TO OWHE kleun de die wayi, Roald po Elsebeth po, yèdọ asu po asi po de he ko dibla tindo owhe 50 to ojlẹ enẹ mẹ nọ nọ̀ Bergen he yin tòdaho awetọ Norvège tọn, podọ onú pọnte na yé to agbasa-liho. Yé yí nugbonọ-yinyin do to godonọna tito agun lọ tọn lẹ to pọmẹ hẹ visunnu yetọn Fabian po viyọnnu yetọn Isabel po. Roald yin mẹho agun tọn, Elsebeth yin gbehosọnalitọ, podọ Isabel po Fabian po yin wẹnlatọ he to dagbewà.

Ṣigba, to septembre 2009, whẹndo lọ de nado ze afọdide ayidego tọn de, enẹ wẹ nado yì dọyẹwheho na osẹ dopo to lẹdo he to olá de mẹ. Roald po Elsebeth po gọna Fabian, he tindo owhe 18 to whenẹnu yì Nordkyn to lẹdo Finnmark tọn mẹ. To finẹ, yé wazọ́n to gbétatò Kjøllefjord tọn mẹ to pọmẹ hẹ mẹmẹsunnu po mẹmẹyọnnu he sẹtẹn wá lẹdo lọ mẹ nado tindo mahẹ to azọ́n yẹwhehodidọ tọn mẹ lẹ po. Roald dọmọ: “To bẹjẹeji osẹ lọ tọn, homẹ ṣie hùn taun dọ n’penugo bo basi tito nado sọgan tindo mahẹ to azọ́n vonọtaun ehe mẹ na osẹ dopo.” Ṣigba dile  osẹ lọ to yìyì, nude wá jẹ ahunmẹduna Roald ji. Etẹwẹ yin nulọ?

Roald dọmọ: “N’ma donukun etọn to whenue gbehosọnalitọ de he nọ yin Mario bo to sinsẹ̀n to Finnmark, kanse eyin mí na jlo nado sẹtẹn yì tòpẹvi Lakselv tọn mẹ nado gọalọna agun he tin to finẹ bo bẹ wẹnlatọ 23 hẹn.” Nuzedonukọnnamẹ madonukun enẹ paṣa Roald taun. E dọmọ: “Yẹn po Elsebeth po ko lẹnnupọndo dotẹnmẹ hundote lọ nado yì sẹ̀n to fihe nuhudo sù te ji, ṣigba e na yin to whenue ovi lẹ na ko whẹ́n bo tọ́n sọn whégbè godo.” Ṣigba, to ojlẹ kleun he Roald yizan nado dọyẹwheho to lẹdo enẹ mẹ lọ gblamẹ, e mọdọ mẹsusu tindo ojlo nado plọnnu gando Jehovah go. Din wẹ yé tindo nuhudo alọgọ tọn, e ma yin to nukọn mẹ. Roald dọmọ: “Nuzedonukọnnamẹ lọ hẹn mi lẹnnupọn taun bo tlẹ do amlọnmadọ́ na mi na azán susu.” Enẹgodo, Mario plan Roald po whẹndo etọn po yì Lakselv, yèdọ nudi kilomẹtlu 240 do hùwaji Kjøllefjord tọn, na Mario jlo dọ yelọsu ni mọ obá he mẹ agun pẹvi lọ tindo nuhudo jẹ wutu.

To Lakselv, Andreas he yin dopo to mẹho agun tọn awe he tin to agun pẹvi lọ mẹ lẹ mẹ do lẹdo lọ po Plitẹnhọ Ahọluduta tọn po hia yé. Agun lọ yí jonọ yetọn po zohunhun po bo dọna Roald po Elsebeth po dọ homẹ yetọn na hùn taun eyin whẹndo yetọn sọgan sẹtẹn wá nado gọalọ to azọ́n Ahọluduta lọ tọn mẹ. Po nukiko yẹsẹ de po, Andreas dọ dọ emi tlẹ ko basi tito de dai na Roald po Fabian po nado mọ agbasazọ́n. Etẹwẹ Roald po whẹndo etọn po na wà?

