“Jehovah Yọ́n Mẹhe Yin Etọn Lẹ”
“Eyin mẹde yiwanna Jiwheyẹwhe, omẹ ehe wẹ ewọ yọnẹn.”—1 KỌL. 8:3.
1. Kandai Biblu tọn tẹwẹ do linlẹn agọ̀ he omẹ Jiwheyẹwhe tọn delẹ tindo to hohowhenu hia? (Pọ́n yẹdide he tin to bẹjẹeji hosọ ehe tọn.)
TO AFỌNNU gbèdopo, Yẹwhenọ Daho Aalọn hẹn miyọ́n-hẹnnu he ji e to nuyọnwan mẹ̀ te de bo ṣite to họntonu gòhọtúntún Jehovah tọn. Ṣigba to fie ma dẹn do finẹ, Kola po sunnu 250 po to nuyọnwan mẹ̀ to Jehovah nukọn, omẹ dopodopo po miyọ́n-hẹnnu etọn po. (Sọh. 16:16-18) E taidi dọ sunnu lọ lẹpo wẹ yin sinsẹ̀n-basitọ nugbonọ Jehovah tọn lẹ. Ṣigba to vogbingbọn mẹ na Aalọn, mẹhe pò lẹ yin atẹṣitọ goyitọ lẹ he to tintẹnpọn nado hò yẹwhenọduta lọ yí. (Sọh. 16:1-11) Yé to yede klọ po linlẹn lọ po dọ Jiwheyẹwhe na kẹalọyi sinsẹ̀n-bibasi yetọn. Ṣigba, linlẹn yetọn hẹn homẹgblena Jehovah, yèdọ mẹhe sọgan yọ́n nuhe tin to ahun yetọn mẹ lẹ bo mọ yẹnuwiwa yetọn.—Jel. 17:10.
2. Etẹwẹ Mose dọ jẹnukọn, podọ be nuhe e dọ lọ jọ ya?
2 Nuhe sọgbe wẹ e yin dọ Mose ko dọ to azán he jẹnukọnna afọnnu enẹ gbè dọmọ: “To afọnnu OKLUNỌ lọ na do mẹhe yin etọn hia.” (Sọh. 16:5) Na nugbo tọn, Jehovah do vogbingbọn hia to sinsẹ̀n-basitọ nugbo po mẹhe yí yẹnuwiwa do to sinsẹ̀n ẹn lẹ po ṣẹnṣẹn to whenue “miyọ́n sọ jẹgbonu sọn OKLUNỌ lọ dè wá, bo fiọ [Kola gọna] sunnusi fọdekandeao lẹ lọ he yí nuyọnwan lọ na.” (Sọh. 16:35; 26:10) To ojlẹ dopolọ mẹ, Jehovah whlẹn Aalọn gán nado dohia dọ ewọ wẹ yin yẹwhenọ he emi kẹalọyi po sinsẹ̀n-basitọ nugbo Jiwheyẹwhe tọn po.—Hia 1 Kọlintinu lẹ 8:3.
3. (a) Nujijọ tẹwẹ wá aimẹ to ojlẹ apọsteli Paulu tọn mẹ? (b) Etẹwẹ nuhe Jehovah wà na atẹṣitọ lẹ to ojlẹ Mose tọn mẹ plọn mí?
3 Nujijọ mọnkọtọn de wá aimẹ to nudi owhe 1 500 godo to ojlẹ apọsteli Paulu tọn mẹ. Mẹdelẹ he ylọ yede dọ Klistiani kẹalọyi nuplọnmẹ lalo lẹ, etomọṣo yé gbẹ́ to gbẹdo hẹ agun lọ. To nukun gbẹtọ paa de tọn mẹ, atẹṣitọ ehelẹ ma na ko yí nude do gbọnvo na mẹhe pò to agun lọ mẹ lẹ. Ṣigba, atẹṣiṣi yetọn yin owù na Klistiani nugbonọ lẹ. Ohla he ze avọ̀ lẹngbọ tọn do ehelẹ jẹ “yise mẹdelẹ tọn husudo” ji. (2 Tim. 2:16-18) Ṣigba, Jehovah ma nọ mọnú di gbẹtọ paa de, podọ Paulu yọ́n ehe ganji, na e yọ́n aliho he mẹ Jiwheyẹwhe yinuwa sọta atẹṣitọ lẹ te, yèdọ Kola po godonọnamẹtọ etọn lẹ po to owhe kanweko susu lẹ jẹnukọn. Enẹwutu, mì gbọ mí ni lẹnnupọndo adà Owe-wiwe lẹ tọn ehe ji bo pọ́n nuplọnmẹ yọ́n-na-yizan he mí sọgan mọyi sọn e mẹ lẹ.
