Dọ lehe a yin pinplọn whẹ́n do na mí.

N’yin jiji to 1979 to États-Unis. Whenue n’do owhe atọ̀n, mẹjitọ ṣie lẹ gbẹ́ yede. Onọ̀ ṣie plọn mi aṣa sinsẹ̀n Ju lẹ tọn lẹ bosọ do mi hlan yeshivas, yèdọ wehọmẹ Juvi lẹ tọn lẹ. Whenue n’do owhe ṣinawe, mí sẹtẹn yì Islaeli na owhe dopo, bọ n’yì wehọmẹ to lẹdo he mẹ yè nọ wà ogle-zọ́n te de mẹ. Enẹgodo, yẹn po onọ̀ ṣie po sẹtẹn yì Mexique.

Dile etlẹ yindọ sinagọgu de ma to lẹdo lọ mẹ, n’gbẹ́ hẹn aṣa Ju lẹ tọn he n’plọn go. N’nọ tá vẹla lẹ to Gbọjẹzangbe, nọ hia Torah, bo nọ yí siddour zan nado hodẹ̀, yèdọ owe odẹ̀ tọn de. To wehọmẹ, n’nọ saba dọna klasigbẹ́ ṣie lẹ dọ sinsẹ̀n ṣie wẹ yin sinsẹ̀n tintan. N’ma ko hia kandai he mẹsusu nọ ylọdọ Alẹnu Yọyọ lọ pọ́n gbede, he dọhodo lizọnyizọn po nuplọnmẹ Jesu Klisti tọn lẹ po ji. Na nugbo tọn, Mama wẹ gbẹ́ na mi ma nado hia ẹ, na e to budi dọ nuplọnmẹ he tin to e mẹ lẹ sọgan hẹn mi buali.

Naegbọn a do de nado hia Alẹnu Yọyọ lọ?

Whenue n’do owhe 17, n’lẹkọyi États-Unis nado yì dotana wepinplọn ṣie. To finẹ, mẹyinyọnẹn ṣie de he yin Klistiani dọna mi dọ, gbẹzan ṣie ma na tindo zẹẹmẹ de, eyin n’ma yọ́n Jesu.

N’dọna ẹn dọ, “Ali bu wẹ mẹhe do yise to Jesu mẹ lẹpo te.”

E kanse mi dọ, “Be a ko hia kandai Alẹnu Yọyọ lọ tọn lẹ pọ́n ya?”

Bọ n’gblọn na ẹn dọ, “Eyeo.”

Enẹgodo e dọ dọ “N’ja! A ma ko yọ́n nudepope gando nulọ go, bo ka’o jẹagọdo nulọ, be e ma yin nulunu niyẹn wá?”

Nuhe e dọ lẹ yinuwado ji e taun, na yẹnsu ko yọnẹn dai dọ nulunu wẹ e yin nado nọ pọ́n jẹhọn mẹ do dọho gando nue yè ma mọdona de go. Po whiwhẹ po, n’gbọ bo yí Biblu etọn sọyi whé bo jẹ Alẹnu Yọyọ lọ hia ji.

Obá tẹ mẹ wẹ nuhe a plọn lẹ yinuwado ji we jẹ?

E paṣa mi taun whenue n’wá mọdọ Ju lẹ wẹ basi kandai Alẹnu Yọyọ lọ tọn. Humọ, lehe n’to kandai lọ hia sọ, mọ wẹ e to wunhọ́n na mi dogọ do niyẹn dọ Jesu nọ jọmẹ bosọ yin Juvi whiwhẹnọ de he nọ jlo na gọalọna gbẹtọ lẹ, bo ma nọ hò yé dù. N’sọ yì wesẹdotẹn de, bo whé owe he dọho gando ewọ go lẹ. Etomọṣo, depope to owe ehelẹ mẹ ma hẹn mi kudeji dọ ewọ wẹ Mẹsia lọ. Delẹ to yé mẹ tlẹ dohia dọ ewọ wẹ Jiwheyẹwhe, yèdọ linlẹn de he n’ma kẹalọyi paali. Na taun tọn, mẹnu wẹ Jesu hodẹ̀ hlan? Ede wẹ ya? To popolẹpo mẹ, Jesu tlẹ sọ kú. Biblu ka dọ gando Jiwheyẹwhe go dọ: “Hiẹ ma nọ kú.” *

Nawẹ whẹho enẹlẹ wá họnwun na we gbọn?