Fabian dọ to tintan whenu dọmọ: “N’ma tindo ojlo nado sẹtẹn wáfi.” Linlẹn lọ nado jo họntọn vivẹ́ etọn he po e po whẹ́n dopọ to agun dopolọ mẹ lẹ do bo wá nọ tòpẹvi de mẹ ma jẹ etọn ji. Podọ e ma ko fó azọ́nplọnmẹ etọn nado lẹzun lẹtliki-zọ́nwatọ de. Ṣigba, to whenue yè kàn nuhe Isabel he tindo owhe 21 to whenẹnu lẹn gando tẹnsisẹ lọ go sè e, e dọmọ: “Nuhe nọ jlo mi nado wà lọ pẹpẹ niyẹn.” Enẹgodo, e yidogọ dọmọ: “Whedepopenu he n’lẹnnupọndeji, n’nọ kanse dee dọ, ‘Be nudide dagbe de wẹ ehe yin ya? Be n’ma na jẹdò họntọn ṣie lẹ tọn ya? Kavi ma gbọ bo gbọṣi agun ṣie mẹ poun to fihe nulẹ to yìyì ganji te podọ fie onú dagbe lẹ sọgan wá aimẹ te ya?’” Etẹwẹ Elsebeth lẹn gando oylọ-basinamẹ lọ go? E dọmọ: “N’lẹndọ Jehovah wẹ deazọ́n enẹ na whẹndo mítọn, ṣigba n’sọ nọ lẹnnupọndo ohọ̀ mítọn he mí ṣẹṣẹ vọjlado gọna nutindo he mí ko họ̀ do e mẹ sọn owhe 25 die lẹpo ji.”

To vivọnu osẹ lọ tọn, Roald po whẹndo etọn po lẹkọyi Bergen. Dile etlẹ yindọ Lakselv dẹn do finẹ na nudi kilomẹtlu 2 100, yé gbẹ́ nọ to mẹmẹsunnu po mẹmẹyọnnu yetọn he tin to dọ́n lẹ po flin. Elsebeth dọmọ: “N’hodẹ̀ whlasusu hlan Jehovah, podọ n’gbẹ́ nọ tindo hodọdopọ hẹ mẹhe mí jihọntọn hẹ lẹ bọ mí nọ do fọto lẹ po numimọ lẹ po hlan mídelẹ.” Roald dọmọ: “E biọ whenu susu to asi e nado basi nudide lọ. Podọ n’dona lẹnnupọn eyin e na yọnbasi na mí nado penukundo míde go to akuẹzinzan-liho. Nawẹ mí na penukundo míde go gbọn? N’hodẹ̀ hlan Jehovah whlasusu bo dọhodopọ hẹ whẹndo ṣie po mẹmẹsunnu numimọnọ lẹ po.” Fabian dọmọ: “Whedepopenu he n’lẹnnupọndo tẹnsisẹ lọ ji, n’nọ mọdọ n’ma tindo whẹwhinwhẹ́n depope nado gbẹ́ nuzedonukọnnamẹ lọ. N’hodẹ̀ hlan Jehovah whlasusu bọ vudevude, ojlo ṣie nado sẹtẹn sinyẹn dogọ.” Etẹwẹ dogbọn Isabel dali? Nado wleawudai na tẹnsisẹ lọ, e bẹ sinsẹ̀nzọn gbehosọnalitọ tọn jẹeji to agun etọn mẹ. To whenue e ko basi gbehosọnalitọ na osun ṣidopo godo bo ko sọ yí whenu susu zan na oplọn mẹdetiti tọn to ojlẹ enẹ dopolọ mẹ, e mọdọ emi ko wleawufo nado sẹtẹn.

