptẹm. To ojlẹ lọ mẹ, n’sọ plọn Glẹnsigbe nado gbloada na lizọnyizọn ṣie. Mẹmẹsunnu awe tin to agun ṣie mẹ bo yin gbehosọnalitọ titengbe. N’doayi zohunhun yetọn po lehe yé nọ gọalọna mẹdevo lẹ do po go. Enẹwutu, n’ze yanwle lọ dai nado lẹzun gbehosọnalitọ titengbe. To ojlẹ enẹ mẹ, whla awe wẹ azọ̀n dotukla Mama taun. Whla awe lọ lẹpo wẹ n’lẹkọyi whé nado penukundo ewọ go. Ehe paṣa ẹ taun bọ nuyiwa etọn hẹ mi diọ pẹẹde.

To owhe ṣinawe godo, Atsushi he yin dopo to gbehosọnalitọ titengbe he go n’donù lọ lẹ mẹ kanwehlan mi. E dọ emi to nulẹnpọn do alọwle ji bo jlo na yọnẹn eyin n’yiwanna emi. N’ma tindo numọtolanmẹ owanyi tọn vonọtaun de na Atsushi pọ́n, mọ n’ma tlẹ lẹn gbede dọ ewọ lọsu tindo numọtolanmẹ vonọtaun de na mi. To osun dopo godo, n’kanwehlan ẹn dọ e na jlo mi dọ mí ni yọ́n míde dogọ. Mí wá mọdọ yanwle dopolọ lẹ wẹ mí tindo, enẹ wẹ nado doafọna sinsẹ̀nzọn whenu-gigọ́ tọn podọ nado sẹ̀n to adà sinsẹ̀nzọn tọn depope mẹ. To nukọn mẹ, mí wlealọ. Homẹ ṣie hùn taun nado mọ Papa, Mama po hẹnnumẹ ṣie susu po to alọwle mítọn!

To ojlẹ vude godo he mí to sinsẹ̀n taidi gbehosọnalitọ whepoponu tọn, Atsushi yin azọ́ndena  nado pọ́n tẹnmẹ na nugopọntọ lẹdo tọn de. E ma dẹn bọ mí mọ dona devo lẹ yí. Mí yin pipà taidi gbehosọnalitọ titengbe, podọ enẹgodo taidi nugopọntọ lẹdo tọn. Whla tintan he mí dla agun he tin to lẹdo lọ mẹ lẹpo pọ́n godo, alahọ ylọ mí to alokan ji bo kanse mí dọ, ‘Be e na jlo mí nado sẹ̀n taidi nugopọntọ lẹdo tọn to Népal ya?’

N’hanú gando numọtolanmẹ he mẹjitọ ṣie lẹ na tindo go eyin yé sè dọ n’jei fihe dẹn de. N’ylọ yé to alokan ji. Papa gblọn dọmọ: “Ofi dagbe de wẹ a jei.” Osẹ dopo jẹnukọn, họntọn Papa tọn de na ẹn owe de he dọhodo Népal ji, bọ e ko to linlẹn dọ nudagbe wẹ e na yin nado dla otò lọ pọ́n.

Dile mí yí ayajẹ do to sinsẹ̀n to Népal-nu he nọ jọmẹ lẹ ṣẹnṣẹn, mí mọ dona devo yí. Mí na nọ basi dlapọn kaka yì Bangladesh, yèdọ otò de he sẹpọ Népal, bo ka gbọnvona ẹn to nususu mẹ. Aliho kunnudide tọn lẹ gbọnvo taun. To owhe atọ́n godo, mí yin azọ́ndena nado lẹkọyi Japon, fie mí to vivi azọ́n nugopọntọ lẹdo tọn dù te todin.

Sinsẹ̀nzọnwiwa to Japon, Népal po Bangladesh po, plọn mi nususu gando Jehovah go! Aṣa po walọ he tin to otò ehelẹ mẹ po gbọnvo. Mẹhe nọ nọ̀ otò ehelẹ mẹ lẹ sọ gbọnvona yede. N’mọ lehe Jehovah nọ penukundo mẹdopodopo go, nọ kẹalọyi yé, bo nọ gọalọna yé bosọ nọ dona yé do.

Jehovah ko dona mi bọ n’yọ́n ewọ, e na mi azọ́n he n’na wà, podọ asu Klistiani dagbe de. Jiwheyẹwhe ko deanana mi nado basi nudide dagbe lẹ, bọ todin n’tindo haṣinṣan dagbe de hẹ ewọ podọ hẹ whẹndo ṣie. N’dopẹna Jehovah dọ yẹn po Mama po sọ wá lẹzun họntọn vivẹ́. E vivi na mi taun dọ n’wá tindo jijọho hẹ Jiwheyẹwhe podọ hẹ onọ̀ ṣie.