Be Jọja Aflanmẹ lẹ Dona Yí Baptẹm Ya?

“HOMẸ ṣie hùn taun dọ viyọnnu ṣie yin devizọnwatọ Jehovah tọn todin, podọ n’yọnẹn dọ homẹ ewọ lọsu tọn hùn,” wẹ Carlos, a otọ́ Klistiani de to Philippines dọ. Otọ́ de to Grèce wlan dọmọ: “Homẹ yẹn po asi ṣie po tọn hùn dọ ovi mítọn atọ̀n lẹ yí baptẹm taidi Kunnudetọ Jehovah tọn to owhe aflanmẹ tọn mẹ. Yé to nukọnzindo to gbigbọ-liho podọ homẹ yetọn hùn nado to Jehovah sẹ̀n.”

Owhẹ̀ mẹjitọ Klistiani lẹ tọn nọ whẹ́n nado jaya to whenue ovi yetọn lẹ yí baptẹm, ṣigba e sọ nọ hẹn magbọjẹ wá na yé to whedelẹnu. Onọ̀ de dọmọ: “Homẹ ṣie hùn taun ṣigba ayiha ṣie ma jai.” Naegbọn e do tindo numọtolanmẹ he gbọnvo enẹlẹ? “N’mọnukunnujẹemẹ dọ bẹsọn din visunnu ṣie na dogbè na Jehovah to gigọ́ mẹ” wẹ e dọ.

Jehovah sinsẹ̀n taidi dopo to Kunnudetọ etọn he ko yí baptẹm lẹ mẹ yin yanwle de he jọja aflanmẹ lẹ dona tindo. Etomọṣo, mẹjitọ budisi Jiwheyẹwhe tọ́ lẹ sọgan kanse yede dọ, ‘N’yọnẹn dọ ovi ṣie ko basi nukọnyiyi dagbe, ṣigba be e na penugo nado nọavùnte sọta kọgbidinamẹ fẹnnuwiwa tọn lẹ bo gbọṣi wiweji to Jehovah nukọn ya?’ Mẹdevo lẹ sọgan kanse yede dọ, ‘Eyin ovi ṣie wá pehẹ whlepọn agbasanu bibẹpli tọn, be e na zindonukọn nado yí ayajẹ po zohunhun po do to Jiwheyẹwhe sẹ̀n ya?’ To whelọnu lo, anademẹ Biblu tọn tẹwẹ sọgan gọalọna mẹjitọ lẹ nado yọnẹn eyin ovi yetọn lẹ pegan na baptẹm kavi lala?

Devi Klisti Tọn Yinyin Wẹ Nubiọtomẹsi Titengbe Hugan Lọ

Kakati nado dọ owhe tangan de na baptẹm yíyí, Ohó Jiwheyẹwhe tọn basi zẹẹmẹ ninọmẹ gbigbọmẹ tọn he mẹde dona tindo nado pegan na baptẹm tọn. Jesu na anademẹ hodotọ etọn lẹ dọmọ: “[Mì] hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé.” (Mat. 28:19) Enẹwutu, mẹhe ko yin devi Klisti tọn lẹ wẹ dona yí baptẹm.

Etẹwẹ hogbe lọ devi zẹẹmẹdo? Étude perspicace des Écritures basi zẹẹmẹ dọmọ: “Hogbe enẹ nọ yin yiyizan titengbe nado dlẹnalọdo mẹhe yí nuplọnmẹ Klisti tọn lẹ sè bosọ nọ hodo yé pẹkipẹki lẹ.” Be jọja aflanmẹ lẹ sọgan penugo nado yin devi nugbo Klisti tọn lẹ ya? Mẹmẹyọnnu de he ko sẹ̀n taidi mẹdehlan to Amérique Latine na owhe 40 linlán wlan  gando ede po nọviyọnnu etọn awe po go dọmọ: “Mí ko whẹ́n jẹ obá de mẹ nado yọnẹn dọ mí jlo na sẹ̀n Jehovah bo nọgbẹ̀ to Paladisi mẹ. Klandowiwe mítọn gọalọna mí nado tindo huhlọn bo duto whlepọn jọja whenu tọn lẹ ji. E ma vẹna mí dọ mí basi klandowiwe hlan Jiwheyẹwhe to owhe aflanmẹ tọn mẹ.”

