Kanbiọ lẹ sọn Wehiatọ lẹ Dè

Etẹwẹ n’dona wà eyin n’tindo kanbiọ gando nuhe n’hia to Biblu mẹ de go kavi eyin n’to ayinamẹ dín gando nuhahun mẹdetiti tọn de go?

Howhinwhẹn lẹ 2:1-5 dotuhomẹna mí nado nọ “dín” nukunnumọjẹnumẹ po wuntuntun po taidi mẹhe to “adọkunnu he whlá” lẹ dín. Ehe dohia dọ mí dona nọ dovivẹnu nado dín gblọndo na kanbiọ he mí tindo gando Biblu go lẹ podọ nado nọ dín pọngbọ na nuhahun mẹdetiti tọn mítọn lẹ. Nawẹ mí sọgan wà ehe gbọn?

Owe Mọaleyi sọn Wehọmẹ Lizọnyizọn Yẹwhehọluduta Tọn Mẹ, weda 33 jẹ 38 dọhodo “Lehe Dodinnanu Nọ Yin Bibasi Do” gbọn azọ́nwanu he “afanumẹ nugbonọ podọ nuyọnẹntọ lọ” wleawuna lẹ yiyizan dali ji. (Mat. 24:45) Weda 36tọ do lehe mí sọgan yí Index des publications Watch Tower he mẹ alọdlẹndonu lẹ nọ sọawuhia to hogo po wefọ lẹ po glọ te zan do hia. Ehe zọ́n bọ e nọ bọawu nado basi dodinnanu vlavo do hogbe tangan lẹ kavi wefọ Biblu tọn lẹ ji, fie mí na mọ alọdlẹndonu lẹ te nado gbadopọnna. Nọ yí sọwhiwhe do dindona gblọndo tangan kavi anademẹ he a tindo nuhudo etọn. Flindọ, “adọkunnu he whlá” lẹ dín wẹ a te, ehe nọ biọ whenu po vivẹnudido po.

Nugbo wẹ dọ, hosọ po wefọ delẹ po tin he ma yin hodọdeji tlọlọ to owe mítọn lẹ mẹ. Podọ eyin mí tlẹ ko dọhodo wefọ Biblu tọn tangan de ji, mí sọgan nọma ko dọhodo kanbiọ he to ahunmẹduna we lọ ji. Humọ, kandai Biblu tọn delẹ nọ fọ́n kanbiọ lẹ dote, na Owe-wiwe lẹ ma bẹ nudọnamẹ gigọ́ lẹ hẹn gando yé go wutu. Enẹwutu, mí ma sọgan mọ gblọndo na kanbiọ he fọndote lẹpo to afọdopolọji. To whẹho mọnkọtọn mẹ, mí ma dona pàhodọ gando nuhe ma sọgan mọ gblọndo lẹ go, na mí nikaa jẹ nudọn ji gando “kanbiọ dodinnanu tọn lẹ [go] kakati nado wleawuna nudepope he nọ hẹn yise lodo sọn Jiwheyẹwhe dè.” (1 Tim. 1:4; 2 Tim. 2:23; Titus 3:9) E ma yin azọngban wekantẹn alahọ tọn kavi tatọ́-tẹnnọ aihọn tọn nado gbadopọnna kanbiọ mọnkọtọn he ma ko yin hodọdeji to owe mítọn mẹ lẹpo bo na gblọndo yetọn gba. Ṣigba, mí sọgan deji dọ Biblu bẹ nudọnamẹ he pé hẹn nado deanana mí to gbẹzan mẹ podọ e ma bẹ nudọnamẹ gigọ́ delẹ hẹn na mí nido sọgan tindo yise he lodo to Dowatọ etọn, Jiwheyẹwhe mẹ.—Pọ́n weda 185 jẹ 187 owe Dọnsẹpọ Jehovah tọn.

Eyin a ko wà nuhe go a pé lẹpo nado basi dodinnanu do whẹho mẹdetiti tọn de ji ṣigba bo ma mọ anademẹ kavi pọngbọ he a tindo nuhudo etọn lo? Voawu nado dọnsẹpọ yisenọ hatọ he whèwhín de, vlavo dopo to mẹho agun tọn lẹ mẹ. Yé tindo oyọnẹn Biblu tọn ganji bosọ tindo numimọ to gbẹzan Klistiani tọn mẹ. Yé na gọalọna we nado mọ ayinamẹ gando nuhahun kavi nudide mẹdetiti tọn de go, na yé sẹpọ we bo yọ́n we bosọ yọ́n ninọmẹ towe. Podọ ma wọn nado hodẹ̀ hlan Jehovah, titengbe gando ahunmẹdunamẹnu towe lẹ go bo biọ ẹ nado deanana linlẹn towe gbọn gbigbọ wiwe etọn gblamẹ gbede blo, ‘na Jehovah wẹ nọ namẹ nuyọnẹn po wuntuntun po.’—Howh. 2:6; Luku 11:13.