Owhe Ayidego Tọn de Na Mimape Biblu Tọn

GBẸTỌ susu hugan gbede pọ́n tọn wẹ tindo Biblu. Enẹ wẹ yin nuhe linlin de he wá sọn Ogbẹ́ Kọndopọ Biblu tọn lẹ dè dọ, na mimape Biblu tọn to 1998 yí nuhe hugan odaa livi dopo tọn do hugan owhe he wayi tọn. To popolẹpo mẹ, hugan Biblu 585 000 000—to blebu mẹ kavi to apadewhe—wẹ yin mimá lẹdo globu lọ pé. “Ehe yin asisa tulinamẹ tọn delẹ,” wẹ linlin lọ dọ. “Yè to gbẹtọ susu dogọ dè jẹ po Ohó Jiwheyẹwhe tọn po to egbehe.”

Na nugbo tọn, vogbingbọn tin to Biblu de tintindo po hihia ẹ po mẹ. Di apajlẹ, dodinnanu dopo dohia dọ hugan 90 to kanweko ji Amelikanu lẹ tọn wẹ tindo e whè gbau Biblu dopo, podọ sọha mọnkọtọn devo sọ yise dọ Biblu yin asisa dagbe nuplọnmẹ walọ dagbe tọn. Ṣigba, 59 to kanweko ji poun wẹ dọ dọ yé nọ lẹhlan Biblu na ayinamẹ. Podọ 29 to kanweko ji wẹ yigbe dọ vlavo yé ma jẹakọ hẹ Biblu “ganji” kavi “paali.”

E mayin dọ Kunnudetọ Jehovah tọn lẹ nọ zín bo nọ má Biblu kẹdẹ wẹ gba ṣigba sọ nọ deanana plọnmẹ Biblu whégbè tọn vọnu lẹ hẹ gbẹtọ lẹ to nuhe hugan aigba 230 lẹ ji. Gbẹtọ livi susu lẹdo aihọn pé to alemọyi sọn tito-to-whinnu Biblu pinplọnmẹ tọn ehe mẹ todin. Yé nọ yin alọgọna nado pehẹ nuhahun he yé to nukọnpan todin lẹ, podọ yé nọ plọn nuhe Biblu dọ gando sọgodo dagbe de to Ahọluduta Jiwheyẹwhe tọn glọ go.—Isaia 48:17, 18; Matiu 6:9, 10.

[Yẹdide lẹ to weda 32]

Plọnmẹ Biblu whégbè tọn lẹ to (amiyọnmẹ to aga yì adusimẹ) Bolivie, Ghana, Sri Lanka, po Angleterre po