Yé Ze Yede Jo sọn Ojlo mẹ Wá—To Philippines

TO NUDI owhe ao die, Gregorio po Marilou po, yèdọ asu po asi po he tindo owhe 30 linlán to sinsẹ̀n taidi gbehosọnalitọ to Manille podọ to ojlẹ dopolọ mẹ, yé nọ wà agbasazọ́n he nọ yí whenu susu to yé si. E ma bọawuna yé, ṣigba yé tindo kọdetọn dagbe to ninọmẹ ehe mẹ. Enẹgodo, Marilou yin dide taidi anadenanutọ akuẹsẹdotẹn he e to azọ́nwa te tọn. Marilou dọmọ: “Na mí tindo agbasazọ́n he pekuẹ wutu, mí nọ zan gbẹzan fẹẹmẹninọ tọn.” Na nugbo tọn, nulẹ to yìyì ganji na asu po asi po lọ to akuẹzinzan-liho sọmọ bọ yé basi dide nado gbá ohọ̀ he nọ jlo yé hugan do lẹdo dagbe de mẹ to nudi kilomẹtlu 19 to whèzẹtẹn-waji Manille tọn. Yé basi tito hẹ azọ́nwhé de nado gbá ohọ̀ lọ bo magbe nado nọ sú akuẹ azọ́n lọ tọn to sunmẹsunmẹ na owhe ao.

“N’MỌDỌ N’TO AJOJẸ DO JEHOVAH”

Marilou dọmọ: “Otẹn yọyọ he mẹ n’jẹ to azọ́n ṣie mẹ zọ́n bọ n’nọ yí whenu po huhlọn susu po zan sọmọ bọ n’masọ tindo zohunhun na gbigbọnu lẹ ba. N’mọdọ n’to ajojẹ do Jehovah.” E yidogọ dọmọ: “N’masọ penugo nado nọ yí whenu he n’ko klandovo na Jehovah zan to sinsẹ̀nzọn etọn mẹ ba.” Na ninọmẹ ehe  ma hẹn homẹhun Gregorio po Marilou po wutu, yé sinai to gbèdopo bo dọhodo nuhe yé yí gbẹzan yetọn do to wiwà ji. Gregorio dọmọ: “Mí jlo nado basi vọjlado, amọ́ mí ma yọ́n nuhe mí na wà taun. Mí dọhodo lehe mí sọgan yí míde zan to gigọ́ mẹ to sinsẹ̀nzọn Jehovah tọn mẹ do ji, titengbe to whenue e yindọ mí ma tindo ovi. Mí hodẹ̀ na Jehovah nado biọ anademẹ etọn.”

To ojlẹ enẹ mẹ, mí sè togunmẹho voovo lẹ he dọhodo sinsẹ̀nzọnwiwa to fie nuhudo wẹnlatọ Ahọluduta lọ tọn lẹ sù te ji. Gregorio dọmọ: “Mí mọdọ gblọndo odẹ̀ mítọn lẹ tọn wẹ Jehovah na mí gbọn togunmẹho enẹlẹ gblamẹ.” Asu po asi po lọ hodẹ̀ bo biọ yise do yise ji nado sọgan tindo adọgbigbo nado basi nudide he sọgbe lẹ. Aliglọnnamẹnu daho dopo wẹ tito họ̀gbigbá tọn yetọn he yé ko bẹjẹeji lọ. Yé ko sú akuẹ azọ́n lọ tọn na owhe atọ̀n. Etẹwẹ yé na wà? Marilou dọmọ: “Eyin mí doalọtena tito họ̀gbigbá tọn lọ, akuẹ susugege he mí ko sú lẹpo na gú mí. Ṣigba, mí mọdọ mí dona basi nudide vlavo nado ze ojlo Jehovah tọn wiwà do otẹn tintan mẹ kavi nado doafọna ojlo mídetiti tọn.” Na yé hẹn hogbe apọsteli Paulu tọn he gando ‘kọgbigbẹ́ onú lẹpo’ go do ayiha mẹ wutu, yé doalọtena tito họ̀gbigbá tọn lọ, jo agbasazọ́n yetọn lẹ do bo sà suhugan nutindo yetọn lẹ tọn bosọ sẹtẹn yì gbétatò he to olá de mẹ to lopo Palawan tọn ji, to nudi kilomẹtlu 480 to hùwaji Manille tọn.—Flp. 3:8.

