Ma Gbẹkọ Yisenọ Hatọ Towe lẹ Go Gbede Blo

“AWUVIVI he mí mọ to ajọ́ mẹ fẹayihasẹna mí na owhe ao, podọ mí jẹ adọkun taun. Dile etlẹ yindọ mí yin pinplọn whẹ́n to nugbo mẹ, mí danbú sọn Jehovah dè, podọ mí nọ tindo numọtolanmẹ lọ dọ e na vẹawuna mí nado lẹkọ,” wẹ Jarosław po asi etọn Beata po dọ. a

Mẹmẹsunnu devo he nọ yin Marek flindọ: “Na ninọmẹ lẹdo po tonudidọ po tọn he diọ to Pologne wutu, agbasazọ́n susu wẹ gble do mi. Ehe hẹn mi jẹflumẹ. N’dibu nado jẹ ajọ́ wà na dee ji, na n’ma tindo numimọ ajọ́ tọn wutu. To godo mẹ, n’tẹnpọn nado bẹ ajọ́ de jẹeji po linlẹn lọ po dọ ehe na gọalọna mi nado penukundo nuhudo whẹndo ṣie tọn lẹ go ganji bọ ehe ma na tindo nuyiwadomẹji agọ̀ depope do gbigbọnọ-yinyin ṣie ji. N’wá mọ to godo mẹ dọ linlẹn agọ̀ wẹ enẹ yin.”

Na mí to gbẹnọ to aihọn he mẹ nulẹ fọ́n bo to ahivẹ te de mẹ bọ azọ́nmamọwà fọ́n bo to agayi wutu, mẹdelẹ nọ yí egblemaku do basi nudide nulú tọn lẹ. Mẹmẹsunnu susu wẹ ko basi dide nado kẹalọyi gàngodo-zọ́n, kavi kẹalọyi azọ́n devo dogọ dehe yé ko nọ wà kavi jẹ ajọ́ wà na yedelẹ ji dile etlẹ yindọ yé ma tindo numimọ ajọ́ tọn. Linlẹn yetọn wẹ yindọ akuẹ enẹ  he yé na mọ dogọ na gọalọna whẹndo yetọn bo ma na yinuwado gbigbọnọ-yinyin yetọn ji. Ṣigba, ninọmẹ madonukun lẹ po nuhahun akuẹzinzan tọn he fọ́n bo to sinsinyẹn deji lẹ po sọgan hẹn tito dagbe he mẹde basi lẹ gble. Taidi kọdetọn de, mẹdelẹ ko jai jẹ omọ̀ nukunkẹn tọn mẹ bo dike agbasanu lẹ ni ṣinyọnyẹ gbigbọnu lẹ ji.—Yẹwh. 9:11, 12.

Mẹmẹsunnu po mẹmẹyọnnu delẹ po ko doafọna onú aihọn tọn lẹ sọmọ bọ yé masọ tindo whenu depope na oplọn mẹdetiti tọn, opli lẹ po kunnudegbe po ba. E họnwun dọ gbigbọ vọdonanu tọn enẹ nọ yinuwado gbigbọnọ-yinyin yetọn po haṣinṣan yetọn hẹ Jehovah po ji. E yọnbasi dọ yé nisọ gbẹkọ haṣinṣan titengbe devo go—enẹ wẹ haṣinṣan yetọn hẹ “mẹhe gando [yé] go to yise mẹ lẹ.” (Gal. 6:10) Vudevude, mẹdelẹ nọ jo pipli mẹmẹsunnu lẹ tọn do. Mì gbọ mí ni gbadopọnna adà godo tọn ehe po sọwhiwhe po.

