Hiẹ Sọgan Yọ́n Sọgodo!

Suhugan gbẹtọ lẹ tọn wẹ nọ lẹnnupọn tlala do sọgodo ji. Yé nọ jlo nado basi tito, yí nuyọnẹn do và akuẹ do ajọ́ de mẹ, podọ nado tindo numọtolanmẹ hihọ́ tọn. Ṣigba be aliho depope tin nado yọ́n nuhe sọgodo bẹhẹn na taun tọn ya?

To vivẹnudido mẹ nado yọ́n nuhe sọgodo bẹhẹn, gbẹtọvi lẹ ko tẹ́n nuyiwa wunmẹ lẹpo pọ́n. Lẹnunnuyọnẹntọ lẹdo tọn he nọ yin yiylọdọ sọgodo-plọntọ lẹ nọ gbeje nujijọ alọnu tọn lẹ pọ́n bo nọ dọ dọdai sọgodo tọn yetọn sinai do ehelẹ ji. Nuyọnẹntọ whẹho akuẹzinzan tọn lẹ lọsu nọ wà nudopolọ to adà yetọn mẹ. Sunwhlẹvuplọntọ lẹ po dọṣẹdọtọ lẹ po nọ ganjẹ afinyọnnuwiwa ojlẹ he mẹ mẹdopodopo yin jiji te, obogàn dọṣẹdidọ tọn lẹ, po afinyọnnu lẹ po go, podọ yé tindo hodotọ susu lẹ. Di apajlẹ, sunwhlẹvuplọntọ Flanse-nu lọ Nostradamus to yindi deji zọnmii, dile etlẹ yindọ ewọ ko kú sọn owhe kanweko susu die.

Omẹ ehe lẹpo he jlo na yin yẹwhegán lẹ ko sọawuhia nado yin mẹhe go yè ma sọgan dejido po mẹhẹnjẹflumẹtọ lẹ po tlala. Etẹwutu? Na yé gbẹ́ Jehovah Jiwheyẹwhe po Ohó etọn, Biblu po dai wutu. Na whẹwhinwhẹ́n ehe wutu yé gboawupo nado na gblọndo na kanbiọ dodonu tọn mọnkọtọn lẹ taidi: ‘Naegbọn yẹn sọgan deji dọ nuhe yè dọ dọdai etọn to Biblu mẹ lẹ dona jọ dandan? Nawẹ yé sọgbe hẹ lẹndai Jiwheyẹwhe tọn na gbẹtọvi lẹ gbọn? Nawẹ yẹn po whẹndo ṣie po sọgan mọaleyi sọn dọdai ehelẹ mẹ gbọn?’ Biblu na gblọndo na kanbiọ ehelẹ.

Dọdai Biblu tọn sọ yiaga to aliho susu mẹ. To ma taidi dọdai sunwhlẹvuplọntọ tọn lẹ mẹ, e nọ na dotẹnmẹ nudide mẹdetiti tọn. Enẹwutu, sẹ́gbè ma nọ deanana mẹde gba. (Deutelonomi 30:19) Nukinkan lẹ taidi enẹ heyin Nostradamus tọn lẹ gbọ̀agba walọ dagbe tọn, podọ yé nọ yí onú dabla po numọtolanmẹ sinsinyẹn po do sú odò awugbopo ehe tọn. Ṣigba dọdai Biblu tọn tindo dodonu walọ dagbe tọn he lodo gligli lẹ. E basi zẹẹmẹ nuhewutu Jiwheyẹwhe jlo na yinuwa dile ewọ ko lẹndai do. (2 Otannugbo lẹ 36:15) Podọ dọdai Jehovah tọn lẹ ma nọ gboawupo gbede gba, na “Jiwheyẹwhe . . . ma nọ dolalo” wutu. (Titu 1:2) Gbọnmọ dali, mẹhe yin anadena gbọn Ohó Jiwheyẹwhe tọn dali lẹ nọ zan gbẹzan dagbe, he tindo lẹndai, po ayajẹ tọn lẹ po bo ma nọ hẹn ojlẹ họakuẹ po nutindo yetọn lẹ po gú do yanwle ovọ́ lẹ ji gba.—Psalm 25:12, 13.

Ehelẹ po nuagokun susu devo lẹ po ko yin hodọdeji to Plidopọ Agbegbe “Ohó Dọdai Jiwheyẹwhe Tọn” 1999/2000 tọn he Kunnudetọ Jehovah tọn lẹ basi lẹdo aihọn pé tẹnmẹ. Hodidọ lẹ, hokansemẹ lẹ, wadohia lẹ, po nupinpọn-do-plọnnu Biblu tọn dopo po ko dọ̀n ayidonugo mẹplidopọ lẹ tọn wá ogú jiawu gbigbọmẹ tọn he nọ yin vivi etọn dù gbọn mẹhe nọ plọn bo nọ yí ohó dọdai Jiwheyẹwhe tọn do yizan mẹ lẹ dali ji. Hosọ he bọdego na gbadopọnna nuagokun ojlofọndonamẹ plidopọ lọ tọn delẹ.