Dile ojlo whẹndo lọ tọn nado yì sẹ̀n to fie nuhudo wẹnlatọ lẹ tọn sù te fọ́n bo to sinsinyẹn deji, yé ze afọdide lẹ nado jẹ yanwle yetọn kọ̀n. Roald tindo agbasazọ́n he pekuẹ de he e yiwanna taun, ṣigba e biọ nado yí gbọjẹ na owhe dopo blebu. Ṣigba ogán etọn biọ to e si nado zindonukọn taidi azọ́nwatọ whenu gli tọn de, enẹ wẹ nado nọ wazọ́n na osẹ awe bo nọ gbọjẹ na osẹ ṣidopo. Roald dọmọ: “Akuẹ he n’nọ dù todin depò tlala, ṣigba n’tindo pekọ to e mẹ.”

Elsebeth dọmọ: “Asu ṣie dọna mi nado dín họ̀haya de to Lakselv bo haya ohọ̀ mítọn he tin to Bergen na mẹdevo lẹ. E biọ vivẹnu po whenu susu po, ṣigba mí jẹ yanwle lọ kọ̀n. To ojlẹ kleun de godo, ovi lẹ mọ agbasazọ́n whenu gli tọn podọ yé nọ gọalọna mí nado penukundo akuẹzinzan núdùdù po húndido po tọn go.”

 Isabel dọmọ: “Na tòpẹvi de mẹ wẹ mí sẹtẹn yì wutu, nuhahun sinsinyẹn he n’pehẹ wẹ nado mọ agbasazọ́n whenu gli tọn de nado sọgan penukundo dee go to sinsẹ̀nzọn ṣie mẹ. To whedelẹnu, e nọ taidi dọ todido depope ma tin.” Ṣigba, na Isabel nọ kẹalọyi agbasazọ́n whenu gli tọn depope he e mọ wutu, e mọ agbasazọ́n ṣinẹnẹ to owhe tintan mẹ, podọ enẹ gọalọna ẹn nado penukundo akuẹzinzan etọn lẹ go. Etẹwẹ dogbọn Fabian dali? E dọmọ: “Nado fó wepinplọn ṣie taidi lẹtliki-zọ́nwatọ de, n’gbẹ́ dona plọnazọ́n. Nuhe n’wà to Lakselv niyẹn. To godo mẹ, n’dín na mẹtẹnpọn ṣie bo mọ azọ́n whenu gli tọn de taidi lẹtliki-zọ́nwatọ.”

Marelius lọsu po asi etọn Kesia po tindo ojlo nado sẹ̀n to fihe nuhudo wẹnlatọ lẹ tọn sù te. Marelius he tindo owhe 29 todin dọmọ: “Hodidọ plidopọ agbegbe tọn lẹ po numimọ gbehosọnalitọ lẹ tọn po whàn mi nado lẹnnupọndo lehe n’sọgan gbloada na sinsẹ̀nzọn ṣie do ji.” Na Kesia he tindo owhe 26 todin, nado sẹtẹn bo jo whẹndo etọn do wẹ yin nuhahun lọ. E dọmọ: “Linlẹn lọ nado dẹn do mẹyiwanna ṣie lẹ dobuna mi.” Humọ, Marelius nọ wazọ́n whenu gigọ́ tọn de nado suahọ he gando owhé yetọn go lẹ. E dọmọ: “Po alọgọ Jehovah tọn po, mí hodẹ̀ whlasusu bo biọ to e si nado gọalọna mí nado basi diọdo he jẹ lẹ, podọ mí penugo nado sẹtẹn.” Tintan whẹ́, yé yí whenu susu zan nado plọn Biblu dogọ. To enẹgodo, asu po asi po enẹ sà owhé yetọn bo jo agbasazọ́n yetọn lẹ do, podọ to août 2011, yé sẹtẹn yì tòdaho Alta tọn mẹ to agewaji Norvège tọn. Nado penukundo yede go taidi gbehosọnalitọ lẹ, Marelius nọ wazọ́n taidi akuẹ-lẹntọ́ de bọ Kesia nọ wazọ́n to nusatẹn de mẹ.