Nawẹ hiẹ na yọnẹn gbọn eyin ovi towe ko lẹzun devi Klisti tọn de? Biblu dọmọ: “Walọ yọpọvu tọn wẹ yè do nọ yọnẹn eyin azọ́n etọn yin dagbe, eyin e sọgbe.” (Howh. 20:11) Mì gbọ mí ni gbadopọnna nuyiwa delẹ he nọ dohia dọ jọja aflanmẹ de to ‘nukọnyiyi etọn hẹn họnwun’ taidi devi de.—1 Tim. 4:15.

Kunnudenu Devi-Yinyin Tọn

Be ovi towe nọ setonuna we ya? (Kọl. 3:20) Be e nọ wà whégbè-zọ́n he a de na ẹn lẹ ya? Biblu dọ gando Jesu he tindo owhe 12 go dọmọ: ‘E to mẹmẹglọ yin hlan mẹjitọ etọn lẹ zọnmii.’ (Luku 2:51) Na nugbo tọn, ovi depope to egbehe ma sọgan setonuna mẹjitọ etọn lẹ to pipé mẹ. Ṣigba, Klistiani nugbo lẹ dona nọ “hodo afọdòmẹ [Jesu tọn] lẹ pẹkipẹki.” Enẹwutu, jọja aflanmẹ he jlo na yí baptẹm lẹ dona yin yinyọnẹn taidi mẹhe nọ setonuna mẹjitọ yetọn lẹ.—1 Pita 2:21.

Lẹnnupọndo kanbiọ ehelẹ ji: Be ovi towe nọ ‘zindonukọn nado to Ahọluduta lọ dín whẹ́’ gbọn mahẹ gigọ́ tintindo to lizọnyizọn lọ mẹ dali ya? (Mat. 6:33) Be e nọ tindo ojlo nado má wẹndagbe lọ hẹ mẹdevo lẹ ya, kavi hiẹ wẹ nọ hẹn ẹn nado tọ́n na sinsẹ̀nzọn kunnudegbe tọn podọ nado dọhona whétọ lẹ? Be e yọ́n pinpẹn azọngban he e tindo taidi wẹnlatọ he ma ko yí baptẹm tọn ya? Be e nọ tindo ojlo nado basi gọyìpọn na jlodotọ he e dukosọ hẹ to aigba-denamẹ lọ ji lẹ ya? Be e nọ hẹn ẹn zun yinyọnẹn na wehọmẹvigbẹ́ kavi mẹplọntọ etọn lẹ dọ emi yin Kunnudetọ Jehovah tọn ya?

Be opli agun tọn lẹ yìyì yin nujọnu na ẹn ya? (Ps. 122:1) Be homẹ etọn nọ hùn nado na gblọndo to Oplọn Atọ̀họ̀-Nuhihọ́ lọ Tọn po Biblu Pinplọn Agun tọn po whenu ya? Be e nọ yí zohunhun do tindo mahẹ to Wehọmẹ Lizọnyizọn Yẹwhehọluduta tọn mẹ ya?—Heb. 10:24, 25.

Be ovi towe nọ dovivẹnu nado gbọṣi wiweji to walọyizan-liho bo nọ dapana gbẹdido ylankan lẹ to wehọmẹ kavi to fidevo lẹ ya? (Howh. 13:20) Nudide tẹlẹ wẹ e nọ basi na nuhe dù nuhiho, sinima, tito-to-whinnu televiziọn ji tọn po aihundida video ji tọn lẹ po gọna Internet yiyizan? Be hodidọ po nuyiwa etọn lẹ po nọ dohia dọ ewọ jlo na nọgbẹ̀ sọgbe hẹ nujinọtedo Biblu tọn lẹ ya?

