EYIN yè ko mọ azọ̀n jẹmagbọ de na we kavi na mẹvivẹ towe de pọ́n, a na ko yọ́n lehe e nọ hẹnmẹ jẹflumẹ do. Gbọnvona awufiẹsa he azọ̀n lọ lọsu nọ hẹnwa, nususu devo lẹ sọ nọ hẹn awufiẹsa wá ga. Nuhe sọ nọ hẹn ninọmẹ lọ ylan dogọ delẹ wẹ dotowhé yìyì mapote, lehe e nọ vẹawu nado mọ nukunpedomẹgo delẹ yí kavi suahọ yetọn do, kavi nuyiwadomẹji ylankan amasin delẹ tọn. Awufiẹsa he azọ̀n jẹmagbọ nọ hẹnwa lẹ gán húagbọ́mẹ taun.

Fie wẹ mí gán lẹhlan nado mọ alọgọ? Dẹ̀hiho hlan Jiwheyẹwhe po Biblu hihia po ko gọalọna  mẹsusu nado mọ homẹmimiọn. Owanyi he whẹndo mẹtọn po họntọn lẹ po nọ dohia sọ nọ gọalọ ga.

“Yí yise he a tindo to Jiwheyẹwhe mẹ do doakọnna azọ̀n he jẹ a te,” wẹ Robert he tindo owhe 58 dọ, “podọ ewọ na gọalọna we. Nọ hodẹ̀ hlan Jehovah. Nọ dọ nuhe to ahun ji na we lẹ na ẹn. Nọ biọ gbigbọ wiwe etọn. Nọ biọ ẹ dọ ni na we huhlọn, na a nido gọalọna whẹndo towe podọ nado doakọnna azọ̀n lọ.

“Eyin whẹndo towe gọalọna we bo ma gbẹkọ go we, e nọ wà dagbe taun. E whè gbau, mẹdopo kavi awe nọ ylọ mi to alokan ji to gbèdopo bo nọ kanse dọ, ‘Nawẹ a te do?’ Họntọn ṣie lẹ sọ nọ na mi tuli taun. Yé gọalọna mi taun, bọ ehe zọ́n bọ n’ma jogbe.”

Taidi họntọn de, eyin a yì dla mẹhe to azọ̀njẹ de pọ́n, hẹn nuhe Linda dọ do ayiha mẹ dọmọ: “E họnwun dọ mẹhe to azọ̀njẹ nọ jlo na de ayiha sọn azọ̀n lọ ji bo ma nọ jlo nado to hodọ gando azọ̀n lọ go to whelẹponu. Enẹwutu, nọ dọho hẹ ẹ do nudevo lẹ ji.”

Alọgọ Jiwheyẹwhe tọn bibiọ, Owe-wiwe lẹ hihia gọna alọgọ whẹndo po họntọn lẹ po tọn gán hẹn mí kudeji dọ mí gán gbẹ́ duvivi gbẹninọ tọn eyin mí tlẹ to azọ̀n sinsinyẹn de jẹ.