Azọngban Mítọn Gando Yisenọ Hatọ lẹ Go

Taidi mẹmẹsunnu po mẹmẹyọnnu lẹ po, dotẹnmẹ susu wẹ hundote na mí nado nọ do owanyi hia ode awetọ. (Lom. 13:8) Vlavo to agun towe mẹ, hiẹ na ko doayi “wamọnọ he to awhádo” na alọgọ lẹ go. (Job 29:12) Mẹdelẹ sọgan nọma tindo nuhe yé na dù. Apọsteli Johanu flinnu mí gando whẹho ehe go dọmọ: “Mẹdepope he tindo nutindo aihọn ehe tọn lẹ bo mọ mẹmẹsunnu etọn tin to nuhudo mẹ, ṣogan bo sú ohọ̀n awuvẹmẹ sisosiso etọn tọn do e, nawẹ owanyi Jiwheyẹwhe tọn gbọṣi ewọ mẹ gbọn lo?”—1 Joh. 3:17.

Vlavo hiẹ sọgan ko yí nude wà to ninọmẹ mọnkọtọn lẹ mẹ gbọn alọgigọna mẹdevo lẹ dali. Etomọṣo, ojlo tintindo to pipli mẹmẹsunnu lẹ tọn mẹ bẹ nususu hẹn hugan nado gọalọna yé to agbasa-liho. Mẹdelẹ sọgan dawhá na alọgọ na yé tin yedeṣo kavi jẹflumẹ wutu. Yé sọgan nọ mọdọ emi ma jẹ nado sẹ̀n Jehovah kavi to azọ̀n sinsinyẹn de jẹ kavi hẹn mẹyiwanna de bu to okú mẹ. Dopo to aliho he mẹ mí sọgan na tuli yé te lẹ mẹ wẹ nado nọ dotoaina yé bo dọho hẹ yé bo gbọnmọ dali gọalọna yé to numọtolanmẹ-liho podọ to gbigbọ-liho. (1 Tẹs. 5:14) Ehe nọ saba hẹn owanyi he mí tindo na mẹmẹsunnu mítọn lẹ sinyẹn deji.

Na taun tọn, mẹho agun tọn lẹ tin to otẹn dagbe mẹ nado dotoaina yé po awuvẹmẹ po, hò yetọn pọ́n bo na ayinamẹ owanyi tọn sọn Owe-wiwe mẹ. (Owalọ 20:28) Gbọnmọ dali, nugopọntọ lẹ nọ hodo apajlẹ apọsteli Paulu tọn, mẹhe tindo “owanyi sisosiso” na mẹmẹsunnu po mẹmẹyọnnu etọn lẹ po.—1 Tẹs. 2:7, 8.

Ṣigba eyin Klistiani de danbú sọn apó lọ mẹ, etẹwẹ nọ jọ gando azọngban he e tindo nado gọalọna yisenọ hatọ etọn lẹ go? Nugopọntọ kavi mẹho agun tọn lẹ lọsu ma tlẹ gán sọn whlepọn lọ nado doafọna agbasanu lẹ bibẹpli si gba. Etẹwẹ lo eyin Klistiani de joawuna whlepọn mọnkọtọn?

 Magbọjẹ Gbẹ̀mẹ Tọn lẹ Sọgan Doagban Pinpẹn Na Mí

Dile mí yọnẹn do, kanvinván nado penukundo nuhudo agbasa tọn whẹndo mítọn tọn lẹ go nọ saba hẹn magbọjẹ wá, podọ ehe sọgan zọ́n bọ mí na jẹ nukunpẹvi yí do pọ́n gbigbọnu lẹ ji. (Mat. 13:22) Marek he go mí donù wayi dọmọ: “To whenue ajọ́ ṣie jai, n’basi dide nado yì dín azọ́n he pekuẹ de to tògodo. N’yì basi osun atọ̀n whẹ́, enẹgodo osun atọ̀n devo po mọmọ po, podọ ojlẹ kleun de poun wẹ n’nọ wá yizan to whégbè. Enẹ zọ́n bọ asi ṣie he yin mayisenọ jiya to numọtolanmẹ-liho.”

