Míwlẹ Yin Gbẹtọ Wunmẹ He Tindo Yise Lẹ

Owẹ̀n Homẹmiọnnamẹ Tọn de Zizedonukọnnamẹ to Italie

JEHOVAH yin “Jiwheyẹwhe homẹmimiọn lẹpo tọn.” Gbọn pinplọn nado hodo apajlẹ etọn dali, devizọnwatọ etọn lẹ nọ penugo “[nado] miọnhomẹna yé he tin to tukla depope mẹ lẹ.” (2 Kọlintinu lẹ 1:3, 4; Efesunu lẹ 5:1) Ehe yin dopo to yanwle tangan azọ́n yẹwhehodidọ tọn he to yinyin wiwà gbọn Kunnudetọ Jehovah tọn lẹ dali.

Alọgigọna Yọnnu de He Tin to Nuhudo Mẹ

Na taun tọn to owhe agọe tọn lẹ mẹ wẹ ohẹ́n, awhàn, po ojlo nado dín gbẹzan he pọnte hugan po ko whàn mẹsusu lẹ nado sẹtẹn yì otò adọkun hugan tọn lẹ mẹ. Ṣigba e ma nọ bọawu nado diọada sọgbe hẹ lẹdo yọyọ lẹ gba. Manjola to pọnọ hẹ hagbẹ Albanie-nu lẹ to Borgomanero. To whenuena e yindọ e to Italie nọ̀ to aliho he ma sọgbe hẹ osẹ́n mẹ, e nọ whleawu nado dọho hẹ Wanda, heyin dopo to Kunnudetọ Jehovah tọn lẹ mẹ. Ṣigba, to godo mẹ Wanda basi tito dope de tọn hẹ Manjola, mẹhe to afọdopolọji do ojlo hia taun to Ohó Jiwheyẹwhe tọn pinplọn mẹ, dile etlẹ yindọ aliglọnnamẹ ogbè tọn hẹn ehe sinyẹnawu do sọ. Ṣigba, to dlapọn vude lẹ godo, Wanda masọ nọ mọ mẹdepope to whégbè ba. Etẹwẹ ko jọ? Wanda wá yọnẹn dọ mẹhe nọ nọ̀ ohọ̀ enẹ mẹ lẹpo ko họnyi na dopo to yé mẹ—yèdọ họntọn-sunnu Manjola tọn—jlo na yin wiwle na e hùmẹ wutu!

To osun ẹnẹ godo, Wanda dukosọ hẹ Manjola whladopo dogọ. “E blawu bosọ vọgán, bo tindo awusọhia mẹhe ko jugbọn ojlẹ awusinyẹn tọn mẹ na nugbo tọn,” wẹ Wanda flin. Manjola basi zẹẹmẹ dọ họntọn-sunnu emitọn tin to ganpamẹ podọ họntọn he ewọ ko lẹhlan na alọgọ lẹ ko hẹn ẹn jẹflumẹ tlala. To todido matindo mẹ, e hodẹ̀ hlan Jiwheyẹwhe na alọgọ. Whenẹnu wẹ e flin Wanda, he ko dọho na ẹn gando Biblu go. Lehe Manjola hùnhomẹ do sọ nado mọ ẹn whladopo dogọ!

Plọnmẹ Biblu de yin vivọ́ bẹjẹeji, podọ to madẹnmẹ Manjola jẹ opli Klistiani tọn lẹ yì ji. E tindo kọdetọn dagbe to gbedenamẹ sọgbe hẹ osẹ́n mimọyi mẹ nado gbọṣi Italie. To owhe dopo godo, Manjola lẹzun Kunnudetọ he ko yí baptẹm de. Na yinyin homẹmiọnna gbọn opagbe sọn olọn mẹ wá lẹ dali wutu, e ko lẹkọ do Albanie nado má owẹ̀n homẹmiọnnamẹ Biblu tọn hẹ tòmẹnu hatọ etọn lẹ.

Kunnudide to Osla Jonọ lẹ Tọn de Mẹ

Susu agun Italie tọn lẹ wẹ ko basi tito lẹ nado dekunnu na jonọ lẹ taidi Manjola. Di apajlẹ, agun dopo to Florence basi tito lẹ nado nọ dla osla jonọ lẹ tọn de pọ́n to gbesisọmẹ. Mẹhe nọ nọ̀ osla lọ mẹ lẹ—he suhugan yetọn wá sọn Whèzẹtẹn Europe tọn, Makedonia, po Kosovo po—to numimọ awusinyẹnnamẹnu voovo lẹ tọn tindo. Delẹ tindo nuhahun amasin  adínọ kavi ahàn sinsinyẹn tọn. Susu yetọn nọ penukundo yedelẹ go gbọn ajò flinflin jijẹ dali.