Obá tẹ mẹ wẹ ovi towe yọ́n Biblu jẹ? Be e sọgan dọ nuhe e plọn to sinsẹ̀n-bibasi whẹndo tọn whenu lẹ to hogbe etọn titi mẹ ya? Be e sọgan basi zẹẹmẹ nugbo dodonu Biblu tọn lẹ tọn ya? (Howh. 2:6-9) Be e nọ tindo ojlo to Biblu hihia po owe pipli afanumẹ nugbonọ podọ nuyọnẹntọ lọ tọn lẹ po pinplọn mẹ ya? (Mat. 24:45) Be e nọ kàn kanbiọ sè do nuplọnmẹ po wefọ Biblu tọn lẹ po ji ya?

 Kanbiọ enẹlẹ sọgan gọalọna we nado yọ́n obá he mẹ ovi towe yinukọn to gbigbọ-liho jẹ. Eyin hiẹ lẹnnupọndo yé ji godo, a sọgan wá tadona kọ̀n dọ e dona basi vọjlado to adà delẹ mẹ whẹpo do yí baptẹm. Ṣigba, eyin gbẹzan etọn dohia dọ e yin devi Klisti tọn bo ko klan gbẹzan etọn do wiwe hlan Jiwheyẹwhe nugbonugbo, hiẹ sọgan dike ni yí baptẹm.

Jọja lẹ Sọgan Pà Jehovah

Devizọnwatọ Jiwheyẹwhe tọn susu wẹ do nugbonọ-yinyin hia to owhe aflanmẹ tọn lẹ mẹ kavi jẹnukọnna enẹ. Lẹnnupọndo Josẹfu, Samuẹli, Josia, po Jesu po ji. (Gẹn. 37:2; 39:1-3; 1 Sam. 1:24-28; 2:18-20; 2 Otan. 34:1-3; Luku 2:42-49) Podọ viyọnnu ẹnẹ Filippi tọn he dọ dọdai lẹ, dona ko yin pinplọn ganji sọn ovu whenu.—Owalọ 21:8, 9.

Kunnudetọ de to Grèce dọmọ: “N’yí baptẹm to whenue n’tindo owhe 12. Nudide ehe ma vẹna mi gbede. Owhe 24 ko wayi todin, podọ n’ko yí owhe 23 zan to sinsẹ̀nzọn whenu-gigọ́ tọn mẹ. Owanyi na Jehovah gọalọna mi nado pehẹ nuhahun jọja whenu tọn lẹ to whepoponu. To owhe 12 mẹvi yinyin mẹ, n’ma tindo oyọnẹn Biblu tọn he n’tindo todin. Ṣigba, n’yọnẹn dọ n’yiwanna Jehovah bo jlo na sẹ̀n ẹn kakadoi. Homẹ ṣie hùn dọ ewọ gọalọna mi nado zindonukọn to sinsẹ̀nzọn etọn mẹ.”

Mẹhe dohia dọ emi yin devi nugbo Klisti tọn dona yí baptẹm, vlavo e yin jọja kavi mẹho. Apọsteli Paulu wlan dọmọ: “Ahun wẹ gbẹtọ nọ yí do dó yise hia na dodowiwa, ṣigba onù wẹ gbẹtọ nọ yí do basi gbeyiyi gbangba tọn na whlẹngán.” (Lom. 10:10) Eyin jọja aflanmẹ de he yin devi Klisti tọn ze afọdide nujọnu tọn lọ nado yí baptẹm, be ewọ po mẹjitọ etọn lẹ po ko jẹ yanwle titengbe de kọ̀n niyẹn. Mì ma dike nude ni glọnalina mìwlẹ kavi ovi mìtọn lẹ nado duvivi ayajẹ he to tepọn mì tọn blo.