E ma yin gbẹzan whẹndo tọn kẹdẹ wẹ enẹ nọ bẹpla gba. Marek yidogọ dọmọ: “Gbọnvona dọ n’nọ wazọ́n na gànhiho susu to yozò sinsinyẹn mẹ, gbẹtọ gblezọn he nọ tẹnpọn nado tafu mẹdevo lẹ ṣẹnṣẹn wẹ n’nọ wazọ́n te. Yé nọ yinuwa taidi jaguda lẹ. N’nọ tindo numọtolanmẹ lọ dọ yé nọ zan mi hugan bọ apọ̀ nọ ṣì mi. Na e nọ vẹawuna mi nado mọ whenu nado penukundo dee go wutu, n’jẹ ayihaawe tindo ji dọ n’ma na penugo nado yilizọn na mẹdevo lẹ.”

Kọdetọn ylankan nudide Marek tọn lẹ tọn dona whàn mí nado yiagbọji bo lẹnnupọn. Eyin e tlẹ taidi dọ tògodo yìyì nọ gbọ nuhahun akuẹzinzan tọn lẹ, be e ma nọ hẹn nuhahun devo lẹ wá ya? Di apajlẹ, etẹwẹ na jọ do dagbemẹninọ whẹndo mítọn tọn go to gbigbọ-liho podọ to numọtolanmẹ-liho? Be tògodo yìyì mọnkọtọn ma na zọ́n bọ kanṣiṣa mítọn hẹ hagbẹ agun lọ tọn lẹ na sán nẹ? Be enẹ ma na hò lẹblanulọkẹyi mítọn nado yilizọn na yisenọ hatọ lẹ yí sọn mí si nẹ?—1 Tim. 3:2-5.

Ṣigba dile hiẹ sọgan ko yọnẹn do, e ma yin dandan dọ mẹde ni yì wazọ́n to tògodo whẹpo do hẹn alọnu etọn ján to agbasazọ́n mẹ gba. Lẹnnupọndo apajlẹ Jarosław po Beata po tọn ji. Jarosław dọmọ: “To bẹjẹeji, nulẹ to yìyì linsinlinsin. To whenuena e yindọ mí ṣẹṣẹ wlealọ wẹ, mí hùn nusatẹn kleun de do fie ajọ́ na disa te de bo nọ sà blẹdi he mẹ yè nọ yí olàn do. Ale he mọ mí te sisẹ́ mí nado gbloada na ajọ́ mítọn. Ṣigba, na mí masọ nọ mọ whenu sọmọ ba wutu, mí jẹ opli Klistiani tọn lẹ gọ̀n ji. E ma dẹn bọ n’jo sinsẹ̀nzọn gbehosọnalitọ po azọngban devizọnwatọ lizọnyizọnwiwa tọn po do. Na ale he mọ mí te lẹ hẹn homẹhun mí wutu, mí hùn nusatẹn daho de bo kọ̀n ajọ́ dopọ hẹ mayisenọ de. E ma dẹn bọ n’jẹ tògodo yì ji nado yì doalọwemẹ na azọ́n he na hẹn dọla livi susu lẹ wá. N’masọ nọ nọ̀ whégbè sọmọ ba podọ haṣinṣan ṣie hẹ asi ṣie po viyọnnu ṣie po depò. To godo mẹ, vivi ajọ́ lọ tọn zọ́n bọ mí gbọjọ to gbigbọ-liho. Na mí masọ nọ kọnawudopọ hẹ agun lọ ba wutu, mí ma nọ flinnu jẹ mẹmẹsunnu po mẹmẹyọnnu mítọn lẹ po ji.”

Etẹwẹ mí sọgan plọn sọn ehe mẹ? Ojlo lọ nado geze sọgan ze Klistiani de do owù mẹ, podọ enẹ sọgan zọ́n bọ e na tindo gbigbọ vọdonanu tọn—bo tlẹ hẹn “awugbó etọn lẹ” bu, enẹ wẹ Klistiani-yinyin etọn. (Osọ. 16:15) Enẹ sọgan klan mí sọn mẹmẹsunnu he mí sọgan ko to otẹn dagbe mẹ nado gọalọna lẹ go.

