Yé Mọ Owanyi Agun lọ Tọn
YOMARA, Marcelo po Hiver po yin nọvi-nọvi atọ̀n delẹ he nọ nọ̀ glètoho pẹvi de mẹ to Guatemala. Yomara jẹ Biblu plọn hẹ Kunnudetọ lẹ ji, podọ to godo mẹ nọvisunnu etọn lẹ lọsu hopódona ẹn. Amọ́ nuhahun de tin. Nọvi-nọvi atọ̀n lọ lẹ depope ma nọ mọnú, podọ yé ma gán nọ hia nukinkan nukuntọ́nnọ lẹ tọn. Enẹwutu, mẹhe nọ plọn Biblu hẹ yé wẹ nọ hia owe nupinplọn tọn lọ po wefọ he to nupinplọn lọ mẹ lẹ po na yé.
Avùnnukundiọsọmẹ devo wẹ opli agun tọn lẹ sọ nọ bẹhẹn. Yelọsu na yede ma gán zingbejizọnlin na nukunwhiwhe 40 yì Plitẹnhọ Ahọluduta tọn he yá do yé hugan mẹ. Amọ́, mẹmẹsunnu he to agun lọ mẹ lẹ basi tito nado nọ ze yé yì opli lẹpo. Podọ, whenue nọvi-nọvi lọ lẹ jẹ azọ́nwa ji to opli osẹ ṣẹnṣẹn tọn ji, mẹmẹsunnu lẹ nọ gọalọna yé nado plọn nuzedonukọnnamẹ yetọn lẹ do tamẹ.
To mai 2019, opli agun tọn lẹ jẹ yinyin bibasi ji to gbétatò yetọn mẹ. To ojlẹ lọ mẹ, asu po asi po he yin gbehosọnalitọ whepoponu tọn de sẹtẹn wá gbétatò lọ mẹ. Yé ma nọ hia wekinkan nukuntọ́nnọ lẹ tọn, mọ yé masọ yọ́n kàn, amọ́ yé yí do basi yanwle nado plọn nọvi-nọvi atọ̀n lọ lẹ lehe yè nọ wàmọ do. Yé yì wesẹdotẹn de nado plọnnu gando wekinkan nukuntọ́nnọ lẹ tọn po aliho he mẹ yè nọ plọn ẹn mẹdevo lẹ te po go.
Marcelo to gblọndo na to opli agun tọn de ji
To osun kleun delẹ gblamẹ, nọvi-nọvi atọ̀n lọ lẹ gán hia wekinkan nukuntọ́nnọ lẹ tọn po awubibọ po, podọ enẹ zọ́n bọ yé yinukọn dogọ to gbigbọ-liho. a Todin Yomara, Marcelo po Hiver po to sinsẹ̀n taidi gbehosọnalitọ whepoponu tọn lẹ. Marcelo yin devizọnwatọ lizọnyizọnwiwa tọn de. To osẹ lẹpo mẹ, yé omẹ atọ̀n lẹ nọ hẹn alọnu yetọn ján to nuwiwa gbigbọmẹ tọn lẹ mẹ. Zohunhun yetọn nọ yinuwado mẹdevo lẹ ji.
Nọvi-nọvi atọ̀n lọ lẹ yọ́n pinpẹn owanyi po godonọnamẹ agun lọ tọn po. Yomara dọmọ: “Sọn gbeegbe mí dukosọ hẹ Kunnudetọ lẹ whla tintan, yé do owanyi nugbo Klistiani tọn hia mí.” Marcelo yidogọ dọ: “Mí do họntọn dagbedagbe lẹ to agun mítọn mẹ, podọ mí yin apadewhe pipli mẹmẹsunnu tọn lẹdo aihọn pé tọn de he owanyi kọndopọ.” Yomara po nọvi etọn lẹ po to jejeji nado mọ lehe Jehovah na hẹn aigba lọ zun paladisi de do.—Salm. 37:10, 11; Isa. 35:5.
a Alọnuwe de he hosọ etọn yin Learn to Read Braille to glẹnsigbe mẹ yin awuwlena nado gọalọna nukuntọ́nnọ kavi mẹhe ma nọ mọnú ganji lẹ nado plọn lehe yè nọ hia bosọ nọ kàn nukinkan nukuntọ́nnọ lẹ tọn do.
A Gán Sọ Pọ́n Hosọ Ehelẹ
LEHE NUNINA MÌTỌN LẸ NỌ YIN YIYIZAN DO
Aliho Nukinkan Tọn de He Nọ Diọ Gbẹzan Mẹtọn
E ma yin owe nukuntọ́nnọ lẹ tọn kẹdẹ wẹ mí nọ bayi, mí sọ nọ plọnmẹ lehe yè sọgan hia owe nukuntọ́nnọ lẹ tọn do ga.