Adà Annuaire tọn he gando numimọ mẹhe yì sẹ̀n to fie nuhudo wẹnlatọ Ahọluduta lọ tọn sù te lẹ tọn go wẹ whàn Knut po Lisbeth po, yèdọ asu po asi po de he tindo nudi owhe 35 todin. Lisbeth dọmọ: “Numimọ enẹlẹ hihia gọalọna mí nado lẹnnupọndo sinsẹ̀nzọnwiwa to tògodo ji, ṣigba n’nọ whleawu, na n’ma lẹndọ gbẹtọ taidi yẹn nkọ de sọgan wàmọ.” Etomọṣo, yé ze afọdide lẹ nado jẹ yanwle yetọn kọ̀n. Knut dọmọ: “Mí sà owhé mítọn, podọ nado sẹ̀ akuẹ do, mí yì jẹ apá na onọ̀ ṣie. To godo mẹ, mí kọnawudopọ hẹ agun he nọ do Glẹnsigbe de to Bergen na owhe dopo nado yọ́n nuhe sinsẹ̀nzọnwiwa to tògodo na bẹhẹn, podọ mí nọ onọ̀ Lisbeth tọn dè to finẹ.” To ojlẹ kleun de godo, Knut po Lisbeth po mọdọ yé ko wleawufo nado sẹtẹn yí fidindẹn de, yèdọ Ouganda. Yé nọ lẹkọyi Norvège nado wazọ́n na osun awe to owhe dopo mẹ. Gbọnmọ dali, yé nọ tindo akuẹ he yé na do penukundo yede go to sinsẹ̀nzọn whenu-gigọ́ tọn mẹ to Ouganda na pipotọ owhe lọ tọn.

Nawẹ nulẹ wá yì do na azọ́nwatọ ehelẹ? Roald dọmọ: “Whẹndo mítọn nọ yí whenu susu zan dopọ to lẹdo he to olá ehe mẹ hugan lehe mí wà do to Bergen. Haṣinṣan whẹndo mítọn tọn ko sinyẹn dogọ, podọ dona daho de wẹ e yin na mí nado mọdọ ovi mítọn lẹ to nukọnzindo to gbigbọ-liho.” E yidogọ dọmọ: “Mọdopolọ, mí masọ nọ hanú zẹjlẹgo gando agbasanu lẹ go ba. Mí wá mọdọ yé ma yin dandan dile mí lẹn do dai.”

 Elsebeth mọdọ emi dona plọn ogbè devo. Etẹwutu? Na aigba-denamẹ agun Lakselv tọn bẹ gbétatò Karasjok tọn hẹn, fie suhugan akọ̀ Lapon tọn tin te wutu, yèdọ akọ̀ de he nọ yin mimọ to agewaji Norvège, Suède, Finlande po Russie po tọn. Nado hẹn wẹndagbe lọ jẹ tòmẹnu ehelẹ dè po awubibọ po, Elsebeth jẹ ogbè Lapon tọn plọn ji. Todin e penugo nado nọ dọho jẹ obá de mẹ to ogbè enẹ mẹ. Be e to vivi aigba-denamẹ yọyọ etọn tọn dù ya? E yí ayajẹ do dọmọ: “N’nọ deanana plọnmẹ Biblu ṣidopo. Homẹ ṣie hùn taun nado wá sẹ̀n tofi!”