“YẸN OKLUNỌ LỌ MA DIỌ”
4. Nujikudo tẹwẹ Paulu tindo, podọ nawẹ e do nujikudo etọn hia Timoti gbọn?
4 Paulu kudeji dọ Jehovah nọ doayi mẹhe to sinsẹ̀n ẹn po yẹnuwiwa po lẹ, podọ e sọ kudeji dọ Jehovah penugo nado yọ́n mẹhe nọ setonuna Ẹn lẹ go. Paulu do nujikudo sinsinyẹn etọn hia to hogbe he e yizan to whenue e to wekanhlan Timoti to gbọdo glọ lẹ mẹ. To whenue Paulu donù awugble he atẹṣitọ lẹ ko to hinhẹnwa agun lọ ji to gbigbọ-liho go godo, e dọmọ: “Mahopọnna enẹ lẹpo, dodonu dolido Jiwheyẹwhe tọn gbọṣi ote, bo tindo hiadonu ehe dọmọ: ‘Jehovah yọ́n mẹhe yin etọn lẹ,’ podọ: ‘Gbọ mẹhe to oyín Jehovah tọn ylọ lẹpo ni gbẹ́ mawadodo dai.’”—2 Tim. 2:18, 19.
5, 6. Etẹwẹ hodidọ Paulu tọn lọ, “dodonu dolido Jiwheyẹwhe tọn” plọn mí, podọ nawẹ enẹ na ko yinuwado Timoti ji gbọn?
5 Etẹwẹ jẹna ayidego to hogbe he Paulu yizan to wefọ ehe mẹ lẹ mẹ? To Biblu mẹ, wefọ ehe kẹdẹ mẹ wẹ hodidọ lọ “dodonu dolido Jiwheyẹwhe tọn” sọawuhia te. Biblu nọ yí hogbe lọ ‘dodonu’ jlẹdo onú susu go, podọ dopo to yé mẹ wẹ Jelusalẹm he yin tatọ́-tònọ Islaeli hohowhenu tọn. (Ps. 87:1, 2) Azọngban he Jesu to yiyiwà to lẹndai Jehovah tọn mẹ lọsu yin yiyijlẹdo dodonu de go. (1 Kọl. 3:11; 1 Pita 2:6) Etẹwẹ Paulu tindo to ayiha mẹ to whenue e kanwe gando “dodonu dolido Jiwheyẹwhe tọn” go?
6 To whenue Paulu yihodọ sọn hodidọ Mose tọn he gando Kola po godonọnamẹtọ etọn lẹ po go to Osọha lẹ 16:5 mẹ godo, wẹ e donù “dodonu dolido Jiwheyẹwhe tọn” go. E họnwun dọ, Paulu to alọdlẹndo nujijọ he wá aimẹ to ojlẹ Mose tọn mẹ lẹ nado na tuli Timoti, bo flinnu in dọ Jehovah tindo nugopipe nado doayi atẹṣitọ lẹ go bo yinuwa sọta yé. Atẹṣitọ he tin to agun lọ mẹ lẹ ma sọgan glọnalina lẹndai Jehovah tọn, kẹdẹdile Kola ma penugo nado wàmọ do to owhe kanweko susu lẹ jẹnukọn. Paulu ma basi zẹẹmẹ nuhe “dodonu dolido Jiwheyẹwhe tọn” lọ nọtena tọn to gigọ́ mẹ. Ṣigba, ayihaawe ma tin dọ hogbe he e yizan lẹ vọ́ jide na Timoti nado dejido aliho he mẹ Jehovah nọ yinuwa te lẹ go.