[Nudọnamẹ odò tọn]

[Apotin to weda 5]

Mì Tindo Pọndohlan He Sọgbe Gando Baptẹm Go

Mẹjitọ delẹ nọ pọ́n baptẹm ovi yetọn lẹ tọn taidi afọdide dagbe de he sọ bẹ owù hẹn—taidi gbedewema húnkùnkùn tọn yíyí. Ṣigba, be baptẹm po sinsẹ̀nzọn wiwe po sọgan yin owù na sọgodo dagbe mẹde tọn ya? Gblọndo Biblu tọn wẹ lala. Howhinwhẹn lẹ 10:22 dọmọ: “Dona OKLUNỌ tọn, e nọ hẹnmẹ wàdọkun, e ma nọ yí awubla dogọ ẹ gba.” Podọ Paulu kanwe hlan jọja Timoti dọmọ: “Nugbo wẹ dọ e nọ hẹn ale daho wá, eyin mẹdezejo na Jiwheyẹwhe ehe yin tintindo to pọmẹ po pekọ po.”—1 Tim. 6:6.

Nugbo wẹ dọ, Jehovah sinsẹ̀n ma bọawu. Jelemia pehẹ nuhahun susu taidi yẹwhegán Jiwheyẹwhe tọn. Ṣogan, e wlan gando sinsẹ̀n-bibasi etọn na Jiwheyẹwhe nugbo lọ go dọmọ: “Ohó towe lẹ lọ sọ yin ayajẹ de hlan mi po homẹhun ayiha ṣie tọn po: na yè nọ ylọ mi gbọn oyín towe dali, OKLUNỌ E Jiwheyẹwhe awhànpa lẹ tọn.” (Jel. 15:16) Jelemia yọnẹn dọ sinsẹ̀nzọn Jiwheyẹwhe tọn wẹ asisa ayajẹ emitọn tọn. Aihọn Satani tọn wẹ asisa nuhahun lẹ tọn. Mẹjitọ lẹ dona gọalọna ovi lẹ nado yọ́n vogbingbọn enẹ.—Jel. 1:19.

 [Apotin/Yẹdide to weda 6]

Be Ovi Ṣie Dona Sẹ̀ Baptẹm Yíyí Hlan Nukọn Wẹ Ya?

To whedelẹnu, eyin ovi lẹ tlẹ pegan na baptẹm, mẹjitọ yetọn lẹ sọgan basi dide dọ yé ni sẹ̀ ẹ hlan nukọn. Whẹwhinwhẹ́n tẹlẹ wutu wẹ yé do nọ wàmọ?

N’to budi dọ eyin ovi ṣie yí baptẹm, e sọgan wà ylando sinsinyẹn to nukọn mẹ bo yin didesẹ sọn agun mẹ. Be e sọgbe hẹ lẹnpọn dagbe dọ jọja aflanmẹ de he sẹ̀ baptẹm yíyí hlan nukọn ma na dogbè nuyiwa etọn lẹ tọn na Jiwheyẹwhe ya? Sọlomọni dọho he bọdego ehe na jọja lẹ dọmọ: “Hiẹ ni yọ́n ehe dọ, na [nuyiwa towe lẹ] Jiwheyẹwhe na hẹn we biọ whẹdida mẹ.” (Yẹwh. 11:9) Podọ Paulu ma dlẹnalọdo owhe tangan de to whenue e flinnumẹ dọmọ: “Dopodopo mítọn wẹ na dogbè edetiti tọn na Jiwheyẹwhe.”—Lom. 14:12.