Gbeje Dewe Pọ́n Ganji

‘Enẹ ma sọgan jọ do go e,’ wẹ mí sọgan lẹn. Ṣigba mímẹpo wẹ na wà dagbe nado yí sọwhiwhe do lẹnnupọndo nuhe mí tindo nuhudo etọn taun to gbẹ̀mẹ lẹ ji. Paulu wlan dọmọ: “Mí ma hẹn nudepope wá aihọn mẹ, mọjanwẹ mí ma sọgan sọ ze nudepope tọ́nyi do niyẹn. Enẹwutu, eyin mí tindo núdùdù, avọ̀ po adọtẹn po, onú ehelẹ na pekọna mí.” (1 Tim. 6:7, 8) Nugbo wẹ dọ ninọmẹ gbẹzan tọn nọ gbọnvo sọn otò de mẹ jẹ devo mẹ. Nuhe sọgan yin pinpọnhlan taidi gbẹzan jlẹkaji tọn to otò he hunnukun de mẹ sọgan yin pinpọnhlan taidi gbẹzan fẹẹmẹninọ tọn to otò susu devo lẹ mẹ.

Mahopọnna ninọmẹ gbẹzan tọn otò mítọn tọn, mì gbọ mí ni lẹnnupọndo hogbe Paulu tọn he bọdego ehelẹ ji dọmọ: “Mẹhe magbe nado yin adọkunnọ lẹ jai jẹ whlepọn po omọ̀ po gọna ojlo gúgú tọn po ojlo ylankan susu po mẹ, ehe nọ tlọ omẹ do vasudo po dindọn po mẹ.” (1 Tim. 6:9) Nuglọ wẹ omọ̀ he nọ wle kanlin nọ yin awuwlena do. Yanwle lọ wẹ nado wle kanlin lọ to ajiji mẹ. Nawẹ mí sọgan dapana omọ̀ “ojlo ylankan” tọn lẹ gbọn?

Nuhe tin to otẹn tintan mẹ na mí lẹ yinyọnẹn na whàn mí nado mọ whenu susu dogọ nado sẹ̀n Jehovah podọ nado nọ basi oplọn  mẹdetiti tọn. Eyin Klistiani de nọ hodẹ̀ whẹpo do bẹ nupinplọn jẹeji, ehe sọgan gọalọna ẹn nado lẹzun mẹhe “pegan to gigọ́ mẹ, bo yin hinhẹn sọgbe mlẹnmlẹn” nado gọalọna mẹdevo lẹ.—2 Tim. 2:15; 3:17.

Na owhe delẹ, mẹho agun tọn owanyinọ lẹ dovivẹnu vẹkuvẹku nado jlọ Jarosław dote to gbigbọ-liho bo na ẹn tuli. Enẹ whàn ẹn nado basi diọdo ayidego tọn lẹ. E dọmọ: “To hodọdopọ titengbe de whenu, mẹho lẹ yihodọ sọn Owe-wiwe mẹ gando dẹpẹ adọkunnọ he jlo na nọgbẹ̀ kakadoi bo ma jlo na jo nutindo agbasa tọn etọn lẹ do lọ go. Enẹgodo, yé yí zinzin do kanse mi eyin nudọnamẹ ehe gando go e. Na taun tọn, enẹ lọ wẹ fọ́n mi sọn amlọn mẹ!”—Howh. 11:28; Malku 10:17-22.

Jarosław vọ́ ninọmẹ etọn gbeje pọ́n po sọwhiwhe po bo basi nudide nado sánkanna ajọ́ daho he wà e te. To owhe awe gblamẹ, Jarosław po whẹndo etọn po gọ̀ jẹgangan to gbigbọ-liho. Todin, e to devizọnwana mẹmẹsunnu etọn lẹ taidi mẹho agun tọn. Jarosław dọmọ: “Eyin mẹmẹsunnu lẹ dota ajọ́ mẹ kaka bo dovọ́na gbigbọnọ-yinyin yetọn, n’nọ yí apajlẹ ṣie zan nado dohia yé dọ nulunu wẹ e yin nado biọ zẹgẹ he ma sọzẹn de glọ hẹ mayisenọ lẹ. E ma nọ bọawu nado nọavùnte sọta nuzedonukọnnamẹ he nọ dọnmẹdogo lẹ podọ nado nọla na nuyiwa nugbonọ-mayin tọn lẹ.”—2 Kọl. 6:14.