Nugbo ma nọ sọta ede, bọ n’sọ magbe nado mọ nugbo lọ. Enẹwutu, n’yí ahundopo do hodẹ̀ hlan Jiwheyẹwhe po avi po—whla tintan niyẹn he n’wàmọ matin owe dẹ̀hiho tọn siddour zinzan. N’hodẹ̀ fó tlolo e ma dẹn bọ n’sè kọ́kọ́kọ́. Kunnudetọ Jehovah tọn yọnnu awe wẹ wá ohọ̀n ṣie ji. Yé na mi owe sinai do Biblu ji de. Owe ehe gọna hodọdopọ voovo he n’tindo hẹ Kunnudetọ lọ lẹ hẹn mi kudeji dọ Biblu ji wẹ nuyise yetọn lẹ sinai do. Di apajlẹ, Kunnudetọ lẹ ma kẹalọyi dọ Jesu yin apadewhe Atọ̀n-to-Dopo mẹ tọn, amọ́ ewọ yin “Visunnu Jiwheyẹwhe tọn,” * podọ “bẹjẹeji nudida Jiwheyẹwhe tọn lẹ tọn lọ.” *

Ojlẹ vude to enẹgodo, n’lẹkọyi Mexique, bo zindonukọn nado to dogbapọnna dọdai he gando Mẹsia lọ go lẹ hẹ Kunnudetọ lẹ. Awuji mi nado mọdọ dọdai he gando ewọ go lẹ ma whè! Etomọṣo, n’gbẹ́ to ayihaawe do jẹ obá de mẹ. N’nọ kanse dee dọ: ‘Be Jesu wẹ yin omẹ dopo gee he go dọdai lọ lẹ mọ hẹndi do ya?’ podọ ‘Eyin e ka yindọ yè yí i nado yí zinzin do yí adà de wà taidi to sinima de mẹ poun wẹ lo?’

Etẹwẹ wá whàn we nado bayi dide dagbe hugan lọ?

Obá he mẹ dọdai he Kunnudetọ lẹ dohia mi mọ hẹndi jẹ ma gán yin nuyiwa yẹdoklọmẹtọ de tọn. Di apajlẹ, hugan owhe 700 jẹnukọn wẹ yẹwhegán Mika ko dọ dọdai dọ Mẹsia lọ na yin jiji to Bẹtlẹhẹm Jude tọn. * Mẹnu wẹ gán magbe dọ ofi le-le wẹ emi na yin jiji te? Isaia wlan dọ Mẹsia lọ na yin hùhù taidi sẹ́nhẹngbatọ he yè dowinyan de, amọ́ oṣiọ etọn na yin dìdì taidi omẹ nukundeji de tọn. * Dọdai ehe lẹpo wẹ mọ hẹndi do Jesu go.

Kunnudenu he dutomẹji hugan lọ wẹ hukan whẹndo tọn he mẹ Jesu wá sọn. Biblu dọ dọ Mẹsia lọ na yin ovivi Ahọlu Davidi tọn de. * Na Juvi hohowhenu tọn lẹ nọ sẹ̀ kandai hukan whẹndo tọn mẹdetiti tọn, po dehe to ahọluzọnwatọ lẹ po si lẹ do ganji wutu, eyin Jesu ma yin kúnkan Davidi tọn de dai wẹ, ován daho wẹ kẹntọ etọn lẹ na yí do kún ehe pé! Amọ́ din, yé ma gán wàmọ, na mẹdepope ma gán jẹagọdo dọ whẹndo Davidi tọn mẹ wẹ Jesu wá sọn. Gbẹtọgun lẹ lọsu tlẹ nọ ylọ ẹ dọ “Visunnu Davidi tọn.” *

To owhe 70 W.M.—yèdọ owhe 37 to okú Jesu tọn godo—awhànfuntọ Lomu tọn lẹ và Jelusalẹm sudo, podọ kandai hukan whẹndo tọn lọ lẹ bu kavi yin hinhẹngble. Abajọ e do sọgbe dọ Mẹsia lọ ni sọawuhia jẹnukọnna owhe 70 W.M, nado sọgan yin yinyọnẹn to kọndopọ mẹ hẹ kandai hukan whẹndo tọn lọ lẹ.

Nawẹ nukunnumimọjẹ ehe mẹ yinuwado ji we gbọn?

To Deutelonomi 18:18, 19 mẹ, e ko yin didọdai dọ Jiwheyẹwhe na ze yẹwhegán he taidi Mose nkọ de daga. “Yẹn na biọ to [mẹdepope] he ma na dotoaina ohó ṣie he ewọ na dọ to oyín ṣie mẹ lẹ si nado dogbè,” wẹ Jiwheyẹwhe dọ. Na n’plọn Biblu blebu po sọwhiwhe po wutu, n’kudeji dọ Jesu Nazalẹti tọn wẹ yin yẹwhegán enẹ.