7. Naegbọn mí sọgan kudeji dọ Jehovah na nọ yinuwa po dodowiwa po bo nasọ yin nugbonọ to whelẹponu?
7 Nunọwhinnusẹ́n yiaga Jehovah tọn lẹ ma nọ diọ. Psalm 33:11 dọmọ: “Hónamẹ OKLUNỌ tọn nọtegligli kakadoi; linlẹn ayiha etọn mẹ tọn jẹ whẹndo lẹpo mẹ.” Wefọ devo lẹ dọho gando gandudu, dagbewanyi, dodowiwa, po nugbonọ-yinyin Jehovah tọn po go taidi nuhe na nọ aimẹ kakadoi. (Eks. 15:18; Ps. 106:1; 112:9; 117:2) Malaki 3:6 dọmọ: “Yẹn OKLUNỌ lọ ma diọ.” Mọdopolọ Jakọbu 1:17 dọ dọ “didiọ lilẹpe oyẹ̀ tọn de ma tin to” Jehovah dè.
“HIADONU” DE HE NỌ GỌALỌNA MÍ NADO TINDO YISE TO JEHOVAH MẸ
8, 9. Etẹwẹ mí sọgan plọn sọn nuhe yin kinkan do “hiadonu” he go Paulu donù ji mẹ?
8 Hogbe he Paulu yizan to 2 Timoti 2:19 mẹ lẹ dohia dọ owẹ̀n de tin to dodonu lọ ji taidi dọ, e yin kinkan po hiadonu de po. To hohowhenu, nude nọ saba yin kinkan do dodonu ohọ̀ de tọn go, vlavo nado do mẹhe gbá ẹ kavi mẹhe tọn e yin hia. Paulu wẹ yin Biblu kantọ tintan he yí apajlẹ mọnkọtọn zan. * Hodidọ awe wẹ yin kinkando hiadonu he tin to “dodonu dolido Jiwheyẹwhe tọn” go lọ ji. Tintan, “Jehovah yọ́n mẹhe yin etọn lẹ” podọ awetọ, “Gbọ mẹhe to oyín Jehovah tọn ylọ lẹpo ni gbẹ́ mawadodo dai.” Ehe flin mí nuhe mí hia to Osọha lẹ 16:5 mẹ.—Hia.
9 Etẹwẹ mí sọgan plọn sọn nuhe yin kinkan do “hiadonu” he go Paulu donù ji mẹ? Na mẹhe yin Jiwheyẹwhe tọn lẹ, nunọwhinnusẹ́n po nujinọtedo Jehovah tọn lẹ po sọgan yin kinkọndopọ do nugbo titengbe awe: (1) Jehovah yiwanna mẹhe yin nugbonọ na ẹn lẹ, podọ (2) Jehovah gbẹwanna mawadodo. Nawẹ nugbo ehe gando whẹho atẹṣiṣi tọn go to agun mẹ gbọn?
10. Nawẹ nuyiwa atẹṣitọ lẹ tọn yinuwado Klistiani nugbonọ lẹ ji to ojlẹ Paulu tọn mẹ gbọn?
10 Nuyiwa atẹṣitọ lẹ tọn na ko dotukla Timoti po Klistiani devo lẹ po. Klistiani delẹ na ko nọ kanse yede nuhewutu atẹṣitọ enẹlẹ do yin dotẹnmẹna nado gbọṣi agun lọ mẹ. Klistiani nugbonọ lẹ sọgan ko kanse yede eyin Jehovah nọ yọ́n vogbingbọn to nugbonọ-yinyin yetọn hlan ẹn po sinsẹ̀n-bibasi yẹnuwiwa tọn atẹṣitọ lẹ tọn po ṣẹnṣẹn.—Owalọ 20:29, 30.
Nuyiwa atẹṣitọ lẹ tọn ma na ko yinuwado Timoti ji to aliho agọ̀ mẹ (Pọ́n hukan 10-12)
11, 12. Nawẹ wekanhlanmẹ Paulu tọn dona ko hẹn yise Timoti tọn lodo gbọn?
