Matiu 22:1-46
22 Whladopo dogọ, Jesu sọ yí apajlẹ lẹ do dọhona yé dọmọ:
2 “Ahọluduta olọn tọn sọgan yin yiyijlẹdo ahọlu de go he basi hùnwhẹ alọwle tọn+ de na visunnu etọn.
3 E sọ do afanumẹ etọn lẹ hlan nado yì ylọ mẹhe yin oylọ-basina lẹ wá hùnwhẹ alọwle tọn lọ, ṣigba yé ma jlo nado wá.+
4 Whladopo dogọ, e do afanumẹ devo lẹ hlan, bo dọmọ, ‘Mì dọna mẹhe yin oylọ-basina lẹ dọmọ: “Mì pọ́n! Yẹn ko wleawuna núdùdù ṣie, oyìnsú po kanlin dojó ṣie lẹ po ko yin hùhù, bọ nulẹpo ko sọgbe. Mì wá hùnwhẹ alọwle tọn lọ.”’
5 Mahopọnna enẹ, yé ma kiya, yé sọ tọ́nyi, ode yì ogle etọn titi mẹ, devo yì ajọ́ etọn gbé;+
6 ṣigba mẹhe pò lẹ wle afanumẹ etọn lẹ, bo yinuwa hẹ yé po kanyinylan po bosọ hù yé.
7 “Ahọlu lọ sọ gblehomẹ, bo do awhànpa etọn lẹ hlan bosọ hù hlọnhutọ enẹlẹ bo fiọ tòdaho yetọn.+
8 Enẹgodo, e dọna afanumẹ etọn lẹ dọ, ‘Hùnwhẹ alọwle tọn lọ ko yin awuwlena fó, ṣigba mẹhe yin oylọ-basina lẹ ma jẹ gba.+
9 Enẹwutu, mì yì aliho he tọ́n sọn tòdaho lọ mẹ lẹ ji, bo basi oylọna mẹdepope he mì mọ nado wá hùnwhẹ alọwle tọn lọ.’+
10 To whenẹnu, afanumẹ enẹlẹ tọ́nyi aliho lọ lẹ ji bo ylọ mẹhe yé mọ lẹpo pli, yèdọ mẹylankan po mẹdagbe lẹ po; bọ mẹhe to núdù* lẹ gọ́ ohọ̀ hùnwhẹ alọwle tọn lọ mẹ.
11 “To whenue ahọlu lọ wá nado pọ́n jonọ lẹ, nukun etọn jẹ dawe de ji he ma do awù alọwle tọn.
12 Enẹwutu, e dọna ẹn dọ, ‘Dawe, nawẹ hiẹ wagbọn do biọ fi matin awù alọwle tọn?’ Ewọ masọ sọgan kẹnù.
13 To whenẹnu, ahọlu lọ dọna devizọnwatọ etọn lẹ dọ, ‘Mì blá ẹ, alọ po afọ po bo dlan ẹn do zinvlu mẹ to gbonu. Finẹ wẹ e na viavi bo dù adúkúnkún te.’
14 “Na mẹsusu wẹ yin oylọ-basina, ṣigba vude wẹ yin dide.”
15 Whenẹnu wẹ Falesi lẹ yì bo blasé dopọ nado sọgan domọwle e to hodidọ etọn mẹ.+
16 Enẹwutu, yé do devi yetọn lẹ hlan ẹn, to pọmẹ hẹ mẹhe tin to ogbẹ́ Hẹlọdi tọn mẹ lẹ,+ bo dọmọ: “Mẹplọntọ, mí yọnẹn dọ hiẹ nọ dọ nugbo bo nọ plọnmẹ aliho Jiwheyẹwhe tọn to nugbo mẹ, podọ hiẹ ma nọ hò nukunta mẹdepope tọn pọ́n, na hiẹ ma nọ pọ́n awusọhia gbonu tọn gbẹtọ lẹ tọn.
17 Enẹwutu, dọna mí, etẹ hiẹ lẹn? Be e sọgbe hẹ osẹ́n* nado sú takuẹ hlan Sesali ya kavi lala?”
18 Ṣigba, na Jesu yọ́n kanyinylan yetọn wutu, e dọmọ: “Naegbọn mìwlẹ do to whiwhle mi pọ́n, mì yẹnuwatọ lẹ?