YÉ “PLỌN AṢLI” LỌ

Whẹpo Gregorio po Marilou po nado sẹtẹn, yé dovivẹnu nado hẹn gbẹzan yetọn bọawu, ṣigba kaka yé do jẹ fihe yé jei, yé ma yọnẹn dọ ninọmẹ gbẹzan yetọn tọn na yìdo hugan nuhe yé lẹn. Marilou dọmọ: “Ninọmẹ lọ kàn dẹpẹ biọ. Miyọ́n lẹtliki tọn ma tin, podọ nuyizan he nọ hẹn azọ́nwiwa bọawu depope ma tin. To dai, adògbẹ́ he nọ zan miyọ́n lẹtliki tọn wẹ mí nọ yí do danú, ṣigba tofi, nake wẹ mí nọ zẹ̀ bo nọ flọ miyọ́n nado danú. N’jẹdò onú delẹ tọn taidi nado nọ whleahi to ṣọfu lẹ mẹ, nado nọ dùnú to tòhomẹ po nudevo lẹ po he nọ tin to tòdaho mẹ.” Etomọṣo, asu po asi po lọ nọ to nuflin yede gando nuhewutu yé do sẹtẹn go, podọ e ma dẹn bọ yé diọada sọgbe hẹ ninọmẹ lọ. Marilou dọmọ: “Todin, n’nọ mọ ayajẹ eyin n’to nulẹnpọn do whanpẹ lẹdo lọ tọn po sunwhlẹvu he nọ to sisẹ́ to zánmẹ lẹ po ji. Hú popolẹpo, homẹhunnu wẹ e nọ yin nado mọ lehe gbẹtọ lẹ nọ gọ́ na ayajẹ do to whenue mí dọyẹwheho na yé. Dile mí to sinsẹ̀n tofi, mí ko ‘plọn aṣli’ lehe yè nọ tindo pekọ do tọn.”—Flp. 4:12.

Gregorio dọmọ: “Kunnudetọ ẹnẹ poun wẹ tin tofi to whenue mí wá. E vivi na yé taun to whenue n’jẹ togunmẹho dọ ji to osẹ lẹpo mẹ bo nọ yí ginta ṣie zan nado jihàn Ahọluduta lọ tọn lẹ hẹ yé. To owhe dopo gblamẹ, kándo pẹvi enẹ lẹzun agun zohunhunnọ de he bẹ wẹnlatọ 24 hẹn. Gregorio dọmọ: “Owanyi he agun ehe dohia mí yinuwado mí ji sisosiso.” To egbehe, to whenue yé lẹnnupọndo owhe ṣidopo linlán he yé yizan to  lẹdo enẹ mẹ ji, yé dọmọ: “Mí tindo ayajẹ mayọnjlẹ to whenue mẹyọyọ susu wá kọnawudopọ hẹ agun lọ. Mí mọdọ gbẹzan mítọn tindo lẹndai todin hugan gbede pọ́n.”

“N’KO ‘DỌ́PỌ́N BOSỌ MỌDỌ JEHOVAH YỌ́N’!”

To Philippines, nudi mẹmẹsunnu po mẹmẹyọnnu 3 000 po wẹ sẹtẹn yì fie nuhudo wẹnlatọ Ahọluduta lọ tọn sù te lẹ. Nudi mẹmẹyọnnu tlẹnnọ 500 wẹ tin to yé mẹ. Lẹnnupọndo apajlẹ Karen tọn ji.

Karen he tindo nudi owhe 25 todin, whẹ́n to tòdaho Baggao tọn mẹ to Cagayan. To whenue e gbẹ́ yin jọja aflanmẹ, e nọ lẹnnupọndo lehe e sọgan gbloada na lizọnyizọn etọn do ji. E dọmọ: “Na n’yọnẹn dọ gli wẹ ojlẹ he pò lọ podọ gbẹtọ wunmẹ lẹpo dona sè owẹ̀n Ahọluduta lọ tọn wutu, n’jlo nado yì sẹ̀n to fie nuhudo wẹnlatọ tọn sù te.” Dile etlẹ yindọ hagbẹ whẹndo etọn tọn delẹ dotuhomẹna ẹn nado doafọna wepinplọn dahodaho lẹ kakati nado sẹtẹn yì lẹdo he tin to olá de mẹ nado dọyẹwheho, Karen hodẹ̀ hlan Jehovah nado biọ anademẹ etọn. E sọ dọho hẹ mẹhe yì sẹ̀n to lẹdo he to olá de mẹ lẹ. To whenue e tindo owhe 18, e sẹtẹn yì lẹdo he to olá de mẹ, ehe dẹn do fihe e nọ nọ̀ na nudi kilomẹtlu 64.