Marek lọsu plọnnu to aliho sinsinyẹn mẹ. Dile etlẹ yindọ azọ́n he pekuẹ de wiwà to tògodo gọalọna whẹndo etọn to akuẹzinzan-liho, e bẹpla haṣinṣan etọn hẹ Jiwheyẹwhe po mẹmẹsunnu etọn lẹ po. Dile ojlẹ to yìyì, e vọ́ nulẹnpọn do nuhe tin to otẹn tintan mẹ na ẹn lẹ ji. E dọmọ: “Na owhe susu lẹ, ninọmẹ ṣie taidi Baluki hohowhenu tọn, mẹhe ‘to onú dahodaho lẹ dín na ede.’ To godo mẹ, n’kọ̀n ahun ṣie jẹgbonu na Jehovah bo dọ magbọjẹ ṣie lẹ na ẹn, podọ todin n’mọdọ n’ko gọ̀ jẹgangan to gbigbọ-liho.” (Jel. 45:1-5) Todin, Marek to vivẹnudo nado pegan na “azọ́n dagbe” nugopọntọ tọn to agun mẹ.—1 Tim. 3:1.

Na mẹhe nọ jlo nado yì dín agbasazọ́n he pekuẹ to tògodo lẹ, Marek na avase ehe dọmọ: “E nọ bọawu taun nado jai jẹ omọ̀ aihọn ylankan ehe tọn lẹ mẹ to tògodo. Ogbè ma sè nọ glọnalina hodọdopọ hẹ mẹdevo lẹ. A sọgan hẹn akuẹ susu lẹkọ, ṣigba nususu na jẹdò to gowe to gbigbọ-liho he na biọ whenu susu whẹpo a nido gọ̀ yé jlado.”

Jlẹkajininọ to agbasazọ́n po devizọnwiwa na mẹmẹsunnu mítọn lẹ po mẹ na gọalọna mí nado hẹn homẹhun Jehovah. Podọ mẹdevo lẹ sọgan pọ́n do apajlẹ mítọn go nado basi nudide nuyọnẹn tọn. Mẹhe magbọjẹ gbẹ̀mẹ tọn doagban pinpẹn na lẹ tindo nuhudo godonọnamẹ, awuvẹmẹ po apajlẹ dagbe mẹmẹsunnu po mẹmẹyọnnu yetọn lẹ po tọn. Mẹho agun tọn lẹ po mẹhe whèwhín to gbigbọ-liho lẹ po sọgan gọalọna yisenọ hatọ lẹ nado hẹn jlẹkajininọ yetọn go na magbọjẹ gbẹ̀mẹ tọn lẹ nikaa húagbọ́ yé.—Heb. 13:7.

Mọwẹ, mì dike mí gbẹkọ yisenọ hatọ mítọn lẹ go gbọn alọnu hinhẹn ján to agbasazọ́n mítọn mẹ dali gbede blo. (Flp. 1:10) Kakatimọ, mì gbọ mí ni yin “adọkunnọ hlan Jiwheyẹwhe” dile mí to Ahọluduta lọ zedo otẹn tintan mẹ to gbẹzan mítọn mẹ.—Luku 12:21.

[Nudọnamẹ odò tọn]

[Yẹdide to weda 21]

Be agbasazọ́n towe nọ jántẹnna we ma nado yì opli lẹ wẹ ya?

[Yẹdide to weda 23]

Be hiẹ yọ́n pinpẹn dotẹnmẹ hundote he a tindo nado gọalọna mẹmẹsunnu po mẹmẹyọnnu towe lẹ po tọn ya?