Vendredi 24 février 2023 yin azán whepéwhenu tintan nujijọ he dobu de tọn, yèdọ azán he gbè awhàn he fọ́n do Ukraine ji na bayi owhe dopo. Linlin delẹ dọ dọ awhànfuntọ Ukraine po Russie po tọn nudi 300 000 wẹ yin hùhù kavi gbleawu, bọ sọhayinanu de dohia dọ tòvi paa nudi 30 000 wẹ na ko kú to awhàn lọ whenu. Amọ́, e yọnbayi dọ sọha enẹlẹ ni yiaga taun humọ.

 E blawu dọ nudepope ma ko dohia dọ awhàn enẹ na doalọte to madẹnmẹ.

•   “E ko dibla yì owhe dopo he awhànpa Russie tọn tọ́nawhàn Ukraine, amọ́ kakajẹ din nudepope ma ko dohia dọ nudindọn enẹ na wá vivọnu tlolo. E vẹawu nado dọ taun eyin ode to awhànpa awe lẹ mẹ na duto avùnhiho lọ ji, podọ e di dọ e ma yọnbayi dọ yé omẹ awe lẹ ni dewé dopọ bo wá gbèta dopo kọ̀n.”—Sọgbe hẹ linlin he NPR (National Public Radio) na to 19 février 2023.

 Enẹwutu, mẹsusu lẹ wẹ jẹflumẹ nado mọ awufiẹsa gọna yajiji he awhàn ehe po nudindọn devo he to yìyì lẹdo aihọn pé lẹ po to hinhẹnwa homẹvọnọ lẹ ji. Todido tẹwẹ Biblu namẹ? Be awhàn na wá doalọte gbèdopo ya?

 Biblu dọho gando awhàn de go he na whlẹn kúnkàn gbẹtọvi tọn gán, kakati nado và ẹ sudo. Awhàn enẹ nọ yin yiylọdọ Amagẹdọni, podọ e yin zẹẹmẹ basina taidi “awhàn azán daho Jiwheyẹwhe Ganhunupotọ lọ tọn.” (Osọhia 16:14, 16) Awhàn enẹ wẹ Jiwheyẹwhe na zan nado doalọtena gandudu gbẹtọvi tọn, yèdọ gandudu de he zọ́n bọ awhàn susu he hẹnnugble taun lẹ ko jọ. Nado yọ́n lehe Amagẹdọni na dekọtọn do jijọho he na dẹn-to-aimẹ de mẹ do, hia hosọ he bọdego lẹ:

•   “Etẹwẹ Awhàn Amagẹdọni Tọn Zẹẹmẹdo?”

•   “Amagẹdọni—Wẹndagbe De!”