Aigba-denamẹ agun pẹvi he Karen yì gọalọna lọ tọn tin to lẹdo osó tọn de mẹ, ehe tin to huto Pacifique tọn. Karen dọmọ: “Nado tọ́n sọn Baggao yì fie agun yọyọ lọ te, mí zinzọnlin na azán atọ̀n gbọn osó lẹ gblamẹ bo dasá tọ̀sisa voovo he hugan 30.” E yidogọ dọmọ: “Nado yì plọnmẹ Biblu delẹ dè, n’nọ zinzọnlin na gànhiho ṣidopo, bo nọ dọ́ finẹ, podọ to wunkẹngbe, n’sọ nọ zinzọnlin na gànhiho ṣidopo nado lẹkọwa whégbè.” Be e dovivẹnu ehe lẹpo to ovọ́ mẹ wẹ ya? Karen dọ po nukiko po dọmọ: “To whedelẹnu, afọ nọ vẹ́ mi, ṣigba n’penugo nado deanana plọnmẹ Biblu voovo 18. N’ko ‘dọ́pọ́n bosọ mọdọ Jehovah yọ́n’!”—Ps. 34:8.

“N’PLỌN NADO NỌ GANJẸ JEHOVAH GO”

Etẹwẹ whàn Sukhi, yèdọ mẹmẹyọnnu tlẹnnọ de he tindo owhe 40 linlán bo nọ nọ̀ États-Unis, nado sẹtẹn yì Philippines? To 2011, e yì plidopọ lẹdo tọn de fie yè kanhose asu po asi po de te. Yé dọ lehe yé sà suhugan nutindo yetọn lẹ tọn do bo sẹtẹn yì Mexique nado yì gọalọ to azọ́n yẹwhehodidọ tọn mẹ. Sukhi dọmọ: “Numimọ yetọn whàn mi nado jẹ nulẹnpọn ji gando yanwle he ji n’ma ko lẹnnupọndo dai lẹ go.” Na Sukhi wá sọn whẹndo Inde-nu tọn de mẹ wutu, bo sè dọ nuhudo tin nado dọyẹwheho na mẹhe nọ do Punjabi-gbè lẹ to Philippines, e basi dide nado yì gọalọ to finẹ. Nuhahun tẹlẹ wẹ e pehẹ?

Sukhi dọmọ: “E vẹawuna mi nado de to nutindo ṣie he n’na sà po dehe n’ma na sà po ṣẹnṣẹn hugan lehe n’lẹn do. Humọ, to whenue n’ko nọ ohọ̀ ṣie titi mẹ po awuvivo po na owhe 13 godo, n’yì nọpọ́ hẹ whẹndo de na ojlẹ de podọ n’ma voawu to finẹ. Nulẹ vẹawuna mi, ṣigba enẹ gọalọna mi nado plọn lehe n’na zan gbẹzan he bọawu do.” Nuhahun tẹlẹ wẹ e pehẹ to whenue e  sẹtẹn yì Philippines? E dọmọ: “Nuhahun daho hugan he n’pehẹ lẹ wẹ yindọ n’nọ dibuna nutogbẹ̀ flinflin lẹ podọ ajlù whégbè tọn nọ wle mi. N’plọn nado nọ ganjẹ Jehovah go todin hugan gbede pọ́n!” Be e dovivẹnu ehe to ovọ́ mẹ wẹ ya? Sukhi konu bo dọmọ: “Jehovah dọna mí dọ, ‘Tẹ́n mi pọ́n dinvie, eyin yẹn ma na kọ̀n dona de jẹgbonu na mì.’ N’mọ nugbo-yinyin hogbe ehelẹ tọn to whenue whétọ de dọna mi dọ, ‘Whetẹnu wẹ a na lẹkọwa dè e? N’tindo kanbiọ susu nado kanse.’ N’tindo ayajẹ susu po pekọ po na n’penugo nado gọalọna mẹhe jlo na plọn nugbo lọ gando Jehovah go lẹ!” (Mal. 3:10) Sukhi yidogọ dọmọ: “Na nugbo tọn, adà he vẹawu hugan wẹ nado basi nudide nado sẹtẹn. To whenue n’basi nudide lọ godo, awuvivinu wẹ e yin na mi nado mọ lehe Jehovah to nukunpedo nuhudo ṣie he pò lẹ go do.”

“N’DUTO OBU ṢIE JI”

Sime, yèdọ mẹmẹsunnu de he ko wlealọ bo dibla tindo owhe 40 bo nọ nọ̀ Philippines, yì nado wà agbasazọ́n he pekuẹ de to otò de mẹ to Hùwaji Whèyihọ Asie tọn. To whenue Sime tin to finẹ, tuli he e mọyi sọn nugopọntọ lẹdo tọn de dè podọ sọn hodidọ mẹmẹsunnu de tọn mẹ he yin dopo to Hagbẹ Anademẹtọ lọ mẹ whàn ẹn nado ze ojlo Jehovah tọn do otẹn tintan mẹ. Sime dọmọ: “Eyin n’lẹnnupọndo agbasazọ́n ṣie jijodo ji, obu nọ dì mi taun.” Etomọṣo, e jo agbasazọ́n etọn do bo lẹkọyi Philippines. To egbehe, Sime po asi etọn Haidee po to sinsẹ̀n to Davao del Sur to hùwaji Philippines tọn, fie nuhudo wẹnlatọ Ahọluduta lọ tọn he na dọyẹwheho to aigba-denamẹ daho lọ ji tọn tin te. Sime dọmọ: “To whenue n’lẹnnupọndo ojlẹ he wayi ji, homẹ ṣie hùn dọ n’duto obu lọ nado jo agbasazọ́n ṣie do ji bo ze ojlo Jehovah tọn wiwà do otẹn tintan mẹ. Nudepope ma tin he sọgan hẹn pekọ wá na mí to gbẹ̀mẹ sọ nado wà nuhe go mí pé lẹpo na Jehovah!”