11 Wekanhlanmẹ Paulu tọn flinnu Timoti gando nuhe jọ go to whenue Jehovah yiavùnlọna Aalọn bo de Kola yẹnuwatọ lọ po godonọnamẹ etọn lẹ po gbà, gbẹ́ yé dai bo và yé sudo. Ayihaawe ma tin dọ enẹ hẹn yise Timoti tọn lodo. Na nugbo tọn, Paulu to didọ dọ eyin Klistiani yẹnuwatọ lẹ tlẹ tin to ṣẹnṣẹn yetọn, Jehovah penugo nado yọ́n mẹhe yin etọn nugbonugbo lẹ, kẹdẹdile e wà do to ojlẹ Mose tọn mẹ.
12 Jehovah ma nọ diọ pọ́n gbede, enẹwutu mí sọgan dejido ewọ go. E gbẹwanna mawadodo podọ to ojlẹ sisọ mẹ, e nọ dawhẹna ylanwatọ he ma lẹnvọjọ lẹ. Na Timoti yin dopo to mẹhe “to oyín Jehovah tọn ylọ” lẹ mẹ, apọsteli Paulu flinnu in gando azọngban he e tindo nado gbẹ́ nuyiwadomẹji ylankan Klistiani yẹnuwatọ lẹ tọn dai go. *
SINSẸ̀N-BIBASI NUGBO MA NỌ YIN OVỌ́ GBEDE
13. Jidide tẹwẹ mí sọgan tindo?
13 Hogbe gbọdo Paulu tọn lẹ sọgan hẹn mílọsu lodo to gbigbọ-liho. Jẹnukọn whẹ́, mí nọ vọ́ jide mọyi nado yọnẹn dọ eyin mí yin nugbonọ na Jehovah, ewọ nọ yọnẹn. E ma yindọ e nọ yọnẹn kẹdẹ wẹ gba. Jehovah tindo ojlo sinsinyẹn to mẹhe yin etọn lẹ mẹ. Biblu dọmọ: “Nukun OKLUNỌ tọn lẹ to godo po nukọn po yì lẹdo aigba lẹpo pete, nado do ede hia huhlọnnọ na ayiha yé mẹhe tọn yin pipé hlan e dè lẹ tọn.” (2 Otan. 16:9) Enẹwutu, mí sọgan deji mlẹnmlẹn dọ nuhe mí nọ wà na Jehovah “sọn ahun wiwe de mẹ” lẹ ma yin ovọ́ gbede.—1 Tim. 1:5; 1 Kọl. 15:58.
14. Sinsẹ̀n-bibasi tẹwẹ Jehovah ma nọ kẹalọyi?
14 E sọ jẹna ayidego nado yọnẹn dọ Jehovah ma nọ kẹalọyi sinsẹ̀n-bibasi yẹnuwiwa tọn. Dile nukun etọn lẹ “to godo po nukọn po yì lẹdo aigba lẹpo pete,” ewọ sọgan yọ́n mẹhe ahun yetọn ma “yin pipé hlan e dè” lẹ. Howhinwhẹn lẹ 3:32 dọ dọ “Osùnú de wẹ tasinyẹntọ [kavi yẹnuwatọ] yin hlan OKLUNỌ,” yèdọ omẹ de he nọ desọn ojlo mẹ nado do ede hia taidi tonusetọ to gbangba to whenue e nọ to ylando wà to nuglọ. Dile etlẹ yindọ yẹnuwatọ de sọgan doyẹklọ gbẹtọvi lẹ na ojlẹ de, “ewọ he ṣinyọnnudo ylanwa etọn ma na wà dagbe,” na Jehovah yin nupojipetọ bosọ yin dodonọ wutu.—Howh. 28:13; hia 1 Timoti 5:24; Heblu lẹ 4:13.
15. Etẹwẹ mí dona dapana, podọ etẹwutu?
15 Suhugan omẹ Jehovah tọn lẹ tọn wẹ to sinsẹ̀n ẹn po ahundopo po. E ma yá nado mọ mẹde to agun lọ mẹ he nọ desọn ojlo mẹ nado sẹ̀n Jehovah po yẹnuwiwa po. Etomọṣo, eyin e jọ to ojlẹ Mose tọn mẹ podọ to agun Klistiani owhe kanweko tintan tọn mẹ, e sọgan sọ jọ to egbehe. (2 Tim. 3:1, 5) Ṣigba, be enẹ dohia dọ mí dona nọ vẹnudo Klistiani hatọ mítọn lẹ bo nọ tindo ayihaawe gando nugbonọ-yinyin yetọn hlan Jehovah go wẹ ya? Paali! E ma sọgbe nado nọ vẹnudo mẹmẹsunnu po mẹmẹyọnnu mítọn lẹ po matin dodonu depope. (Hia Lomunu lẹ 14:10-12; 1 Kọlintinu lẹ 13:7.) Humọ, eyin mí tindo ayilinlẹn lọ ma nado nọ dejido tenọgli mẹdevo lẹ tọn go to agun lọ mẹ, enẹ na hẹn gbigbọnọ-yinyin mílọsu tọn gble.