19 Mì do abọgan-kuẹ he nọ yin yíyí do sú takuẹ lọ hia mi.” Yé hẹn denali* de wá na ẹn.
20 E sọ dọna yé dọmọ: “Yẹdide po nukinkan mẹnu tọn po die?”
21 Yé dọmọ: “Sesali tọn.” Enẹgodo, e dọna yé dọmọ: “To whelọnu lo, mì yí nuhe yin Sesali tọn lẹ na Sesali, ṣigba nuhe yin Jiwheyẹwhe tọn lẹ na Jiwheyẹwhe.”+
22 Whenue yé sè enẹ, awuji yé bọ yé jo e do bo yì.
23 To azán enẹ gbè, Sadusi lẹ he nọ dọ dọ fọnsọnku ma tin,+ wá e dè bo kanse e dọmọ:+
24 “Mẹplọntọ, Mose dọ dọ: ‘Eyin sunnu de ma tindo ovi depope whẹpo do kú, nọvisunnu etọn dona sọ́n asi etọn bo jivi do nọvisunnu etọn he ko kú lọ tẹnmẹ.’+
25 Todin, nọvisunnu ṣinawe delẹ ko nọ mí dè. Tintan wlealọ bo lẹzun matintọ, podọ na e ma jivi wutu, nọvisunnu etọn sọ́n asi etọn.
26 Nudopolọ sọ jọ do awetọ po atọ̀ntọ po go kakajẹ yé omẹ ṣinawe lọ lẹpo ji.
27 To yemẹpo godo, yọnnu lọ kú.
28 To whelọnu lo, asi mẹnu tọn wẹ e na yin to yé omẹ ṣinawe lẹ mẹ to fọnsọnku whenu? Na yemẹpo wẹ ko dà ẹ pọ́n di asi.”
29 Jesu gblọnna yé dọmọ: “Nuṣiwa wẹ mì te, na mì ma yọ́n Owe-wiwe lẹ kavi huhlọn Jiwheyẹwhe tọn;+
30 na to fọnsọnku whenu, sunnu lẹ ma na wlealọ mọjanwẹ yọnnu lẹ ma na yin nina to alọwle mẹ do niyẹn, ṣigba yé na tin taidi angẹli lẹ to olọn mẹ.+
31 Gando fọnsọnku oṣiọ lẹ tọn go, be mì ma ko hia nuhe Jiwheyẹwhe ko dọhlan mì dọmọ:
32 ‘Yẹn wẹ Jiwheyẹwhe Ablaham tọn, Jiwheyẹwhe Isaki tọn podọ Jiwheyẹwhe Jakọbu tọn’?+ Jiwheyẹwhe mẹhe to ogbẹ̀ lẹ tọn wẹ ewọ, e ma yin oṣiọ lẹ tọn gba.”+
33 To whenue gbẹtọgun lọ lẹ sè enẹ, awuji yé na nuplọnmẹ etọn wutu.+
34 To whenue Falesi lẹ sè dọ e ko bọnùdo na Sadusi lẹ, yé bẹ yede pli bo wá e dè.
35 Podọ nado whlé e pọ́n, dopo to yé mẹ he yọ́n Osẹ́n lọ ganji kanse dọmọ:
36 “Mẹplọntọ, gbedide tẹwẹ klohugan to Osẹ́n lọ mẹ?”+
37 E dọna ẹn dọmọ: “‘Hiẹ dona yí ahun towe lẹpo, alindọn* towe lẹpo, podọ ayiha towe lẹpo do yiwanna Jehovah* Jiwheyẹwhe towe.’+
38 Ehe wẹ gbedide lọ he klohugan bosọ yin tintan.
39 Awetọ lọ die, he sọ taidi tintan lọ: ‘Hiẹ dona yiwanna kọmẹnu towe di dewe.’+
40 Gbedide awe ehelẹ ji wẹ Osẹ́n lọ pete plá do, po Yẹwhegán lẹ po.”+
41 Todin, to whenue Falesi lẹ gbẹ́ pò to finẹ, Jesu kanse yé dọmọ:+
42 “Etẹwẹ mìwlẹ lẹn gando Klisti lọ go? Visunnu mẹnu tọn wẹ ewọ?” Yé dọna ẹn dọ: “Davidi tọn.”+
43 E kanse yé dọmọ: “To whelọnu lo, naegbọn Davidi to gbọdo glọ+ do ylọ ẹ dọ Oklunọ, bo dọ dọ,
44 ‘Jehovah* dọna Oklunọ ṣie dọmọ: “Sinai to adusilọ ṣie mẹ kaka yẹn nado yí kẹntọ towe lẹ do afọ towe lẹ glọ”’?+
45 To whenẹnu, eyin Davidi ylọ ẹ dọ Oklunọ, nawẹ ewọ yin visunnu etọn gbọn lo?”+
46 Podọ mẹdepope ma penugo nado gblọnho de na ẹn, podọ sọn azán enẹ gbè sọyi, mẹdepope masọ hà bo kàn kanbiọ de sè e ba.