“MÍ TINDO PEKỌ NUJỌNU TỌN”

To whenue Ramilo po Juliet po, yèdọ asu po asi po he tindo owhe 30 linlán, sè dọ agun he tin to nudi kilomẹtlu 30 poun do owhé yetọn gbè tindo nuhudo alọgọ tọn, yé ze yede jo nado gọalọ. Enẹwutu to osẹ dopodopo mẹ, eyin jikun to jijà wẹo kavi owhè to hùnhùn, Ramilo po Juliet po nọ zingbejizọnlin susu po kẹkẹ yetọn po nado yì opli lẹ podọ nado tindo mahẹ to azọ́n yẹwhehodidọ tọn mẹ. Mahopọnna dọ gbejizọnlin bibasi gbọn ali he ji odò te lẹ podọ gbọn aná he yin hinhẹndote po okàn po lẹ ji nọ bẹ owù hẹn, homẹ yetọn hùn dọ yé gbloada na lizọnyizọn yetọn. Ramilo dọmọ: “Yẹn po asi ṣie po nọ deanana plọnmẹ Biblu 11! Mí yí nususu do sanvọ́ nado sẹ̀n to fie nuhudo sù te, etomọṣo mí tindo pekọ nujọnu tọn!”—1 Kọl. 15:58.

Be hiẹ jlo na yọ́n nususu dogọ gando sinsẹ̀nzọnwiwa to fie nuhudo wẹnlatọ Ahọluduta lọ tọn sù te to otò towe mẹ kavi to tògodo go ya? Eyin mọ wẹ, dọho hẹ nugopọntọ lẹdo tọn towe bosọ hia hosọ lọ, “Be Hiẹ Sọgan Sẹtẹn Yì ‘Makedonia’ Ya?” to Lizọnyizọn Ahọluduta Tọn Mítọn août 2011 tọn mẹ.

[Nudọnamẹ tangan lẹ to weda 3]

“Mí tindo ayajẹ mayọnjlẹ to whenue mẹyọyọ susu wá kọnawudopọ hẹ agun lọ. Mí mọdọ gbẹzan mítọn tindo lẹndai todin hugan gbede pọ́n.”—Gregorio po Marilou po

[Apotin to weda 4]

LEHE DELẸ TO YÉ MẸ NỌ PENUKUNDO YEDE GO DO

[Zẹẹmẹ yẹdide lẹ tọn to weda 4]

Nudi mẹmẹsunnu po mẹmẹyọnnu 70 po he suhugan yetọn tindo owhe 18 jẹ 50 wẹ tọ́n sọn otò yetọn mẹ bo wá Philippines nado sẹ̀n to fie nuhudo sù te. Robert po Mirjam po, yèdọ asu po asi po he tindo nudi owhe 45 bo wá sọn Allemagne dọ dọ, yé wá finẹ nado sẹ̀n na owhe dopo. Ṣigba, e ko yì owhe 14 bọ yé to finẹ! Nawẹ yé nọ penukundo yede go gbọn? Robert dọmọ: “Na e vẹawu taun nado mọ azọ́n tofi wutu, mí nọ lẹkọyi Allemagne whladopo to owhe dopo mẹ nado wazọ́n na osun atọ̀n. Akuẹ he mí nọ mọ nọ gọalọna mí nado zan gbẹzan he bọawu bo sẹ̀n to Philippines na pipotọ owhe lọ tọn.” Nugbo wẹ dọ e ma bọawu nado nọgbẹ̀ to tògodo, etomọṣo Mirjam dọ dọ, “N’tindo jijọho ahun mẹ tọn bosọ mọ anademẹ Jehovah tọn.” Robert kọngbedopọ bo dọ dọ, “Sinsẹ̀nzọnwiwa tofi ko hẹn yise mítọn lodo dogọ.”

[Yẹdide lẹ to weda 5]

Karen

Sukhi

[Yẹdide lẹ to weda 6]

Sime po Haidee po

Juliet po Ramilo po