16. (a) Etẹwẹ dopodopo mítọn dona nọ wà, na yẹnuwiwa nikaa doadọ̀do to ahun mítọn mẹ? (b) Etẹwẹ mí sọgan plọn sọn apotin he hosọ etọn yin, ‘Mì Nọ Tẹ́n Mìde Pọ́n bo Nọ Dindona Mìde’ mẹ?
16 Klistiani dopodopo dona “nọ dindona azọ́n edetiti tọn.” (Gal. 6:4) Na ayilinlẹn ylando tọn mítọn lẹ wutu, whedepopenu wẹ e yọnbasi dọ mí ni wleawuna jijọ ylankan lẹ. (Heb. 3:12, 13) Enẹwutu, sọn ojlẹ de mẹ jẹ devo mẹ, mí sọgan nọ dindona mẹwhinwhàn he wutu mí to Jehovah sẹ̀n. Mí sọgan kanse míde dọ, ‘Be n’yiwanna Jehovah bo kẹalọyi nupojipetọ-yinyin etọn wutu wẹ n’to sinsẹ̀n ẹn ya? Kavi dona agbasa tọn he n’to nukundo nado duvivi etọn to Paladisi mẹ lẹ wẹ n’nọ na ayidonugo zẹjlẹgo?’ (Osọ. 4:11) Na nugbo tọn, mímẹpo sọgan mọaleyi, eyin mí nọ dindona nuyiwa mítọn lẹ bo nọ de okún yẹnuwiwa tọn depope sẹ̀ sọn ahun mítọn mẹ.
NUGBONỌ-YINYIN NỌ HẸN AYAJẸ WÁ
17, 18. Naegbọn mí dona yin nugbonọ podọ ahundoponọ to sinsẹ̀n-bibasi mítọn hlan Jehovah mẹ?
17 Mí nọ mọ ale susu yí dile mí to vivẹnudo nado yin nugbonọ podọ ahundoponọ to sinsẹ̀n-bibasi mítọn mẹ. Psalm-kantọ lọ dọmọ: “Donanọ wẹ dawe lọ mẹhe OKLUNỌ ma hia ylanwiwa dokọna; ayiha mẹhe tọn mẹ oklọ depope ma te.” (Ps. 32:2) Na nugbo tọn, mẹhe de yẹnuwiwa lẹpo sẹ̀ sọn ahun yetọn mẹ lẹ nọ tindo ayajẹ taun bosọ nọ pegan nado duvivi ayajẹ pipé de tọn to sọgodo.
18 To ojlẹ sisọ mẹ, Jehovah na de mẹhe to nuylankan wà po mẹhe to gbẹzan awe zan lẹ po gbà, bo gbọnmọ dali do “vogbingbọn to dodonọ po mẹylankan po ṣẹnṣẹn, to ewọ he to Jiwheyẹwhe sẹ̀n po ewọ he ma to sinsẹ̀n ẹn po ṣẹnṣẹn” hia. (Mal. 3:18) Amọ́ todin whẹ́, jidenamẹnu wẹ e yin nado yọnẹn dọ “nukun Jehovah tọn lẹ tin to dodonọ lẹ ji, podọ otó etọn lẹ hùn hlan ovẹ̀ yetọn.”—1 Pita 3:12.
^ huk. 8 Osọhia 21:14 he yin kinkan owhe susu to whenue Paulu kanwehlan Timoti godo, donù “zannu dodonu tọn” 12 go, ehe go oyín apọsteli 12 lẹ tọn yin kinkan do.
^ huk. 12 Hosọ he bọdego dọhodo lehe mí sọgan hodo apajlẹ Jehovah tọn nado gbẹ́ mawadodo dai do ji.