Yẹwhehodidọ to lẹdo ehe mẹ yin avùnnukundiọsọmẹnu de. Ṣigba, to godo mẹ wẹndagbe-jlatọ whenu-gigọ́ tọn de he nọ yin Paola dukosọ hẹ Jaklina, heyin yọnnu Makedonia tọn de. To hodọdopọ vude godo, Jaklina na tuli họntọn etọn Susanna nado gbadopọnna Biblu. To godo mẹ, Susanna dọho hẹ hẹnnumẹ devo lẹ. To madẹnmẹ, hagbẹ whẹndo lọ tọn atọ́n to Biblu plọn to gbesisọmẹ, nọ yì opli Klistiani tọn lẹ, bo to nuhe yé to pinplọn lẹ yí-do-yizan mẹ. Mahopọnna nuhahun he yé dona pannukọn lẹ, yé mọ homẹmiọnnamẹ yí sọn Jehovah po Ohó etọn po mẹ.

Yẹwhenọ-Yọnnu de Kẹalọyi Homẹmiọnnamẹ Jehovah Tọn

To todaho Formia tọn mẹ, wẹndagbe-jlatọ whenu-gigọ́ tọn de he yinkọ etọn nọ yin Assunta dọho na yọnnu de he to zọnlinzin po awusinyẹn delẹ po. Yọnnu lọ yin yẹwhenọ-yọnnu pamẹnọtọ de he yin hagbẹ sinsẹ̀n de he nọ gọalọna mẹhe to awutu jẹ po madogánnọ lẹ po to dotowhé lẹ podọ to owhé mẹdopodopo lẹ tọn gbè.

Assunta dọna yẹwhenọ-yọnnu pamẹnọtọ lọ dọmọ: “Hiẹ lọsu to yaji ga, be e mayin mọwẹ ya? E blawu dọ, mímẹpo wẹ tindo nuhahun lẹ nado doakọnna.” To enẹ sisè mẹ yẹwhenọ-yọnnu pamẹnọtọ lọ wú jẹgbonu po dasin po dọ emi tindo nuhahun titengbe agbasalilo tọn lẹ. Assunta na tuli i, dọ Jiwheyẹwhe Biblu tọn sọgan miọnhomẹna ẹn. Yẹwhenọ-yọnnu pamẹnọtọ lọ kẹalọyi linlinnamẹwe sinai-do-Biblu ji he Assunta zedonukọnna ẹn lẹ.

To hodọdopọ yetọn he bọdego whenu, yẹwhenọ-yọnnu pamẹnọtọ lọ, he yinkọ etọn nọ yin Palmira, yigbe dọ emi to yaji taun. E ko nọ owhé nukunpedomẹgo tọn he nọ yin anadena gbọn yẹwhenọ-yọnnu pamẹnọtọ lẹ dali de gbè na ojlẹ dindẹn de. To whenuena e tọ́nyi na whẹwhinwhẹ́n agbasalilo tọn lẹ wutu na ojlẹ gli de, e mayin dotẹnmẹ na nado lẹkọwa ba. Etomọṣo, Palmira gbẹ́ tindo numọtolanmẹ yinyin sinsindo Jiwheyẹwhe go gbọn opà he e ko dó taidi yẹwhenọ-yọnnu pamẹnọtọ de dali. E lẹkọ yì azọ̀nhẹngbọtọ lẹ dè na “nukunpedomẹgo” ṣigba yin tuklado to apọ̀nmẹ na numimọ lọ wutu. Palmira yigbe nado plọn Biblu, podọ e yì opli Klistiani tọn lẹ na owhe dopo. Enẹgodo e sẹtẹn yì lẹdo devo mẹ, bọ Kunnudetọ lẹ masọ nọ mọ ẹn ba. Owhe awe ko juwayi whẹpo Assunta mọ ẹn whladopo dogọ. Palmira tindo numimọ nukundiọsọmẹ sinsinyẹn tọn sọn whẹndo etọn po nukọntọ sinsẹ̀n tọn lẹ po dè. Etomọṣo, e sọ vọ́ bẹ Biblu pinplọn etọn jẹeji, tindo nukọnyiyi to gbigbọmẹ, bosọ yí baptẹm taidi dopo to Kunnudetọ Jehovah tọn lẹ mẹ.

Mọwẹ, mẹsusu wẹ nọ yin tulina dogbọn owẹ̀n ‘Jiwheyẹwhe he nọ namẹ homẹmiọn’ tọn dali. (Lomunu lẹ 15:4, 5) Enẹwutu, Kunnudetọ Jehovah tọn he tin to Italie lẹ magbe nado to apajlẹ Jiwheyẹwhe tọn hodo zọnmii gbọn owẹ̀n homẹmiọnnamẹ tọn etọn zizedonukọnna mẹdevo lẹ dali.