BE HIẸ LỌSU GÁN BASI NUDIDE DEPOPE GANDO SỌGODO TOWE GO YA? Mẹdelẹ nọ lẹndọ nuhe nọ jọ do yé go lẹ ma yin nudide yetọn, amọ́ biọwá wẹ. Eyin yé bayi tito de bọ e ma pà yé, yé nọ dọ poun dọ e ma yin owhẹ̀ emitọn. Yé nọ dọ, “Nuhe yin kinkan do mẹji wẹ!”

Mẹdevo lẹ nọ jẹflumẹ eyin yé ma gán diọ kanyinylan po mawadodo po he pehẹ yé te to aihọn ehe mẹ lẹ. Yé sọgan ko tẹnpọn nado hẹn gbẹzan yetọn pọnte, amọ́ awhàn, sẹ́nhẹngba, nujijọ ajiji lẹ po azọ̀n po ko hẹn tito yetọn lẹ gble whlasusu. Enẹwutu, yé nọ kanse yede dọ, ‘Naegbọn n’na gbẹ́ to tuklajẹ?’

Nugbo wẹ dọ nujijọ gbẹ̀mẹ tọn delẹ sọgan diọ tito mítọn lẹ. (Yẹwhehodọtọ 9:11) Amọ́, mílọsu wẹ na de eyin mí na nọgbẹ̀ kakadoi kavi lala. Na nugbo tọn, Biblu dohia dọ mílọsu wẹ na bayi nudide gando sọgodo mítọn go. Pọ́n nue e dọ lẹ.

Mose, mẹhe deanana Islaelivi lẹ dọna yé to whenue yé jlo na biọ Aigba Pagbe tọn lọ ji dọmọ: “Yẹn ko ze ogbẹ̀ po okú po donukọnna we, dona po dẹ̀hodo po; hiẹ sọ dona de ogbẹ̀, na hiẹ nido nọgbẹ̀, yèdọ hiẹ po kúnkan towe lẹ po, gbọn wanyina Jehovah Jiwheyẹwhe towe, todidoai na ogbè etọn po titẹ́ do ewọ go gligli po dali.”—Deutelonomi 30:15, 19, 20.

“Yẹn ko ze ogbẹ̀ po okú po donukọnna we, dona po dẹ̀hodo po; hiẹ sọ dona de ogbẹ̀.”​—Deutelonomi 30:19

Mọwẹ! Jiwheyẹwhe whlẹn Islaelivi lẹ sọn kanlinmọgbenu to Egipti bo ze todido lọ donukọnna yé nado vò bo do ayajẹ to Aigba Pagbe tọn lọ ji. Amọ́, yé dona wà nude whẹpo do mọ onú enẹlẹ. Nado mọ dona enẹlẹ, yé dona “de ogbẹ̀.” Gbọnna? Yé dona ‘yiwanna Jiwheyẹwhe, dotoaina ogbè etọn bo tẹdo ewọ go gligli.’

To egbehe, ninọmẹ dopolọ mẹ wẹ mí te, nudide he mí basi wẹ na do nue sọgodo mítọn na yin hia. Eyin mí yiwanna Jiwheyẹwhe, dotoaina ogbè etọn bo tẹdo ewọ go gligli, enẹ na dohia dọ mí de ogbẹ̀, yèdọ ogbẹ̀ madopodo to paladisi mẹ to aigba ji. Amọ́, etẹwẹ enẹlẹ wiwà nọ biọ?

Owanyi wẹ yin jẹhẹnu tangan Jiwheyẹwhe tọn. Gbigbọ deanana apọsteli Johanu nado wlan dọ, “Jiwheyẹwhe wẹ owanyi.” (1 Johanu 4:8) Enẹ wẹ zọ́n bọ whenue yè kàn gbedide he klohugan lọ biọ Jesu, e dọmọ: “Hiẹ dona yí ahun towe lẹpo, alindọn towe lẹpo, podọ ayiha towe lẹpo do yiwanna Jehovah Jiwheyẹwhe towe.” (Matiu 22:37) E ma yin tonusise mọmọ tọn kavi obu tata wẹ nọ dohia dọ mí yin họntọn Jehovah Jiwheyẹwhe tọn gba, amọ́ owanyi wẹ nọ do enẹ hia. Amọ́, naegbọn mí dona yiwanna ewọ?

Owanyi he Jehovah tindo na gbẹtọ taidi dehe mẹjitọ owanyinọ de nọ tindo na ovi etọn lẹ. Dile etlẹ yindọ mapenọ wẹ mẹjitọ lẹ, owanyi nọ sisẹ́ yé nado deanana ovi yetọn lẹ, na tuli yé, gọalọna yé bo plọn yé, na yé jlo dọ yé ni do ayajẹ bo vò to gbẹ̀mẹ wutu. Bọ etẹwẹ mẹjitọ lẹ nọ donukun sọn ovi lẹ si? Yé nọ jlo dọ ovi lẹ ni yiwanna yé ga bo setonuna nuhe yé nọ plọn yé lẹ, na e nido yin dagbe na yé. Be e ma sọgbe dọ Otọ́ olọn mẹ tọn mítọn he yin mẹpipe ni donukun dọ mí ni yiwanna emi, na nuhe emi ko wà na mí lẹpo ya?