Fabian, he to sinsẹ̀n taidi gbehosọnalitọ podọ devizọnwatọ lizọnyizọnwiwa tọn dọ dọ emi po Isabel po gọalọna jọja atọ̀n delẹ to agun yọyọ yetọn mẹ, mẹhe tindo nuhudo tulinamẹ tọn nado nọ tindo mahẹ to nuwiwa agun tọn lẹ mẹ. Todin jọja atọ̀n lọ lẹ nọ tindo mahẹ gbesisọ tọn to lizọnyizọn lọ mẹ. Na nugbo tọn, awe to yé mẹ ko yí baptẹm bo sẹ̀n taidi gbehosọnalitọ alọgọtọ tọn to mars 2012. Dopo to jọja lọ lẹ mẹ he ko to dindanbu sọn nugbo lọ mẹ dọnudo Fabian po Isabel po susu na alọ he yé gọ́ na ẹn nado lodo to nugbo lọ mẹ. Fabian dọmọ: “Homẹ ṣie hùn taun to whenue e dọ mọ. Alọgigọna mẹdevo nọ hẹn ayajẹ wá taun!” Isabel dọmọ: “Na nugbo tọn, to azọ́ndenamẹ ehe mẹ, ‘n’ko dọ́pọ́n bosọ mọdọ Jehovah yọ́n.’” (Ps. 34:8) E yidogọ dọmọ: “Hú popolẹpo, awuvivinu de wẹ e yin nado wá sẹ̀n tofi!”

Todin, Marelius po Kesia po nọ zan gbẹzan jlẹkaji tọn de, ṣigba yé to vivi dona susu tọn dù. Agun he mẹ yé sẹtẹn yì to Alta tindo wẹnlatọ 41 todin. Marelius dọmọ: “Eyin mí lẹnnupọndo ojlẹ he wayi ji bo mọ lehe gbẹzan mítọn ko diọ do, enẹ nọ na mí tuli. Mí dopẹna Jehovah dọ e gọalọna mí nado wá sẹ̀n ewọ tofi taidi gbehosọnalitọ. Nude ma yọ́n hugan mọ.” Kesia yidogọ dọmọ: “N’plọn nado nọ dejido Jehovah go mlẹnmlẹn, podọ ewọ penukundo mí go ganji. N’sọ mọdọ na n’tin to fihe dẹn do hẹnnumẹ ṣie lẹ wutu, enẹ gọalọna mi nado yọ́n pinpẹn ojlẹ he mí yizan dopọ wayi lẹ tọn dogọ. Nudide mítọn ma vẹna mi pọ́n gbede.”

Etẹwẹ dogbọn Knut po Lisbeth po dali to Ouganda? Knut dọmọ: “E biọ whenu susu to mí si nado jẹakọ hẹ lẹdo lọ po aṣa etọn lẹ po. Mí nọ tindo nuhahun osin po lẹtliki po tọn podọ homẹ-zọ̀n nọ dotukla mí sọn ojlẹ de mẹ jẹ devo mẹ, ṣigba mí sọgan deanana plọnmẹ Biblu sọha he jlo mí!” Lisbeth dọmọ: “Lẹdo he mẹ wẹndagbe lọ ma ko jẹ pọ́n lẹ ma dẹn do fie mí nọ nọ̀. Ṣigba eyin mí yì finẹ, mí nọ mọ bọ gbẹtọ lẹ nọ to Biblu hia podọ yé nọ biọ to mí si nado plọnnu hẹ yé. Biblu pinplọn hẹ whiwhẹnọ enẹlẹ nọ hẹn ayajẹ mayọnjlẹ wá na mí!”

Lehe homẹ Nukọntọ mítọn, Klisti Jesu tọn na hùn do sọ nado mọ sọn olọn mẹ dọ azọ́n yẹwhehodidọ tọn he e bẹjẹeji lọ to yinyin wiwà to lẹdo aigba lọ tọn susu devo lẹ mẹ dogọ! Na nugbo tọn, ayajẹnu wẹ e nọ yin na omẹ Jiwheyẹwhe tọn lẹpo nado ze yede jo sọn ojlo mẹ wá nado hẹn azọ́n he Jesu zedo alọmẹ na yé lọ di, enẹ wẹ nado “hẹn gbẹtọ lẹ sọn akọta lẹpo mẹ zun devi lẹ.”—Mat. 28:19, 20.