Nọ Dín Alọgọ

“Podọ mẹde sọgan duto mẹhe to edeṣo ji, ṣigba omẹ awe topọ sọgan nọte pehẹ ẹ.”—Yẹwhehodọtọ 4:12.

PO ALỌGỌ mẹdevo lẹ tọn po, e yọnbasi taun dọ mí ni gbawhàn kẹntọ de tọn—mahopọnna mẹdepope kavi nudepope he yin kẹntọ lọ. Enẹwutu, eyin a do aṣa lọ nado nọ nù azọ̀ bo jlo na dudeji, nuyọnẹnnu wẹ e na yin dọ a ni biọ alọgọ sọn hagbẹ whẹndo tọn kavi họntọn towe lẹ dè—kavi sọn mẹdepope dè he na yí ahundopo do gọalọna we po homẹfa po.

Pọ́n eyin a gán dọnsẹpọ mẹhe ko do aṣa mọnkọ dai bo wá jodo lẹ, na gbọnvona dọ yé sọgan mọnukunnujẹ ninọmẹ towe mẹ, yé nasọ gọalọna we. Mẹmẹsunnu de he nọ yin Torben bo nọ nọ̀ Danemark dọmọ: “Alọgọ he n’mọyi sọn mẹdevo lẹ dè hẹn ale mayọnjlẹ wá na mi. Abraham he nọ nọ̀ Inde wlan dọmọ: “Owanyi nujọnu tọn he whẹndo ṣie po Klistiani hatọ lẹ po dohia mi gọalọna mi nado jo aṣa enẹ do.” Ṣigba, to whedelẹnu, alọgọ whẹndo po họntọn lẹ po tọn kẹdẹ ma nọ pé.

Dawe de he nọ yin Bhagwandas dọmọ: “Owhe 27 wẹ n’nù azọ̀ na, amọ́ whenue n’wá plọn nuhe Biblu dọ gando aṣa mawé lẹ go, n’basi dide nado de ofẹ̀n sọn yé mẹ. N’tẹnpọn nado dealọpòna. N’doalọtena pọninọ hẹ hagbẹ ṣie hoho tọn lẹ. Podọ n’sọ kàn ayinamẹ biọ mẹdevo lẹ. Ṣogan nude ma diọ. To zánmẹ gbèdopo, n’hodẹ̀ bo dọ nuhe to ahun ji na mi lẹpo na Jehovah Jiwheyẹwhe bo vẹ̀ ẹ nado gọalọna mi na n’ma duto aṣa enẹ ji. Podọ to godo mẹ e wá pà mi!”

Onú titengbe devo wẹ nado wleawudai nado duto ahlidanu he a gán wá pehẹ lẹ ji. Etẹwẹ yin ahlidanu enẹlẹ? Hosọ he bọdego basi zẹẹmẹ deji.

[Apotin]

BE A DONA ZAN AMASIN WẸ YA?

Amasin delẹ he nọ gọalọnamẹ nado jo azọ̀-nùnù do, taidi le patch à la nicotine, ko hẹn akuẹ dọla liva susu wá na ajọwhé lẹ. Whẹpo a nido basi dide nado nọ zan amasin mọnkọ lẹ, lẹnnupọndo kanbiọ he bọdego lẹ ji:

Ale tẹlẹ wẹ demẹ? Linlin lẹ dohia dọ aliho nukunpedomẹgo dotowhé tọn susu nọ hẹn ẹn yọnbasi taun nado jo azọ̀-nùnù do, na yé nọ dekanpona nuyiwadomẹji he azọ̀-nùnù jijodo nọ hẹnwa lẹ. Ṣigba, mẹdelẹ dọ dọ aliho nukunpedomẹgo tọn mọnkọ lẹ ma nọ wazọ́n na ojlẹ dindẹn.

Owù tẹlẹ wẹ demẹ? Amasin delẹ zinzan sọgan hẹn nuhahun delẹ wá, taidi oslú, apọṣimẹ, kavi linlẹn mẹdetiti hùhù tọn. Hẹn do ayiha mẹ dọ aliho nukunpedomẹgo tọn he ma nọ bẹ nicotine hẹn lẹ nọ yí wunmẹ amasin adínọ enẹ tọn devo zan poun wẹ, podọ ehe nọ hẹn nuhahun agbasamalo tọn lẹ wá. Enẹwutu, nado dọ hójọhó mẹhe nọ zan amasin mọnkọ lẹ na gbẹ́ yin afanumẹ na yé.

Aliho nukunpedomẹgo tọn devo tẹwẹ tin? To dodinnanu de whenu, 88 to kanweko ji mẹhe penugo bo jo azọ̀-nùnù do lẹ tọn dọ dọ yé doalọtena to afọdopolọji wẹ matin amasin zinzan.