To ogbè he mẹ Biblu yin kinkan do to bẹjẹeji, hogbe lọ ‘dotoai’ nọ saba zẹẹmẹdo “setonu.” Nudopolọ dọ wẹ mí te eyin mí dọna ovi de dọ, “Doto mẹjitọ towe lẹ.” Enẹwutu, nado dotoaina ogbè Jiwheyẹwhe tọn nọ biọ dọ mí ni dindona nue e dọ bo setonuna. Nugbo wẹ dọ mí ma gán sè ogbè Jiwheyẹwhe tọn tlọlọ, amọ́ mí gán dotoaina ẹn eyin mí nọ hia Biblu bo nọ wà nuhe e dọ lẹ.—1 Johanu 5:3.

Nado dohia dọ nujọnu wẹ e yin nado dotoaina ogbè Jiwheyẹwhe tọn, Jesu dọ to gbèdopo dọmọ: “Gbẹtọ ma nọ nọgbẹ̀ gbọn núdùdù kẹdẹ dali gba, ṣigba gbọn ohó he nọ tọ́n sọn onù Jehovah tọn mẹ lẹpo dali.” (Matiu 4:4) Núdùdù yin nujọnu, amọ́ nupinplọn gando Jiwheyẹwhe go yin nujọnu humọ. Etẹwutu? Ahọlu nuyọnẹntọ Sọlomọni dọmọ: “Hihọ́ de wẹ nuyọnẹn yin, kẹdẹdile akuẹ yin hihọ́ de do, ṣigba ale oyọnẹn tọn die: Nuyọnẹn nọ whlá ogbẹ̀ mẹhe tindo e tọn.” (Yẹwhehodọtọ 7:12) Oyọnẹn po nuyọnẹn he wá sọn Jiwheyẹwhe dè po gán họ́ mí todin bo nasọ gọalọna mí nado bayi nudide dagbe he na zọ́n bọ mí na mọ ogbẹ̀ madopodo to sọgodo.

Flin apajlẹ Jesu tọn he ji mí dọhodo to hosọ he wayi mẹ, ehe mẹ e dọ te dọmọ: “Bibó wẹ họntonu lọ podọ jinján wẹ aliho lọ he nọ planmẹ yì ogbẹ̀ mẹ, omẹ vude wẹ sọ to dindin in mọ.” (Matiu 7:13, 14) Nado zinzọnlin gbọn aliho enẹ ji bo mọ ogbẹ̀ madopodo, mí dona tindo anademẹtọ dagbe de bo hodo anademẹ etọn. Nuhe zọ́n niyẹn bọ mí dona tẹdo Jiwheyẹwhe go gligli. (Salmu lẹ 16:8) Amọ́, nawẹ mí na wàmọ gbọn?

Nususu wẹ tin he mí dona nọ wà to azán dopodopo ji, podọ nudevo lẹ sọ tin he mí na ko nọ jlo nado wà. Onú enẹlẹ gán nọ yí whenu mítọn kavi fẹayihasẹna mí bọ mí ma na nọ tindo whenu sọmọ nado nọ lẹnnupọndo nuhe Jiwheyẹwhe jlo dọ mí ni nọ wà lẹ ji. Enẹ wẹ zọ́n bọ Biblu flinnu mí dọmọ: “Mì nọ payi tlala dọ lehe mì to zọnlinzin do ni ma yin taidi nulunọ blo ṣigba taidi nuyọnẹntọ lẹ, mì nọ yí whenu mìtọn zan to aliho dagbe hugan mẹ, na ylankan wẹ azán lẹ wutu.” (Efesunu lẹ 5:15, 16) Mí nọ tẹdo Jiwheyẹwhe go gbọn họntọnjiji hẹ ẹ pinpọnhlan di nujọnu hugan to gbẹzan mítọn mẹ dali.—Matiu 6:33.

Nugbo wẹ dọ a ma gán wà nude nado diọ nuhe ko wayi lẹ, amọ́ a gán basi nudide dagbe gando sọgodo towe po mẹyiwanna towe lẹ tọn po go. Biblu dohia dọ Otọ́ olọn mẹ tọn mítọn, Jehovah Jiwheyẹwhe yiwanna mí taun, podọ e sọ do nuhe e jlo dọ mí ni wà hia mí. Pọ́n nuhe yẹwhegán Mika dọ:

“Gbẹtọ E, ewọ ko dọ nuhe yin dagbe na we. Podọ etẹwẹ Jehovah to bibiọ sọn asi we? Kiki nado nọ yí whẹdida dodo zan, nado yiwanna nugbodidọ, podọ nado nọ yí whiwhẹ do zinzọnlin hẹ Jiwheyẹwhe towe!”​—Mika 6:8.

Be hiẹ na kẹalọyi oylọ Jehovah tọn nado zinzọnlin hẹ ẹ bo wá mọ dona madopodo he e jlo na na mẹhe wàmọ lẹ ya? Nudide lọ to alọ towe mẹ!