Devizọnwatọ he yí baptẹm po dehe ma yí baptẹm lẹ po wẹ na dogbè na Jiwheyẹwhe. Flindọ, Jehovah nọ basi-hihọ́na devizọnwatọ etọn lẹ bo ‘ma na dike yé ni yin whiwhlepọn zẹ̀ nuhe yé sọgan doakọnna go.’ (1 Kọl. 10:13) Dile e na dẹnsọ bọ yé na “gbọṣi lẹnpọn dagbenọ-yinyin mẹ” bo nọavùnte sọta whlepọn lẹ, yé sọgan ganjẹ godonọnamẹ Jiwheyẹwhe tọn go. (1 Pita 5:6-9) Onọ̀ Klistiani de wlan dọmọ: “Ovi he yí baptẹm lẹ nọ tindo whẹwhinwhẹ́n susu nado nọla na onú ylankan aihọn tọn lẹ. Visunnu ṣie he yí baptẹm to whenue e tindo owhe 15 mọdọ baptẹm yíyí yin hihọ́ de. ‘Hiẹ ma na lẹn nado wanu jẹagọdo osẹ́n Jehovah tọn,’ wẹ e dọ. Baptẹm nọ whànmẹ nado wà dodo.”

Eyin hiẹ ko plọn ovi towe lẹ gbọn ohó po apajlẹ po dali nado setonuna Jehovah, hiẹ sọgan deji dọ yé na zindonukọn to mọwiwà mẹ to baptẹm yetọn godo. Howhinwhẹn lẹ 20:7 dọmọ: “Gbẹtọ nugbonọ to zọnlinzin to walọ pipé etọn mẹ: Dona tin na ovi etọn lẹ to godo etọn.”

N’jlo dọ ovi ṣie ni jẹ yanwle delẹ kọ̀n whẹ́. Jọja aflanmẹ lẹ dona plọn nado nọ wazọ́n nado sọgan hẹn yede to sọgodo. Ṣigba, owùnu wẹ e yin nado nọ na tuli yé nado ze gbẹzan yetọn blebu sinai do wepinplọn po hihọ́ he adọkunnu nọ hẹnwa po ji kakati nido yin do sinsẹ̀n-bibasi nugbo ji. Jesu dọ gando okún kavi ohó Ahọluduta lọ tọn he ma whẹ́n de go, dọmọ: “Na nuhe dù dehe yin dido do owùn lẹ ṣẹnṣẹn, ehe wẹ mẹhe sè ohó lọ, ṣigba magbọjẹ titonu ehe tọn lẹ po huhlọn mẹkiklọ adọkunnu lẹ tọn po gbidikọna ohó lọ, bọ ewọ ma tindo sinsẹ́n.” (Mat. 13:22) Eyin mẹjitọ de na tuli ovi etọn nado ze yanwle aihọn tọn lẹ donukọnna ede, ovi lọ na yí nukunpẹvi do pọ́n haṣinṣan etọn hẹ Jehovah, ehe sọgan hù ojlo etọn nado sẹ̀n Jiwheyẹwhe.

To whenue mẹho agun tọn numimọnọ de to hodọ gando jọja aflanmẹ he pegan na baptẹm bọ mẹjitọ yetọn gbẹ́ lẹ go, e dọmọ: “Aliginglọnna jọja aflanmẹ de nado yí baptẹm sọgan doalọtena nukọnyiyi etọn to nugbo lọ mẹ bo hẹn ẹn gbọjọ.” Podọ nugopọntọ tomẹyitọ de wlan dọmọ: “Jọja de sọgan jẹ ayihaawe tindo ji gando haṣinṣan etọn hẹ Jiwheyẹwhe go kavi lẹndọ emi ma to nukọnyi taidi mẹdevo lẹ. E sọgan lẹhlan aihọn lọ nado tindo numọtolanmẹ nujọnu-yinyin tọn.”

[Yẹdide]

Be wehọmẹ alavọ tọn wẹ dona jẹnukọn ya?

[Yẹdide to weda 3]

Jọja aflanmẹ de sọgan dohia dọ emi yin devi Klisti tọn

[Yẹdide to weda 3]

Awuwiwle po mahẹ tintindo to opli lẹ mẹ po

[Yẹdide to weda 4]

Tonusisena mẹjitọ lẹ

[Yẹdide to weda 4]

Mahẹ tintindo to lizọnyizọn lọ mẹ

[Yẹdide to weda 4]

Odẹ̀ mẹdetiti tọn